1 YOANE 5

1Ŋutu gele gele laga lo rugo adi Yesu laga a Kristolo, ayuŋe ku Ŋun‚ ’bo ŋutu gele gele laga lo nyadru kayuŋonilo, nyadru ŋiro lo yuŋelo itro. 2Ku kine kulia de yi adeni adi yi anyadru ŋazi ti Ŋun kilo i naga ma yi nyadrini Ŋun ku sopo na kukuzuki ti lepe kinena. 3’Bo nyadru naga ma yi nya­drini Ŋun ina nye ina de, adi ti yi sobini kukuzuki ti lepe kine, ’bo kukuzuki ŋani kine ani gbo’da tomoni. 4’Bo ŋutu gele gele lo yuŋe ku Ŋun ilo nye lo tiga ina ka de, ’bo tika naga na tikani ina ka dena nye naga a rugo nikana. 5’Bo ŋutulu a ŋa laga a katikani lo ina ka delo, ŋolo laga arugo adi Yesu a Ŋiro lo Ŋun ilo ya? 6Ŋutu laga lo pondra ku pio ku rima itrolo, lepe a Yesu Kristo. Agbo’da ku pio kine ka’deloni, ’bo ku pio kine‚ ku rima kine itro. ’Bo Yuka Nakiyena ina ’dodru bo na kuliana‚ igbonaga Yuka Nakiyena nye naga a kulia ti to’diri kine ina. 7Ka’doto ti bo na kulia kine ko musala‚ 8se kine de‚ Yuka Nakiyena, seku pio kine‚ ku rima kine. Ko musala katru tazu kulia naga nagele. 9Ku yi laga arugo bo na kulia na ’doru ŋutulu kilo kine‚ bo na kulia na ’doru Ŋun kine arodru. Kine kulia de a bo na kulia na ’doru Ŋun ku kulia ti Ŋiro lonyelo kine. 10Ŋutu lo rugo Ŋiro lo Ŋun ilo gbo ku ’doto na bo na kuliana kanye teilini. Ŋutu laga aku rugo Ŋun ilo nye lo tikindra lepe i gbo’da a ’bureni igbonaga lepe aku rugo bo na kulia na ’doru Ŋun ku kulia ti Ŋiro lonyelo kine. 11Bo na kulia na ’doru Ŋun kine se kine de‚ adi Ŋun atikindra yi ru naga ani lengana, ’bo ina ru de gbo ku Ŋiro lo lepelo katani. 12Ŋutu laga lo gbo’da ku Ŋiro lo Ŋun ilo‚ nye lo gbo ku ru ŋanina. Ŋutu laga ani gbo’da ku Ŋiro lo Ŋun ilo ani gbo’da ku ru. 13’Bo na awurokindro ta kine kulia de, ta laga arugo kari ti Ŋiro lo Ŋun kine kilo ma ta ku dendri adi ta gbo ku ru naga ani lengana. 14Ku kine kulia de yi gbo ’ba kuze ku lepe i koŋoni, adi kugbo yi laga amagu le’de ŋo be naga ma lepe nyadrinina, lepe iyiyinga yi. 15Kugbo yi laga adeni adi lepe iyiyinga yi i kuliata giri naga ma yi magini lepe kine‚ yi adeni adi yi arumbi kapa laga ma yi magini ku lepeni kilo. 16Kugbo le’de ŋutu lo medra luŋase lonyelo i kondra na toro naga ani tuwaniki ina‚ lepe imamagu, Ŋun ilo ititikindra lepe ru ku kulia ti ŋutulu laga lo kondra torozi naga ani tuwaniki kine. Toro naga na tutuwaniki kata, ’bo na agbo’da kulia adi ki ta make Ŋun ku kunu kulia deni. 17Kulia naro kine giri a toro, ’bo toro ne’de kata naga ani tuwaniki. 18Yi adeni adi ŋutu gele gele laga ayuŋe ku Ŋun ilo ani kondra toro ’duu, ’bo Ŋutu laga kazu ayuŋe ku Ŋun ilo nye lo riridra ŋutu ŋanilo‚ ’bo ŋutu lorolo ani ’bo’yu lepe. 19Yi adeni adi yi a ti Ŋun, ’bo kana giri ina si’da ku ŋutu lorolo i keni. 20Yi adeni adi Ŋiro lo Ŋun ilo ayeŋundra, lepe atikindra yi tobodo na denani Ŋun laga mŋgbalo. ’Bo yi gbo ku Ŋun laga mŋgbalo katani, ku Yesu Kristo, Ŋiro lo lepelo katani. Ilo de a Ŋun laga a ’dirilo, ina de a ru naga ani lengana. 21Ŋazi lo’di’diki kilo, tineta ti ’beri ku muloko laga a ’busa ’busa kilo.

will be added

X\