1 KORINITO 3

1’Bo luŋaseri‚ laga na‚ na ani romoki takindra ta kulia kine be na ŋutulu laga ku Yuka Nakiyena kilo‚ ’bo be ŋutulu ti gbiyeri lo mugu‚ be ’u’uŋweta ku Kristo katani kilo. 2Na ato’dudyo ta ku le‚ agbo’da ku nyosu naga nagoni‚ igbonaga ta inga ani romoki‚ ’bo yeŋundra tozo tinade ta aku romoki. 3’Bo ta gbo ’duu be ŋutulu ti gbiyeri lo mugu. Kugbo ta gbo ku yuma ku rerenya kasu dridriŋini, ta ani gbo’da be ŋutulu ti gbiyeri lo mugu‚ laga lo kondra be ku’de kilo ŋutulu ya? 4Kugbo le’delo akulia adi‚ “Laga na a lo Paulo‚” ku le’delo adi‚ “Laga na a lo Apolo‚” ta ani gbo’da be ŋutu ti ka kilo ya? 5Kuwade Apolo a ŋa? Paulo a ŋa? Yi a kaloko ti Ŋun lo tikindra ta i rugo kilo. Yi gele gele lo kondra kita be naga ma Matalo tikindri yina. 6Na kazu a’udru nyomo kilo‚ Apolo druga ruruzu ku pio kine‚ ’bo Ŋun lo tikindra ’dudyona. 7Kuwade ka’utunilo seku karuruyini lo piolo ko mure katru a ’busa‚ ’bo Ŋun lo tikindra ’dudyonalo laga mŋgba. 8Ka’utunilo seku karuruyini lo piolo gbo a ŋo logele‚ ko gele gele irurumbi ropeta kase kilo be kita nasikona. 9’Bo yi a kakita lo kita kasi Ŋun kugele. Ta a melesi na Ŋun. Ta a kadi naga ma Ŋun ’duginina itro. 10Ku naga ma Ŋun tikindri na ’doke laga ku ’busa na’bu ina, na a’delakindra muko na kadina be ka’dukoni druma laga ku tobodo. Ŋutu le’de a’dugo kadina kini. Ŋutu gele gele ti gbo’dini ku konye i ’dugo nanye na kadina i muko ŋanina kini. 11Le’de ŋutu ani romoki ’delakindra muko ne’de na kadina uye‚ ŋolo a muko naga a’delakina ŋolo a Yesu Kristo ka’delo. 12’Bo ku le’de ŋutu ’dugo i ki na muko na kadina ku drumo, kuwa riye, kuwa ŋoropo naga ku gbore naga kina‚ kuwa mbau‚ kuwa kudi, kuwa gomo‚ 13kita na ŋutulu giri gele gele ikpekpeza mugu. Luŋa lo Kristolo lo itopurundro lepe igbonaga lu luŋa de ikpeza mugu ku kima ina. Kima ŋanina imomodyu kita na ŋutulu giri gele gele kuwa gbo adidinyo. 14Kugbo kita na le’de ŋutu naga ma lepe ’dugi i ki na mukonana naga ayeŋo‚ ŋutu ŋanilo irurumbi ropeta. 15’Bo kugbo kita na le’de ŋutu naga anoka kaŋo‚ lepe itetelikindro kapazi kanye kilo‚ ’bo lepe ku mugu irite ’bo ku kiko laga i kima katalo. 16Ta aku de adi ta a kadi na Ŋun, ’bo adi Yuka na Ŋun ina ina saka kasu katani ya? 17Kugbo le’de ŋutu laga akokorozu kadi na Ŋun ina‚ Ŋun lepe itutukaraki ŋutu ŋanilo‚ igbonaga kadi na Ŋun ina a nakiye nakiyena. Laga ta a nu kadi de. 18Le’de ŋutu ka’bi ku ’bo’boli ’bo’boli mugu. Kugbo le’de ŋutu kasu dridriŋini lo yo’yu adi nye gbo ku tobodo i ina baŋe de, ti lepe yeŋundri a mali mali, ma lepe yeŋundri ku tobodo. 19’Bo tobodo na ina ka dena a kulia ti mali ku Ŋun i konyeni, ’bo awuro adi, “Lepe momoga bodoki kilo ku totore nasikona.” 20’Bo ’do adi, “Matalo adeni rambuzi ti bodoki kine adi ko a ’busa.” 21Kuwade le’de ŋutu ka’bi ku pupuru pupuru mugu ku ŋutu‚ igbonaga kapa kilo giri a kasu ina‚ 22kugbo Paulo‚ kugbo Apolo‚ kugbo Kefa‚ kugbo na ka de‚ kugbo ru‚ kugbo tuwa‚ kugbo kuliata ti tinade kine‚ ku naga ŋero yu kine‚ ko giri a kasu. 23Laga ta a ti Kristo‚ ’bo Kristo a lo Ŋun.

will be added

X\