1 YOANE 3

1Meteta nyadru naga koru naga ma Monyelo nyadrini yina‚ ma yi ku luŋu a ŋazi ti Ŋun! ’Bo yi gbo de. Ku kine kulia de ŋutulu ti ina ka de kilo aku deni yi‚ igbonaga ko aku deni Ŋun ina. 2Ŋutulu laga ma na nyadri kilo‚ tinade yi gbo’di a ŋazi ti Ŋun‚ ’bo kulia naga ma yi ku gbo’dini kine inga aku kpiya. Yi adeni adi i luŋa laga ma lepe ku puruni lu‚ yi igbogbo’da be lepe‚ igbonaga yi imemedra lepe beti naga ma lepe gbo’dinina. 3Ŋutu gele gele laga lo gbo’da ku ina yendru na Kristo delo nye lo toke’ya mugu a lokiye beti naga ma Kristo gbo’dini a lokiyena. 4Ŋutu gele gele lo kondra toro ilo‚ nye lo kokorozu kukuzuna. Torona a kokoreyi na kukuzuna. 5Ta adeni adi Kristo kazu apuru i yunadru na torozi kaŋo‚ ’bo toro ’bayi ku lepeni. 6Ŋutu gele gele laga lo saka ku lepe katani ilo ani kondra toro ’duu. ’Bo ŋutu gele gele laga lo kondra toro ’duu ilo aku medra lepe‚ aku deni lepe. 7Ŋazi kilo, le’de ŋutu ka’bi ku ’bo’boli ’bo’boli ta. Ŋutu laga lo kondra kulia naga soso kinelo‚ nye lo gbo a ŋutu laga mŋgba‚ beti naga ma Kristo gbo’dini a ŋutu laga mŋgba ina. 8Ŋutu laga lo kondra toro ’duulo nye laga a lo kasosoyini lo kulialo, ’bo ŋiyu i suluki yu kasosoyini lo kulialo kondra toro. Ku kine kulia de Ŋiro lo Ŋun ilo apuru ma lepe ku tukarakindra konesi ti kasosoyini lo kulialo kine kaŋo. 9Ŋutu gele gele laga ayuŋe ku Ŋun ilo ani kondra toro ’duu‚ igbonaga nyomo ti Ŋun kilo kilo ku lepe katani ina. Lepe ani romoki kondra toro ’duu igbonaga lepe ayuŋe ku Ŋun ina. 10Ku kine kulia de ŋazi ti Ŋun kilo tritrima ku ŋazi ti kasosoyini lo kulialo kilo. Ŋutu gele gele laga ani kondra kulia naga soso kinelo‚ ku ŋutu laga ani nyadru luŋase lonyelolo, ko ani gbo’da a ti Ŋun. 11Kine kulia de a kuu naga ma ta yingi ŋiyu i suluki yuna‚ adi ti yi nyare nya ’beri kaya dridriŋini. 12Ka’bi yi ku gbogbo’da be Kaina laga a lo ŋutu loro‚ laga lo rembu luŋase lonyelolo. Lepe rembu lepe gbandra ya? Igbonaga konesi ti lepe lepe kine a narona‚ ’bo konesi ti luŋase lo lepe kine a na’bu. 13Kuwade luŋaseri, ka’bi ta ku rarami ’beri ku naga ma ŋutu ti ka kilo ŋmozini ta a loro ina. 14Yi adeni adi yi arosodru i tuwa katani i lubo i ru kata yu azo‚ igbonaga yi anyari luŋaseri kilona. Ŋutu laga ’ba nyadrulo nye lo saka i tuwa katani. 15Ŋutu laga lo ŋmoza luŋase lonye a lorolo a karemoni, ’bo ta adeni adi karemoni gele ’bayi lo gbo’da ku ru naga ani lengana kanye katani. 16Ku kine kulia de yi adeni nyadruna, igbonaga Kristo akolokindro ru nanyena kayanina‚ kuwade ti yi kolokindri ru nikana ku luŋaseri kiloni. 17’Bo kuwa le’de ŋutu lo gbo’da ku kapa ti ina ka de‚ kugbo lepe laga abonga luŋase lonye laga atika ku le’de ŋo‚ ’bo kugbo lepe laga atoru teili lonyelo ka’bi nye ku ’do’doga lepe‚ nyadru na Ŋun ina saka ku lepeni adidinyo ya? 18Ta laga a ŋazi lo’di’diki kilo‚ ka’bi yi ku nyanyari ŋutulu kilo ku kulia na tatayi ku kutuzi ka’delo, ’bo ku konesi‚ ku nyadru naga mŋgbana itro. 19Kuwade ku kine kulia de yi idedeni adi yi a ti kulia ti to’diri, ’bo yi kilo itotogo’yu teiliko kaya kilo ku Ŋun i koŋoni‚ 20i naga ma teiliko kaya kilo ŋedyini kulia kaya kine a narona‚ igbonaga Ŋun a druma arodru teihko kaya kilona. ’Bo lepe adeni kuliata giri. 21Ŋutulu laga ma na nyadri kilo‚ kugbo teiliko kaya kilo ani ŋedya kulia kaya kine a naro‚ yi ’ba kuze ku Ŋun i koŋo yu. 22’Bo yi kilo rumbi kapa kilo giri laga ma yi magini kilo ku lepeni‚ ’dia gbo‚ adinyo kpe‚ igbonaga yi kilo sobu kukuzuki ti lepe kinena‚ yi kilo kondra ŋo laga ma lepe nyadrini ilo. 23Ina de a kukuzu na lepena adi ti yi rugini kari ti Yesu Kristo Ŋiro lo lepelo kine‚ ti yi nyare nya ’beri kaya dridriŋini be naga ma lepe takindri yi kukuzuna ina. 24Ŋutulu giri laga lo sobu kukuzuki ti lepe kine kilo‚ kilo saka ku lepe katani‚ lepe kasiko katani itro. Kuwade ku kine kulia de yi adeni adi lepe ilo saka kaya katani‚ ku Yuka Nakiye naga ma lepe tikindri yina.

will be added

X\