1 KORINITO 5

1A ’diri kulia kine akuu adi konye lopi kata kasu dridriŋi yu, ’bo kilo konye lopi de aku rie ku Monyazi kilo i dridriŋini tro, adi le’de ŋutu gbo ku noka na monye lonyelona. 2’Bo ta pupudya ’beri ku kine kulia de ya? Angu kodro a na’buna gbiyenita gbiye ayu. Ŋutu laga akondra delo ti lepe telazini kaŋo kasu dridriŋini. 3’Bo laga na, ’dibani kodro ku mugu niona ’bayi kasuni de kpe‚ na gbo kasi ta i yuka kata, ’bo be naga ma na kodro gbo’dini kasi ta ku muguna, na aŋedya kulia ti ŋutu laga akondra delo 4ku kari ti Mata Yesu kine azo. Ku ta laga atunundra ’beri, ti yuka niona gbo kasi ta kugele, ku teriŋi na Mata lika Yesuna itro, 5tikindrita lu ŋutu de ku Satani i kenini, i tukarakindra na ki’beŋa ti mugu na lepena ma yuka na lepena ku rite i luŋa lo Mata lu. 6Pudya nasu na ’berina ani gbo’da a na’bu. Ta aku de adi kape laga ’baziŋa kilo toyukundro mugati kine giri ya? 7’Dumarata kape laga a ti ’bero kilo kaŋo, ma ta gbo’da be mugati naluduko naga ’ba kape kine, be naga ma ta lepe gbo’dini ’ba kapena. ’Bo tore lo kebilito lika laga a Rosetolo a’i’ilaniki azo, ŋolo a Kristo. 8Kuwade ti yi sopo so kolo drumana, agbo’da ku kape laga a ti ’bero laga a ti teili loro kuwa kulia naro kiloni, ’bo ku mugati naga ’ba kape‚ naga ’ba toŋulupa, naga a ti to’diri itro kine. 9Na kazu awurokindro ta i waraga niona kata yu adi ka’bi ta ku totomoru ’beri ku ŋutulu laga lo kondra konye lopi kilo. 10Ani gbo’da ŋutulu ti ina ka de lo kondra konye lopi kiloni‚ kuwa laga a ti roŋgbo kilo, kuwa kariaka kilo, kuwa laga lo teminizo muloko laga a ’busa’ busa’ kilo. Kugbo gbo de nyadru ti ta lupodri kaŋo i ka ŋanina kata yu. 11’Bo na awudyo de adi ka’bi ta ku totomoru ’beri ku ŋutu lo lungu mugu a luŋase ku Kristo katani‚ laga lo kondra konye lopi bitalo, kuwa lo budrulo, kuwa lo teminizo muloko laga a ’busa ’busa kilolo, kuwa laga a ka’datanilo, kugbo a kameranilo, kuwa a kariakanilo, ka’bi ta ku nyonyosu ku ŋutulu ŋani kilo kugele tro. 12Ŋera na kulia ti ŋutulu laga kaŋo kilo ani gbo’da a kulia kuwe. Laga ta ŋereta kulia ti ŋutulu laga i tomore na karukona katani kilo. 13Ŋun a kaŋerani lo kulia ti ŋutulu laga kaŋo yu kilo. Rikorota ŋutu lorolo kasu dridriŋini kaŋo

will be added

X\