1 PETERO 3

1’Bo ’do, wate kine ta, sopeta so kulia ti lalia kasu kilo kine, kuwade kugbo ku’de kilo ani sobu kulia kine ko iroromoki zuwe ku Kristoni‚ agbo’da ku kulia na trutrukoki koni‚ ’bo ku gbiyeri lo wate kasiko kine‚ 2ku ko laga amedra gbiyeri lasu laga a lokiye lo kugini ta Ŋun ilo. 3’Bu’busi nasuna ka’bi ku gbogbo’da ku kukundra na ’beri ti kaŋo ka’delo, ŋona ku traka na kupi kugbo ku zubu na drumo‚ kugbo ku sozu na bongola. 4’Bo ’bu’busi nasuna ti gbo’dini i teiliko laga ani kpeza ’beri kaŋo kilo‚ ku zupu naga ani karakina, nye naga a teiliko laga mada‚ laga ’ba pudya na ’beri‚ laga a ŋo lo’bu lo’bu ku Ŋun i konyeni. 5’Bo kazu wate ti ’bero‚ naga na ’delakindra ’beri i yendru na Ŋun kine azubu ’beri de‚ ti ko asobu kulia ti lalia kase kilo‚ 6beti naga ma Sara sobini kulia ti Abarahama, lungi lepe a matana. ’Bo ku ta naga kondra a na’bu‚ ku teiliko kasu kilo ani ’do’do ku kuze na le’de ŋo tro‚ ta gbo’di a ŋazi ti lepe. 7’Bo ’do‚ lalia kilo‚ i saka nasu naga kugele ku wate kasu kine ku dendrana, kuketa ku ko igbonaga ko gbo ku teriŋi ’baziŋana, ’bo ko kasi ta kugele irurumbi ’busa na’bu na Ŋun na zowundra runa ina‚ ’bo kulia ku’de ka’bi ku gogo magu nasu na Ŋun ina. 8Kulia naga a ’dute kine se kine de. Ta giri gbo’dita ku yoyolozu nagele‚ ku teili logele itro. Nyareta nya ’beri kasu dridriŋini be luŋaseri, ku teili lo trotro, ’ba pura na ’beri. 9Ku teteyitokita rope na kulia naro, kugbo rope na ’dadru, ’bo tikita koŋo na’bu ku naga ma ta luŋuni kazu i rumbi na koŋo na’buna ina. 10’Bo “Ŋutu laga lo nyadru ru‚ lo nyadru medra baŋesi na’bu ilo, ti lepe gone kutu nanyena i tazu na kulia naro, ka’bi lepe ku tata ku toŋulupa. 11Ti lepe girani gira ku kulia naro kine i kondra na kulia na’bu kine. Ti lepe gale teili lo trotro i kepodru bo ŋanina. 12’Bo konye ti Mata kilo gbo i ŋutulu laga mŋgba kilo kini, suwo ti lepe kilo yinga magu nasikona. ’Bo Matalo gbo ku ŋoma ku ŋutulu laga lo kondra kulia naro kiloni.” 13Ŋa lo isasandru ta ku ta laga gbo ku puso ku kulia naga a na’bu kine ya? 14’Bo ku ta laga asasanya ku kulia ti logbiye lo’bu kine‚ koŋo na’buna ina a nasu. 15Teminineta Kristo a Mata kasu teilikoni. Kukuneta ’beri ’duu ma ta ku teyitokindro ŋutulu giri laga lo piza ta kilo kulia ti yendru naga kasu teilikoni kine. 16’Bo teyitokita ko kulia ku teili lo mada‚ ku kuga itro. Dendra nasu naga i teili yu ina ti gbo’dini a nakiye‚ kuwade kugbo ta laga a’data‚ ŋutulu laga lo momorozu gbiyeri lasu laga ku Kristo katani ilo kilo igbo’da ku yukuwe. 17A na’bu ku ta sasanya ku kondra naga a na’buna‚ ku Ŋun laga anyadru de‚ alangu sasanya nasu naga ku kondra na kulia narona. 18’Bo Kristo kazu atuwa ku ta‚ luŋa gele ’du‚ ku kulia ti torozi kine‚ laga a ŋutu laga mŋgba i piri na ŋutulu laga ani gbo’da mŋgba kilo‚ ma lepe ku zongi yi ku Ŋun yu. Lepe kazu atatuwi i muguni ’bo atoruwe i yukani. 19Lepe druga utu ku yuka i trukokindro na yukala naga adrorora kine kulia. 20Kunu yukala de aku sobu kulia kugbo kazu Ŋun lo momondru ku teili lo mada i luŋa lo Noa lu‚ ti inga ki’bona nu kukuna kukuna. I ki’bo ŋanina kata yu, ŋutulu lo rite i pio kata yu kilo ’baziŋa, ko budro ’du. 21Tinade baputizi laga a kpiyelo nyelo ritundro ta, agbo’da ku lalayi na mundri ti muguni, ’bo ku tayi na rugo ku Ŋun yu ku dendra na teili naga a nakiyena ku ŋiye na Yesu Kristona. 22’Bo Yesu autu i ’diko yu‚ gbo’di lu i keni lo lutate lo Ŋun‚ ku malaika kilo i koŋo yu‚ ti todrumaki kine ku teriŋito kine a’delaki ku lepe i mokoni.

will be added

X\