1 KORINITO 13

1Kugbo na adeni kutuzi ti ŋutulu kilo kuwa ti malaika kilo, kugbo na laga ’ba nyadru, kulia na ta na kine puru be luŋetre laga lo wowoŋu kugbo riye na totokiya. 2Kugbo na roromoki trukundro kulia ti Ŋun kine, kugbo na yuyulundro kuliata giri na mumuyi mumuyi kine ku dendrana giri, kugbo na laga ku rugo koru naga na romoki ’dotoni meriana, ’bo ku na laga ’ba nyadru, na a ’busa. 3Kugbo na ’doga ku kapazi kuwe kilo giri, kugbo na tikindra mugu niona i noka, ’bo kugbo na laga ’ba nyadru, rezema lio ’bayi. 4Nyadruna gbo ku teili lo mada, ku teili lo’bu itro. Nyadruna ’ba yule‚ ani sisinga mugu, ani pudya mugu tro. 5Lepe ani kondra ŋo laga ani zukilo. Nyadruna ani ga’yu kulia kanye lepe kine, lepe ani ŋoma, ani kendra torozi. 6Lepe ani nyola ku kulia naro, ’bo nyola ku kulia ti to’diri kine. 7Nyadruna ŋinga kuliata giri, rugo kuliata giri, yendru kuliata giri, gbo ku teili lo rile i kuliata giri katani. 8Nyadruna ani lenga tro. ’Bo truko na kuliana ilelenga. Tayi na kuliata ku kuliesi naga ka’de ka’de kine ikokolo. Dendrana ilelenga itro. 9’Bo dendra nikana ina a dridriŋi ka’delo. Trugo nika na kuliana ina a dridriŋi ka’delo. 10’Bo kugbo kuliata naga na romoki soso kine kuwa ayeŋundra, kuliata naga a dridriŋi kine ilelenga. 11Ma na gbo’dini kazu a ŋiroŋana, na kulia be na ŋiroŋana, na rambu be na ŋiroŋana, na yoyolozu be na ŋiroŋana. Kugbo na laga gbo’di a golo, na akolokindro kulia ti toŋiro kine. 12’Bo tinade yi kilo medra i maraya kata, ’bo ŋo laga ma yi medrilo ani puru soso, ’bo imoluluna yi imemedra ’beri konye i konye. Tinade dendra niona ina a dridriŋi ka’delo, ’bo imoluluna na idedeni soso beti naga ma Ŋun dendri nana. 13’Bo kuliata musala kine ini kata, se kine de rugona ku yendruna, ku nyadruna. ’Bo ŋo laga lo rodru ko girilo a nyadruna.

will be added

X\