1 KORINITO 7

1Nyenaga ku kulia naga ma ta wudyini kine‚ kugbo ŋutulo laga aku lundra noka, a na’bu. 2’Bo ku kulia ti konye lopi kine‚ ŋutulu giri gele gele ti gbo’dini ku wate kase kine‚ wate giri gele gele ti gbo’dini ku lalia kase kilo. 3Ti lalelo tikindri mugu nanyena ku noka nanyenani‚ ti nokana tikindri mugu nanyena ku lale lonyeloni de itro. 4Nokana ani gbo’da a mata na mugu nanyena, ’bo lalelo nye lo gbo. ’Bo‚ lalelo ani gbo’da a mata lo mugu nanyena‚ ’bo nokana nye na gbo. 5Ku reredrata ’beri‚ kugbo ta akondra de, kukuneta kulia ŋani kine kasu dridriŋini ku baŋe a naŋutru‚ ma ta tikindra ’beri i magu na Ŋun. ’Bo i bo ŋanina tomodyita ’beri kugele ’do‚ Satani ka’bi ku luluga ta igbonaga ta ’ba teiliko lo payini kulia ti mugu ina. 6Na tazu kine kulia de be naga arukoki na i tazuna‚ agbo’da ku kukuzunani. 7Na kodro nyadru ŋutulu giri ti gbo’dini be na‚ ’bo ŋutulu giri gele gele gbo ku ’doketa kase laga ma Ŋun tikindri kilo‚ le’delo ku lo ’doke de‚ le’delo ku lu ’doke de. 8Na takindra ŋutulu laga aku lundra kilo ku awuzio kine adi ku ko laga saka be na‚ a na’bu. 9’Bo ku ko laga ’ba teiliko lo payini kulia ti mugu kine ti ko lundri ’beri‚ igbonaga gbo’da naga ku nokana a na’bu arodru kobu na mugana. 10Na tikindra ŋutulu laga alundra kilo ina kukuzu de, agbo’da na lo kuliani‚ ’bo Matalo‚ adi nokana ka’bi ku totokoru mugu seku lale lonyelo. 11’Bo ku lepe naga atokodya mugu‚ ti lepe sakani ’ba lale‚ kuwagi ti lepe yitozini bo i mora seku lale lonyelo, ’bo lalelo ka’bi ku ririkoro noka nanyena. 12Na takindra ŋutulu ku’de kilo‚ agbo’da Matalo lo kuliani, adi ku le’de luŋase laga ku noka naga aku rugo Matalo‚ kugbo noka ŋanina naga arugo saka naga seku lepena, lepe ka’bi ku ririkoro. lepe. 13Kugbo ne’de noka naga ku lale laga aku rugo Matalo, kugbo lale ŋanilo laga arugo saka naga seku lepena, lepe ka’bi ku kokoloki lepe. 14’Bo lale laga aku rugo Matalo atokela ku kulia ti noka nanyena kine, ’bo noka naga aku rugo Matana atokela ku kulia ti lale lonyelo kine‚ Kedri kodro kugbo ani gbo’da de, kedri kodro ŋazi kasu kilo igbo’da ’ba kekeli, ’bo ko a lokiye gbo’di. 15’Bo kugbo ŋutu laga aku rugolo laga anyadru tokodya na ’beri‚ ti ko tokodyi ’beri. Kugbo gbo de luŋaselo kuwa sasena aku tora ku kukuzuna, igbonaga Ŋun alungu ta i gbo’da ku teili lo trotro. 16Nokana, do idendra adi do iriritundro lale lolulo adidinyo ya? Lalelo, do idendra adi do iriritundro noka nonuna adidinyo ya? 17’Bo ti ŋutulu giri gele gele sakani be naga ma Matalo korakindri ko ’doketana‚ be naga ma Ŋun lungi kona. Na bita tazu ina kukuzu de i tomoresi ti karuko kilo giri katani. 18Ŋutu laga ataaro kuwa aluŋu‚ lepe ka’bi ku ŋiŋinyi meriko na lepe na taarona. Ŋutu laga aku taaro kuwa aluŋu‚ lepe ka’bi ku gaga taarona. 19Taarona a ’busa‚ ku do aku taaro ’do‚ a ’busa‚ ’bo kona na kukuzuki ti Ŋun kinena nye naga mŋgba. 20Ti ŋutu gele gele sakani be naga ma lepe kazu luŋenina. 21Kazu mo do luŋenina‚ ki do a upiye ya? Kulia ’bayi. ’Bo kiko lo lakundri do mugulo kuwa ayeŋundra‚ lakundri mugu. 22Ŋutu laga aluŋe ku Matalo katani ti lepe a upiye‚ lepe alake ku Matalo katani. ’Bo ŋutu laga aluŋe ti lepe alakelo, ŋutu ŋanilo a upiye lo Kristo. 