1 YOANE 2

1Ŋazi kuwe lo’di’diki kilo‚ na lo wurokindro ta kine kulia de ka’bi ta ku kondra toro. ’Bo kugbo le’de ŋutu laga akondra toro, Kalokoni lika kata, Yesu Kristo nye laga a ŋutu laga mŋgba laga lo ’dodru bo na kulia kaya kine ku Monyelo i koŋo yulo. 2Lepe a ’i’ile lo kukunani kulia ti torozi kaya kine, agbo’da torozi kaya kine ka’deloni, ’bo torozi ti ŋutulu laga i kani kilo giri itro. 3Kuwade, kugbo yi lo kondra kukuzuki ti lepe kine, yi lidra ’beri adi yi adeni lepe. 4Ŋutu laga lo kulia adi, “Na adeni lepe,” ’bo laga ani kondra kukuzuki ti lepe kine ilo, lepe a ’bureni, ’bo kulia ti to’diri kine ’bayi ku lepeni. 5’Bo ŋutu laga lo sobu kulia ti lepe kinelo, nyadru na lepe na Ŋun ina aromoki soso ku lepe katani a ’diri. Ku kine kulia de yi lidra ’beri adi yi kilo gbo ku Ŋun katani. 6Ŋutu laga lo kulia adi nye saka ku Ŋun katani ilo, ti lepe woroni be naga ma Kristo kazu woronina. 7Ŋutulu laga ma na nyadri kilo, na agbo’da wurokindro ta kukuzu naga a naluduni, ’bo kukuzu na ’bero naga atiki ta i suluki yuna. Kukuzu na ’berona nye na gbo a kulia naga ma ta yingi kine. 8’Bo kpe, na lo wurokindro ta kukuzu naga a naludu, naga mŋgba ku Kristo katani, kasu katani itrona, igbonaga mudena ina rorosodru ina, ’bo parara naga mŋgbana ina momo’yu. 9Ŋutu laga lo kulia adi nye ilo i pararana katani, ’bo laga lo ŋmoza luŋase lonye a loro ilo, ’diza ilo gbo i mude katani. 10’Bo ŋutu laga lo nyadru luŋase lonyelo ilo, nye lo saka i pararana katani, ’bo ku lepe katani kumu lo pupugo pupugo ’bayi. 11’Bo ŋutu laga lo ŋmoza luŋase lonye a loro ilo, nye lo gbo i mude katani, lepe lo woro i mude katani itro, lepe aku de piri naga ma nye utini nu, igbonaga mudena a’di konye ti lepe kilo kaŋo ina. 12Na lo wurokindro ta laga a ŋazi lo’di’diki kilo, igbonaga torozi kasu kine a’diya ku kulia ti kari ti lepe kine ina. 13Na lo wurokindro ta laga a monyezi kilo, igbonaga ta adeni lepe lo ŋiyu i suluki yu lu ina. Na lo wurokindro ta laga a ’bula kilo, igbonaga ta atiga ŋutu lorolo ina. 14’Bo na awurokindro ta laga a ŋazi kilo, igbonaga ta adeni Monyelo na. ’Bo na awurokindro ta laga a monyezi kilo, igbonaga ta adeni lepe lo ŋiyu i suluki yu lu ina. ’Bo na awurokindro ta laga a ’bula kilo, igbonaga ta gbo ku teriŋi, kulia ti Ŋun kine kine saka kasu katani, ta atiga ŋutu lorolo ina. 15Ku nyanyarita ina ka de, ku kapazi laga i kani kilo itro. Kugbo le’de ŋutu laga anyari ina ka de, nyadru na lepe na Monyelo ina ’bayi ku lepeni. 16’Bo kapazi giri laga i kani kilo, ki’beŋa ti mugu, kuwa ki’beŋa ti konye, kuwa sisinga na mugu ku kapazi ti ina ka de kilona agbo’da a ti Monyeloni, ’bo a ti ina ka de. 17Ina ka de ina rorosodru ku ki’beŋa ti lepe kine‚ ’bo ŋutu laga lo kondra be naga ma Ŋun nyadrininalo nye lo isaka paratra paratra. 18Ŋazi kilo‚ ina de gbo’di a ’dute na baŋe. Ta ayinga adi miriku lo Kristolo ipopondra, ’bo mero laga rodri ti Kristo kilo gbo’di ayeŋundra azo. Ku kine kulia de yi adeni adi ina de a ’dute na baŋe. 19Ko alupodru kaŋo kayani, ’bo agbo’da a ŋutu kayani. Kedri kodro ku ko a ŋutu kaya, kedri kodro ko isaka ku yi kugele. ’Bo koŋa alupodru kaŋo i kpeza adi ko giri agbo’da a ŋutu kayani. 20’Bo laga ta, Yuka Nakiye na Kristona kazu amoga ta, ’bo ta giri adeni kulia. 21Na lo wurokindro ta, agbo’da adi ta aku de kulia ti to’dirini, ’bo adi ta adeni kulia ŋani kine, ’bo ta adeni adi kulia ti to’bure kine ’bayi i kulia ti to’diri kine kata yu. 22Ŋa laga a ’bureni, ŋolo a ŋutu lo renya adi Yesu agbo’da a Kristoni ilo? Ilo ŋutu de a miriku lo Kristo lo renya ku Monyelo seku Ŋirolo itrolo. 23Ŋutu gele gele laga lo renya Ŋirolo ani gbo’da ku Monyelo. ’Bo ŋutu lo rugo Ŋirolo gbo ku Monyelo itro. 24Kulia naga ma ta yingi ŋiyu i suluki yu kine ti sakani kasu katani. Kugbo kulia ŋani kine kine saka kasu katani, ta isasaka ku Ŋirolo katani, ku Monyelo katani itro. 25Ilo de a sare laga ma lepe sarakindri yilo, ŋolo a ru naga ani lengana. 26Na awurokindro ta kine kulia de ku kulia ti ŋutulu laga kodro lo nyadru ’bo’boliza ta kilo. 27’Bo kugbo Yuka Nakiye na rio ta ku Kristo yuna ina saka kasu katani‚ ta ani miyundro le’de ŋutu i togo’yu na ta. ’Bo Yuka Nakiye ŋanina ina togo’ yu ta i kuliata giri‚ lepe a lo to’diri, agbo’da a ’burenini. Be naga ma lepe togo’ini tana‚ sakanita ku lepe katani. 28’Bo tinade‚ ta laga a ŋazi laga lo ’di’diki kilo‚ sakanita ku lepe katani‚ ma yi ku gbo’da ’ba kuze lu lepe laga apuru‚ ka’bi yi ku gbo’da ku yukuwe ku lepe i koŋo yu‚ i pondra na lepe nu. 29Ku ta laga adeni adi lepe a ŋutu laga mŋgbalo deneta adi ŋutu gele gele lo kondra kulia naga soso kinelo ayuŋe ku lepe.

will be added

X\