1 TIMOTEO 1

1Paulo laga a lososonyo lo Kristo Yesu ku kukuzu na Ŋun Kariteni likalo ku na Kristo Yesu laga a yendru nikanalo‚ 2aroma ku Timoteo, ŋiro lio laga mŋgba i rugo katanilo. ’Busa na’buna ku ediyolo ku teili lo trotro lo ŋiyu ku Ŋun Monyelo yu‚ ku Kristo Yesu Mata likalo yu itrolo ti gbo’dini ku do. 3I naga ma na utini Makedonia yuna‚ na ama’yu mugu ku do adi sakani Efeso yu, i takindra na ku’de kilo ŋutulu kukuzuna, adi ka’bi ko ku totogo togole laga ka’de, 4ka’bi ko ku ’de’delaki yoyolozu nasena i likikirito laga a ’busa ’busa kilo kini‚ ku kena na merenyezi naga ani lengana kini itro. kine kuliata de se na zondra piyesi naga a ’busa ’busa kine‚ agbo’da logu ŋutulu i dendra na lopete lo Ŋun laga adena ku rugoloni. 5Kuwade kulia na tikini yi kukuzuna kine se naga a nyadru naga na ŋiyu i teili laga a lokiyelo ku i dendra na’bu naga i teili kata yuna‚ ku i rugo naga ’ba toŋulupana kata yuna. 6Ku’de kilo ŋutulu agira i merete ku kine kuliata de‚ alopugo ’beri i kulia na tatayi a ’busa ’busa kine. 7Ko kilo nyadru gbo’da a katogolo ti kukuzuna ’bo ko aku de kulia na ta se kine‚ ku kuliata naga ma se togo’i ku teriŋi kine itro. 8Nyenaga yi adeni adi kukuzuna a na’bu ku le’de ŋutu laga a’deba lepe soso‚ 9ma yi rambini adi kukuzuna agbo’da tiki ku kulia ti ŋutulu laga mŋ gba kiloni‚ ’bo tiki ku kulia ti kakokoro kilo ku ŋutulu laga ’ba sobu na kulia kilo‚ ku ŋutulu laga ani teminizo Ŋun kilo‚ ku katoronya kilo‚ ku ŋutulu laga ’ba kekeli kilo‚ ku laga be ŋutu ti ka kilo‚ ku ŋutulu lo tatuza monyezi kuwa ŋotela kilo‚ ku karemo kilo 10ku ŋutulu laga ku konye lopi, ku lalia lo kondra kulia ti yukuwe ku lalia ku’de kilo, ku kariaka ti ŋutulu kilo ku ŋutulu ti to’bure kilo‚ ku ŋutulu laga lo nyosu milio ku to’bure kilo kugbo ŋutulu laga lo kondra kulia ku’de naga a ti nyo naga na moro ku togole laga sosolo kilo. 11Togole ŋanilo tomodya mugu soso ku kuu na’bu naga a na’bu koru naga ma Ŋun lo pupuralo kolokindri na i trugo ina. 12Nyena tikindri na Kristo Yesu‚ Mata lika laga atikindra na teriŋi ilo iyete‚ igbonaga lepe akendra na ku teili lo to’diri‚ agelundra na i konakindra na nye kita ina. 13’Dia kodro ku na kazu amomorozu lepe‚ awowondru lepe‚ a’dadru lepe a loro kpe‚ i bo ŋanina na arumbi ediyo igbonaga na kazu kondra de ’ba dendrana, ’ba rugo itrona. 14Matalo a’doga na ku ’busa na’bu nanyena koru‚ ku rugona‚ ku nyadru naga ku Kristo Yesu katanina. 15Kulia na tatayi kine a ’diri‚ na zuki ku ŋutulu giri i rugo‚ adi Kristo Yesu apondra i kani i ritundro na katoronya. Laga na a katoronyani laga a loro lo rodru girilo. 16’Bo na arumbi ediyo ku kine kulia de‚ adi ma Kristo Yesu ku kpezi teili lonye lo tumada ilo kuwenina, na laga a loro lo rodru girilo, a kpiye lo ŋutulu laga lo irugo lepe i rumbi na ru naga ani lengana kilo. 17Mata lo paratra paratra, laga ani tuwa tro, laga ani meta tro, laga a Ŋun laga gele’dulo ti teminioni, ti purani pura paratra paratra. Amena. 18Ŋiro liolo Timoteo, na kolokindro do ina kukuzu de‚ beti naga ma bodoki ti kulia ti Ŋun kine kilo trugi kulia konu kinena. Ku kulia ŋani kine mo do ku romoki moroni a na’bu‚ 19mo do ku gbo’dini ku rugo ku dendra na’bu naga i teili kata yuna itro. Ku’de kilo ŋutulu aredra dendra nase na teilina‚ kuwade ko akokorozu rugo nasena kaŋo be naga ma ki’bona kokorozi suburi kata yuna. 20Kasiko i dridriŋini ku Humenayo seku Alekezanda, na atikindra ko i keni lo Satani i togo’yu na ko‚ ka’bi ko ku momorozu Ŋun.

will be added

X\