23Ta agbore ku gbore. Ku gbogbo’data a upi ti ŋutulu kilo. 24Kuwade luŋaseri, ti ŋutu gele gele sakani ku Ŋun be naga ma lepe kazu luŋenina. 25Ku kulia ti ke’diti naga inga aku lunya kine, Matalo aku tikindra na kukuzu, ’bo na kulia ku yoyolozu niona be ŋutu laga ku teili lo to’diri ku ediyo lo Matalo. 26Na rambu adi ku kulia ti dreliesi ti ina baŋe de kine, igbo’da a na’bu ti ŋutulo sakani ’duu be naga ma lepe gbo’dinina. 27Do atora ku nokana ya? Ku gaga lakadru na mugu. Do gbo ’ba noka ya? Ku gaga noka. 28’Bo kugbo do laga alundra noka, do aku kondra toro tro. ’Bo kugbo ’diye naga na lulunyana, lepe aku kondra toro tro. ’Bo ŋutulu lo kondra de kilo irurumbi sasanya, ’bo laga na kodro nyadru gokindra ta ina sasanya de. 29Trugo adi, luŋaseri, ina baŋe de akoloki a ŋaŋutru. Ŋiyoro tinade ti ŋutulu laga ku wate kilo gbo’dini be naga ma ko gbo’dini ’ba watena. 30Ŋutulu lo gbigbiye kilo ti gbo’dini be laga ani gbiye kilo. Ŋutulu lo nyonyola kilo ti gbo’dini be laga ani nyola kilo. Ŋutulu laga lo gbodru kapazi kilo ti ko gbo’dini be naga ma ko gbo’dini ’ba kapazina. 31Ŋutulu laga lo kondra kita ku kapazi ti ina ka de kilo, ti ko gbo’dini be ŋutulu laga ani kondra kita kilo, igbonaga gbiyeri lo ina ka delo ilelenga ina. 32Na nyadru teiliko kasu kilo ka’bi ku ’do’do ’do’do. Ŋutu laga ’ba nokalo ’delakindra teili i kulia ti Matalo kine kini, adi ma nye tikindra Matalo nyola. 33’Bo ŋutu laga ku nokalo ’delakindra teili i kulia ti ka kine kini, adi ma nye tikindra noka nanyena nyola‚ 34’bo teili lo lepelo atokodya mugu. Noka naga ’ba lalena kugbo ’diye naga inga aku lunyana ’delakindra teili i kulia ti Matalo kine kini‚ adi ma nye gbo’di a nakiye i mugu katani ku i yuka katani itro. ’Bo ŋutu naga ku lalena ’delakindra teili i kulia ti ka kine kini‚ adi ma nye tikindra lale lonyelo nyola. 35Na kulia de i logu na ta. Agbo’da i moniza na nekerezi kasu murutonini‚ ’bo na nyadru adi ki ta kondra kulia na kpekpele, ki ta tikindra ’beri ku Mataloni ku teili gele. 36Ku le’de ŋutu laga arambu adi nye ani kondra a lo’bu ku ’diye nanyenani, ku ’diye ŋanina naga a golo‚ ’bo ti kulia ŋani kine gbo’dini de‚ ti lepe kondri be naga ma nye nyadrinina, ani gbo’da a toro‚ ti ko lundrini ’beri. 37’Bo ŋutu laga lo lira tritri kanye teilini laga aku ri’diki, lo gbo’da ku teriŋi i kondra na ŋo laga ma lepe nyadrinilo, laga lo yo’yu kanye teilini i riridra na ’diye nanyenalo, lepe ikondra a lo’bu. 38Kuwade ŋutu laga lo tikindra ’diye nanyena i lunyalo akondra a lo’bu, ’bo ŋutu laga aka tikindra lepe i lunyanilo ikondra a lo’bu alangu. 39Kukuzuna atodya nokana kugele seku lale lo lepelo i baŋe naga ma lalelo gbo’dini zoruna. Kugbo lalelo laga atuwa, noka ŋanina roromoki utu i lale le’de, be naga ma lepe nyadrina, ’bo ku Matalo katani ka’delo. 40’Bo kuwe rambuni lepe gbo ku koŋo na’bu arodru ku lepe naga saka be naga ma lepe gbo’dinina. ’Bo na rambu adi na gbo ku Yuka na Ŋun ina.

will be added

X\