1 PETERO 1

1Petero laga a lososonyo lo Yesu Kristolo, aroma ku ŋutulu laga lo reki i ka na Ponto, Galatia, Kapadokia, Asia, ku Bitunia kata yu kilo. 2Ŋutulu ŋani kilo kazu a lo nyumu Ŋun Monyelo, beti naga ma lepe dendri kulia kasiko kine ’berona‚ laga atokela a lokiye ku Yuka Nakiyena kilo‚ ma ko sobini kulia ti Yesu Kristo kine, ti ko agbata ku rima ti lepe kine. ’Busa na’buna ku teili lo trotrolo ti ’yale ’ya ’beri kasuni. 3Ŋun laga a Monye lo Mata lika Yesu Kristolo ti purani pura! Yi ayuŋele a loluduko ku kulia ti ediyo koru lo lepelo, ma yi ku gbo’da ku yendru naga ani lengana ku ŋiye na Yesu Kristo naga i dridriŋi na ŋutulu laga atatuwa kilona‚ 4ma yi ku rumbi kapa laga ma Ŋun riritakindri yi laga ani liki kaŋo, laga ’ba mundri‚ laga ani riŋe, laga lo riritaki ta i ’diko yu kilo. 5Teriŋi na Ŋun na tizu ta ku rugona, ma ta ku rumbi rite naga na momondru kpekindra mugu i baŋe naga a ’dute nu ina. 6Ku rite ŋanina ta kilo nyonyola koru, ’dibani kodro tinade ku baŋe naga a naŋutruna, ta kilo rumbi luŋulio ti modruzi naga ka’de ka’de kine kpe. 7Kuwade rugo nasu naga mŋgba, naga amoro, naga ku gbore naga ki alangu drumo naga na liki kine, ’dibani kodro ku lepe naga amoro ku kima de kpe, ma lepe ku rieni a ŋo laga lo pupura ku lo kpekpele ku lo kukuka itro, i luŋa laga ma Yesu Kristo kpekindri mugu lu. 8’Bo ta anyari lepe, ’dibani kodro ku ta aku meri lepe kpe, ’dibani kodro ku ta laga ani medra lepe tinade kpe, ta arugo lepe, ta kilo nyonyola koru ku lepeni ku nyola naga ani romoki tayi‚ naga a na’bu koruna. 9Kuwade ta a’deba ŋo laga ma rugo nasuna zondrilo, nye laga a rite na yukala kasu kine. 10Kakeyo laga kazu lo kezu kulia ti ’busa na’bu naga na itiki ta kine, ko apipiza, agaladru ku tumada kulia ti ina rite dena. 11Ko apiza adi Yuka na Kristo naga kase katanina akpekindra ko luŋa laga yaya, kugbo adidinyo i naga ma lepe kpezini a kayo sasanya na Kristo ina, ku ’bu’busi naga na ipopondra bonina itro ina. 12Kulia kine akpeki ko adi ko agbo’da logu ’beri a ’beri naseni, ’bo ko kilo logu ta ku kulia na tru tinade ŋutulu lo zakindra ta kuu na’buna ku Yuka Nakiye naga na sunye i ’diko yu ina kilo. Malaika kilo nyadru medra kulia ŋani kine itro. 13Ku kine kulia de, kukuneta yoyolozu nasuna soso, tineta ti ’beri, ’delakita teiliko kasu kilo giri i yendru na ’busa na’bu naga na ititiki ta i luŋa laga ma Yesu Kristo kpekindri mugu lu. 14Gbo’dita be ŋazi laga lo sobu kulia, ku kokonuta beti gbiyeri laga a loro laga ma ta kondri kazu ku ki’beŋa ti ’beri, ti ta inga ’ba dendrana kulu. 15’Bo beti naga ma Ŋun laga lo lungu talo gbo’dini a lokiyena, gbo’dita a lokiye itro i gbiyeri lasulo giri. 16’Bo awuro adi, “Gbo’dita a lokiye, igbonaga na lepe a lokiyena.” 17Ŋun ilo ŋedya kulia ti ŋutulu giri kine ’ba ge’ya, beti naga ma ko kondrinina. Kugbo ta laga kilo lungu lepe a Monye, kuketa ku Ŋun i baŋe naga ma ta sakani inidena. 18Ta adeni adi ta agbo’da dake i gbiyeri lasu laga a ’busa‚ laga merenyezi kasu kilo ma puputundrilo, ku kapa laga lo liki kaŋo kiloni, be riye kugbo drumoni, 19’bo ku rima naga ku gbore naga ki ti Kristo, naga be rima ti tore lo kebilito laga ’ba meriko, ’ba mundri itro ilo kine. 20Lepe agele ’bero ti inga kana aku gbeki tro, ’bo lepe akpeza mugu i ’dute na baŋesi ku kulia kasu kine. 21Ku Kristo katani ta gbo’di arugo Ŋun laga atoŋizu lepe i dridriŋi na ŋutulu laga atatuwa kilo, laga atikindra lepe purana ilo, adi rugo nasuna ku yendru nasuna ma gbo’da ku Ŋun yu. 22Ku naga ma ta toke’i teiliko kasu kilo i sobu na kulia ti to’diri kine, i nyadru na luŋaseri kilo ’ba toŋulupa ina, nyareta nya beri kasu dridriŋini ku puso, ku teili giri. 23Ta ayuŋele a loluduko, agbo’da ku kayuŋo laga lo ikakaraki kiloni, ’bo ku kayuŋoni laga ani karakilo ku kulia na ta Ŋun laga zoru, lo yiŋiki ’duulo kine. 24’Bo be naga ma wuronina adi, “Ŋutulu kilo giri gbo beti droruo, ’bo ’bu’busi nasikona giri gbo beti koturo naga i droru kata yu kine. Drorulo ilo ririŋe, ’bo koturo kine kine lugu ka, 25’bo kulia na ta Matalo kine kine yiŋiki ’duu.” Kine kulia de a kuu na’bu na trukoki tana.

will be added

X\