1 KORINITO 16

1Nyenaga ku kulia ti tuna na ’doketa i logu na ŋutu ti Ŋun kilo, beti naga ma na takindri tomoresi ti karuko ti Galatia kilo kukuzuna kazuna, koneta de ’do. 2I luŋa laga a kayo lo sabiti ilo ti ŋutulu giri gele gele ’delakindri kapatio le’de i merete be naga ma lepe rumbini a rezema ina, ka’bi ’doketa kilo ku tutuna i luŋa laga ma na ku yengi lu. 3Kugbo na laga ayeŋadru, na isonyodru ŋutulu laga ma ta nyumundri kilo ku waraga, ma ko ku zonga ’doke lasulo Yerusalema yu. 4Kuwa apuru a na’bu adi ti na uti itro‚ yi itu kasi ko kugele. 5Na iutu kasu yu ku na laga ayeŋadru Makedonia yu, igbonaga na ilaŋadru ku kiko lo Makedonialona. 6Ŋo laga de na i’du’duteki kasu yu, kugbo isasaka kasi ta i luŋa lo katiro lu, ma ta ku nyomodri na i kiko laga ma na utini lu. 7’Bo na ani nyadru medra na ta i kiko ka’delo, ’bo ku Matalo laga arugo‚ na yendru i si’da kasi ta ku baŋe a nazo. 8’Bo na i’duteki inide Efesoni yeŋadru tozo i luŋa lo Pentekosito lu‚ 9igbonaga na aŋaki koŋo gboŋa na konani kitana ina‚ ’bo kaguwa kilo rodri. 10Kugbo Timoteo laga ayeŋadru kasu yu‚ meteta lepeŋa a lo’bu kasu dridriŋi yu, igbonaga lepe lo konakindra Matalo kita beti naga ma na konakindrinina. 11Kuwade le’de ŋutu ka’bi ku ’da’dari lepe. ’Bo nyomodrita lepe i kiko yu ku teili lo trotro, ma lepe yiteni kuweni, igbonaga na lo momondru lepe ku luŋaseri kilo ina. 12Ku kulia ti Apolo laga a luŋaselo kine, na ama’yu mugu ku lepe adi ti lepe uti i wodru na ta ku luŋaseri ku’de kilo, ’bo lepe aku nyadru utu tinade. Lepe itutu kuwa arumbi koŋo. 13Gbo’dita ku konye, liranita tritri i rugo katani, gbo’dita ku teiliko logo, gbo’dita ku teriŋi. 14Konesi kasu kine giri ti konani ku nyadru. 15’Bo luŋaseri‚ ta adeni adi ŋutulu laga i ’ba lo Setefano kulu a nyomo ti Kristo laga lo trora a kayo Akaya kata yu kilo. Ko atikindra ’beri i konakindra na ŋutu ti Ŋun kilo kita. 16Na ma’yu mugu ku ta, sopeta so ŋutulu laga be kilo de kilo ku ŋutulu ku’de laga lo trereka kasi ko kugele kilo. 17Na anyola ku yeŋundra nasi Setefanona, seku Forutunato‚ ku Akaikona, igbonaga ko akondra kita naga ta aku konuna. 18Ko aru’ya teili liolo ku kasu kilo itro. Tikita ŋutulu laga be kilo de kilo ti denani dena. 19Tomoresi ti karuko ti Asia kilo aroma ku ta. Akula seku Pirisila ku karuko laga lo tomodya ’beri kasiko i ’bani kilo aroma ku ta koru ku Matalo katani. 20Luŋaseri kilo giri aroma ku ta. Rometa roma kasu dridriŋi yu ku rome lo nyadru na luŋaserilo. 21Na laga Paulo awudyo ilo rome de ku keni lio lepe. 22Kugbo le’de ŋutu aku nyari Matalo, ti lepe lomoni lomo. Marana tha! Trugo adi, Mata likalo pondri! 23’Busa na’bu na Mata Yesu ina ti si’dani ku ta. 24Nyadru niona ti gbo’dini ku ta ku Kristo Yesu katani. Amena.

will be added

X\