1 TESALONIKE 4

1Luŋaseri, kulia naga a tutuweto kine, ta azuzumbu kayani gbiyeri lasu laga lo romoki tikindra Ŋun nyola ilo, ’bo ta kilo kondra de. Kuwade na piza ta ku ma’yu na mugu adi woronita ’duu de. 2’Bo ta adeni kukuzuki naga ma yi takindri ta ku Mata laga Yesu kine. 3’Bo kulia naga ma Ŋun nyadrini kine a tokela nasuna, adi paneta konye lopi kaŋo. 4Ŋutu gele gele ti dene lundra na noka nanye lepe ku kekeli‚ ku teminizo itro‚ 5agbo’da ku ki’be na muguni be Monyazi laga aku deni Ŋun kilo. 6Le’de ŋutu ka’bi ku liliaŋa i kondra na luŋase lonyelo a loro i kine kulia de katani‚ igbonaga Matalo a karopani lo kine kulia de giri be naga kazu yi atepizo ta ku ’doto na kulianana. 7Ŋun agbo’da luŋundra yi i gbo’da naga ’ba kekelini‚ ’bo i kekeli. 8Kuwade, ŋutu lo redra kine kulia de ilo agbo’da redra ŋutuluni, ’bo lepe redra Ŋun laga lo tikindra ta Yuka Nakiye nanyena ilo. 9Ku kulia ti nyadru na luŋaseri kilona‚ ani nyara adi ti le’de ŋutu wuroki ta waraga, igbonaga Ŋun atogo’yu ta i nyadru na ’beri kasu dridriŋinina. 10A ’diri ta kilo nyadru luŋaseri giri laga lo gbo’da i ka na Makedoniana giri kata yu kilo. ’Bo yi ma’yu ’beri ku ta adi koneta ’duu de. 11Morodrita saka naga mada‚ koneta kuliata kasu lepe kine‚ koneta kita ku kenisi kasu lepe kilo‚ be naga kazu ma yi takindri ta kukuzuna ina. 12Gbiyeri lasulo ti gbo’dini soso ku ŋutulu laga kaŋo yu kilo‚ telemerana ka’bi ku titiki ta i momo’yu. 13Luŋaseri, na nyadru deneta kulia ti ŋutulu laga a’balazi kilo‚ ka’bi ta ku gbo’da ku drelia be ku’de kilo ŋutulu laga ’ba yendru kilo. 14’Bo kugbo yi laga arugo adi Yesu atuwa‚ adi lepe aŋiye ’do‚ gbode ’do yi arugo adi Ŋun izozondra ŋutulu laga a’balazi i rugo na Kristona kilo‚ kasi Yesu kugele. 15’Bo kulia na taki yi ta kine de a kulia na ta Matalo, adi yi laga zoru laga akoloki yeŋadru tozo i pondra na Matalo nu, yi aka tu ku ŋutulu laga a’balazi kilo ŋero a nzeni. 16Laiya na kukuzuna ikukuu, ku roro lo malaikata laga a leŋgberelo‚ ku woŋo na guke lo Ŋun. Matalo lepe ikiyundra kani‚ ŋiyu i ’diko yu. ’Bo ŋutulu laga atatuwa ku Kristo katani kilo iŋiŋiye a kayo. 17I bo ŋanina yi laga zoru‚ laga akoloki kilo i’dumazi kugele kasi ko i ’dikolo kata yu i momora kasi Matalo i dridriŋi na ’dikolo yu‚ gbode yi igbogbo’da kasi Matalo kugele mu luŋa. 18Kuwade rudeta teiliko kasu kilo kasu dridriŋini ku kine kulia de.

will be added

X\