1 KORINITO 4

1Keneta yi beti kakita ti Kristo laga a katiyu ti kulia naga na mumuyi mumuyi ti Ŋun kine. 2’Bo‚ nyadru katiyu kilo ti rieni ku teiliko ti to’diri. 3’Bo ku ta laga alilikindra na kulia‚ kugbo ku’de ŋutulu laga alilikindra na kulia itro‚ kine de a kulia naga ’bazi koru kuweni. A ’diri na ani lilikindra mugu kulia. 4’Bo ku na aku de kulia na sosoyi sosoyi kuwe muguni kine‚ kine kulia de ani kenani na ’ba kulia. Mata laga a kaŋerani lio lo kulia. 5Kuwade ku ŋeŋerita kulia ti le’de ŋutu ti inga luŋalo aku yeŋundra‚ ti inga Matalo aku yeŋundra. Lepe itotolupu kulia naga a’dana i mudeni kine kaŋo i parara‚ ’bo lepe ikpekpeza lopeteki laga ku ŋutulu i teliko yu kilo. I lu luŋa de ŋutulu giri gele gele irumbi ku Ŋun yu kulia na soponi se kine. 6Luŋaseri, na alopugo kine kulia de kayani‚ yi seku Apolo‚ ku kulia kasu kine‚ ma ta dendri ku kiko laga kayanilo adi‚ ‘Ka’bi ta ku rodru kulia na wuworo kine.’ Le’de ŋutu kasu dridriŋini ka’bi ku pupuru pupuru mugu ku kulia ti le’de ŋutu ti lepe arambu ŋutu le’de a ’busa. 7Inyo lo tikindra do gbo ka’de ya? Ŋo laga a inyo laga a loluŋa‚ laga aku ’dokani do ya? Ku do laga a’doka ku ŋo ŋanilo‚ do pudya mugu beti ŋona lepe ani gbo’da a ’doke gbandra ya? 8Tinade ta ayiyimotu azo‚ ta ayeŋundra a korineko azo ya? ’Dibani kodro agbo’da kulia kayani kpe, ta ayeŋundra a mataki ya? Kedri kodro ku ta lo ’deba tumatana, a na’bu koru, ma yi ku ’deba kasi ta kugele. 9’Bo kuwe yo’yuni, Ŋun akpeza yi a lososonyo‚ be ŋutulu ti bo kilo‚ be ŋutulu laga aŋeraki tuwa kilo‚ igbonaga yi ayeŋundra i kani be ŋo laga ma malaika kilo ku ŋutulu kilo gogorozi ilo ina. 10Laga yi mamali ku kulia ti Kristo kine‚ ’bo laga ta gbo ku tobodo ku Kristo katani. Laga yi ’ba teriŋi‚ ’bo laga ta gbo ku teriŋi. Laga ta sosopo‚ laga yi ani sopo. 11Yeŋundra tozo ilo luŋa de yi gbo ku mago‚ ku kure na pio‚ bongola kaya kine aku romo‚ yi a’bito‚ yi ’ba piri naga a sakayeta. 12Yi atrereka kitazi naga ma yi kondri ku kenisi kaya kilo kine. Kugbo yi laga momoroyi momoroyi‚ yi tikindra koŋo na’bu. Kugbo yi laga wowonye wowonye, yi gbo ku teiliko logo. 13Kugbo ko laga akulia adi yi a loro‚ yi druga teyitokindro ko kutu na’bu. Yi ayeŋundra be korodo ti ka yeŋundra tozo tinade‚ beti mundri ti kapazi giri. 14Na ani wudyo kine kulia de i tikindra na ta yukuwe‚ ’bo i tepizo na ta be na ŋazi laga ma na nyadri kilo. 15’Dibani kodro ku ta laga ku katodino ku Kristo katani alipuki de kpe‚ monyezi kasu kilo ani gbo’da rodri, igbonaga na lepe ayuŋundro ta ku Kristo Yesu katani ku kulia ti kuu na’buna kine ina. 16Kuwade na ma’yu mugu ku ta, gbo’dita a kamira kuwe kilo. 17Ku kine kulia de na asunyukindro ta Timoteo, laga a ŋiro lio laga ma na nyadri, laga ku teili lo to’diri ku Matalo katanilo. Lepe itotoyuluki ta gbiyeriki kuwe laga ku Kristo katani kilo, be naga ma na togo’i ko mu pirito i tomoresi ti karuko kilo giri i dridriŋi yuna. 18Ku’de kilo ŋutulu pupudya ’beri adi ŋona na aka utu kasu yuni. 19’Bo na itutu wuleŋa gele kasu yu ku Matalo anyadru. Na idedeni teriŋi na ŋutulu laga lo pupudya ’beri kilo ina, agbo’da kulia kasiko na tatayi kineni. 20’Bo tumata na Ŋun ina ani gbo’da a kulia na tatayi tatayi kineni, ’bo a teriŋi. 21Ta nyadru inyo ya? Ki na utuni kasu yu ku keli, kuwa ku nyadru, ku teili lo mada ya?

will be added

X\