1 PETERO 2

1Kuwade kolokita teili lorolo giri, ku tomboli, toŋulupa, yuma, ku ’dadruna giri. 2Gbo’dita be ’u’uŋweta laga lo yuŋele a loluduko kilo, gbo’dita ku kure na le naga a kulia ti Ŋun, naga ’ba ŋo lo kokorozu ko, ma ta ku ’dudyini ku se, ma ta ku rumbini ritena, 3’bo a’diri ta atritrimi pele na’bu na Matalona. 4Pondrita ku Mataloni, laga a ŋurupi laga zoru, lo re ŋutululo, ’bo ku Ŋun i konyeni anyume, ku gbore naga ki de. 5Gbo’dita be ŋoropo laga zoru, ma ta lepe ku ’duko a kadi na Yuka Nakiyena, ma ta ku gbo’da a ketimi na ka’i’ila laga a lokiye kilo ma ta ku tikindri ’i’ileta laga a ti yuka, laga ma Ŋun romoki rugi ku Yesu Kristo kilo. 6’Bo kulia kine awuro adi, “Mete, na lo ’delakindra Ziona yu ŋurupi lo nyume i goŋe lo kadilo, laga a lo’bu lo’bulo. ’Bo ŋutu lo rugo lepelo aka gbo’da ku yukuweni.” 7Kuwade ta laga lo rugo lepe kilo, lepe gbo kasu konyeni a lo’bu lo’bu, ’bo ku ŋutulu laga aku rugo kilo i konyeni, “Ŋurupi laga ma ka’duko redrilo ayeŋundra a ŋurupi laga a druma lo goŋe lo kadilo.” 8’Bo, “Ŋurupi laga lo pupugo ŋutulu, laga lo tikindra ko i bayi.” Ko babayitu igbonaga ko ani sobu kulia kine be naga aŋeraki karana. 9’Bo ta laga a ŋutulu laga anyume‚ a ketimi na ka’i’ila laga lo konakindra Matalo kita kilo‚ a zuru laga a lokiye‚ a ŋutulu laga ma Ŋun delakindri a zuru lonye kilo‚ ma ta ku trugi konesi naga a na’bu koru ti Ŋun laga lo lungu ta i lupundro i mude yu‚ i lubo i parara nanye na tikindra ramena kata yu ilo. 10Kazu ’berona ta agbo’da a zuruni‚ ’bo ta gbo’di tinade a zuru lo Ŋun. Ta kazu aku rumbi ediyo‚ ’bo tinade ta arumbi ediyo. 11Ŋutulu laga ma na nyadri kilo‚ na ma’yu mugu ku ta laga be kaworo lo reki kilo, adi paneta ki’beŋa ti mugu naga na moro ku yukala ti ŋutulu kine. 12Gbo’dita ku gbiyeri lo’bu ku Monyazi kilo i dridriŋini. Kuwade ’dibani kodro ku ko laga a’dadru ta be katoronya kpe, ma ko ku medra konesi kasu naga a na’bu kine, ma ko ku pudyi Ŋun i luŋa laga ma lepe ku pondrini lu. 13Sopeta so ’dola na kuwe giri na ’delaki ŋutulu kilona ku kulia ti Mata Ŋun kine, kugbo Kaisari laga ku ŋutulu giri i koŋo yulo, 14kugbo lo’bizoki laga ma lepe sunyundri i ringa na katoronya kilo, kuwa i pudya na ŋutulu laga lo kondra a lo’bu kilo. 15Kine de a kulia naga ma Ŋun nyadrini kine, adi ku konesi kasu naga a na’bu kine, ma ta ku ’dizini kutuzi ti ŋutulu laga lo kulia ’ba dendra, ’ba tobodo kilo. 16Sakanita a ŋutulu laga alaka kilo, ’bo lake nasuna ka’bi ku gbogbo’da be ŋo lo mugo kulia narolo, ’bo gbo’dita be upi ti Ŋun. 17Sopeta so ŋutulu kilo giri. Nyareta nya luŋaseri kilo. Kuketa Ŋun. Sopeta so Kaisari. 18Ta laga a kakita kadini kilo, sopeta so drumala kasu kilo ku kuka koru, agbo’da drumala laga a lo’bu ku teiliko lo’bu kilo ka’deloni, ’bo ko laga ku teiliko lo potroru kilo itro. 19Kugbo le’de ŋutu laga aŋinga miye na sasanya naga ’ba kuliana, ti lepe adeni kanye teilini ŋo laga ma Ŋun nyadrinilo, igbo’da a na’bu. 20Kuwade ku ta laga akondra toro, ku ta laga arugo kpinyana ku teili lo rile, ta irumbi belana adidinyo ya? ’Bo ku ta laga akondra soso‚ ku ta laga arugo kpinyana ku teili lo rile‚ igbo’da a na’bu ku Ŋun i konyeni. 21’Bo ta aluŋu i kine kulia de‚ igbonaga Kristo kazu asasanya ku kulia kasu kine itro‚ i kolokindro na ta kpiye ma ta ku kepodru bo na lepena. 22Lepe aku kondra toro tro‚ ’bo toŋulupana aku rie ku lepe i kutuni tro. 23Kugbo lepe laga a’data‚ lepe aku teyitodru ’data nanyena. Ku lepe laga asasanya lepe aku tokuzendru ŋutulu, ’bo lepe akolokindro mugu ku Kaŋerani lo ŋedya kulia sosolo i keni. 24Lepe ku mugu adumadru torozi kaya kine kanye muguni i kedini ki yu, ma yi ku tatuwa i torozi, ma yi ku gbo’da zoru i logbiye lo’buloni. ’Bo ta atoruwe ku roro’di na lepena. 25’Bo kazu ta aliaŋa i kikoni be kebilizi, ’bo tinade ta gbo’di ayite ku lepeni laga lo yugu ta, laga a katiyuni lo yukala kasu kine itrolo.

will be added

X\