1 YOANE 4

1Ŋutulu laga ma na nyadri kilo‚ ku ruruta yukala kine giri‚ ’bo morita yukala kine i dena ŋona kunu de a ti Ŋun‚ igbonaga kakeyo laga a ’bureniko rodri alupundro i kanina. 2Ta roromoki tritrimba Yuka na Ŋun ina ku kine kulia de. Yuka gele gele naga na rugo adi Yesu Kristo apondra ku mugu na ŋutuna ina‚ a na Ŋun. 3’Bo yuka gele gele naga aku rugo Yesuna‚ agbo’da a na Ŋun ni. Ina yuka de a miriku lo Kristo‚ laga ma ta yingi adi lepe ipopondralo. Lepe gbo’di ayeŋundra i kani azo. 4’Bo ta laga a ŋazi lo’di’diki kilo, ta a ti Ŋun‚ ta atiga kakeyo ŋani kilo azo‚ igbonaga lepe lo saka kasu katani ilo a druma, arodru lepe lo saka i kanilo ina. 5Laga ko a ti ka‚ kuwade kulia na ta ko kine a ti ka‚ ’bo ŋutu ti ka kilo yiyiŋ ko. 6Laga yi a ti Ŋun. Ŋutu laga adeni Ŋun ilo yiyinga yi‚ ’bo ŋutu laga ani gbo’da a lo Ŋun ilo ani yinga yi. Ku kine kulia de yi roromoki tritrimba yuka na kulia ti to’diri kine ku yuka na kulia ti togoleto ti to’bure kine itro. 7Ŋutulu laga ma na nyadri kilo‚ ti yi nyare nya ’beri kaya dridriŋini‚ igbonaga nyadruna ina a na Ŋun‚ ’bo ŋutu laga lo nyadru ilo ayuŋe ku Ŋun‚ adeni Ŋun itro. 8Ŋutu laga ani nyadru ilo aku deni Ŋun‚ igbonaga Ŋun nye laga a nyadruna. 9I kine kulia de nyadru na Ŋun ina akpeza mugu kaya dridriŋini, adi Ŋun asunyundro Ŋiro lonye lo yuŋe gelelo i kani‚ ma yi ku gbo’da zoru ku lepe. 10Nyadruna nye ina de‚ agbo’da adi yi lepe anyadru Ŋun ni‚ ’bo lepe anyadru yi‚ asunyundro Ŋiro lonyelo i gbo’da a ’i’ile lo kukunani kulia ti torozi kaya kine. 11Ŋutulu laga ma na nyadri kilo‚ kugbo Ŋun laga anyari yi de‚ a na’bu ti yi nyare nya ’beri kaya dridriŋini. 12Le’de ŋutu ’bayi laga amedra Ŋun i baŋe ne’de. Kugbo yi laga nyanyari ’beri‚ Ŋun ilo saka kaya katani‚ ’bo nyadru na lepena aromoki soso kaya katani itro. 13Ku kine kulia de yi adeni adi yi kilo saka ku lepe katani, lepe kaya katani itro, igbonaga lepe a’doga yi ku Yuka nanyena ina. 14’Bo yi amedra‚ yi kilo ’dodru bo na kuliana adi Monyelo asunyundro Ŋiro lonyelo a Kariteni lo ŋutu ti ina ka de kilo. 15Ŋutu laga lo rugo adi Yesu a Ŋiro lo Ŋun ilo. Ŋun saka ku lepe katani ’bo lepe ilo saka ku Ŋun katani itro. 16Kuwade yi adeni‚ yi arugo nyadru naga ma Ŋun nyadrini yina. Ŋun laga a nyadruna‚ ’bo ŋutu laga lo saka i nyadruni ilo‚ lepe ilo saka ku Ŋun katani‚ ’bo Ŋun ilo saka ku lepe katani itro. 17Ku kine kulia de nyadruna aromoki soso kaya katani, ma yi ku gbo’da ’ba kuze i luŋa lo ŋerani kulia lu‚ igbonaga yi gbo be lepe i ina ka de ina. 18Kuze ’bayi i nyadru katani‚ ’bo nyadru naga sosona droŋodru kuzena giri kaŋo. Tokuzendruna a na ropani toro‚ ’bo nyadruna ani gboda soso ku ŋutu laga lo kuzelo katani. 19Yi nyadru igbonaga lepe lo nyadru yi i kayona. 20Kugbo le’de ŋutu kulia adi‚ “Na anyari Ŋun‚” ti lepe ilo ŋmoza luŋase lonyelo a loro, lepe a ’bureni, igbonaga ŋutu laga ani nyadru luŋase lonye laga ma nye medrinilo‚ ani romoki nyadru Ŋun laga nye aku merilo. 21Kuwade Kristo atakindra yi ina kukuzu de adi ŋutu laga lo nyadru Ŋun ilo ti lepe nyare nya luŋase lonyelo itro.

will be added

X\