1 KORINITO 12

1Nyenaga ku kulia ti ’doketa ti Yuka Nakiye kine‚ na nyadru deneta kine kulia de. 2Ta adeni adi i baŋe naga ma ta gbo’dini ’ba rugo nu‚ ta azoŋa i muloko laga a ’busa ’busa laga ’ba kutuzi kilo yu‚ be naga ma kuweto kasu kine ’dolazini nu. 3Ku kine kulia de‚ na todinikindro ta adi le’de ŋutu ’bayi lo tazu ku Yuka na Ŋun adi‚ “Yesu ti lomoni lomo.” ’Bo le’de ŋutu ’bayi lo tazu adi‚ “Yesu a Mata‚” ti lepe aku tazu ku Yuka Nakiyena. 4Nyenaga ’doketa kilo gbo ka’de ka’de‚ ’bo Yuka Nakiyena ina gele. 5Kona na kitana gbo ka’de ka’de‚ ’bo Matalo ilo gele. 6Teriŋi na konani kitana gbo ka’de ka’de‚ ’bo Ŋun lo tikindra ŋutulu giri gele gele teriŋi i kondra na kitalo ilo gele. 7Ŋurulu giri gele gele a’doka ku Yuka Nakiyena adi ma ko ku logini ŋutulu giri ’busa. 8Le’delo atiki tayi na kulia naga ku tobodona ku Yuka Nakiyena‚ ’bo le’delo atiki kulia na tayi naga ku dendrana ku Yuka nagelena. 9Le’delo atiki rugona ku Yuka nagelena‚ ’bo le’delo atiki ’doketa laga lo toruweni ŋutulu kilo ku Yuka nagelena. 10Le’delo atiki kona na konesi naga ku teriŋi kine‚ ’bo le’delo atiki truko na kulia ti Ŋun ina. Le’delo atiki tritrima na dridriŋita ti yukala kinena‚ ’bo le’delo tayi na kuliesi naga ka’de ka’de kinena, ’bo le’delo puputu na kuliesi kine. 11Kine kuliata de giri kona ku Yuka Nakiye nagelena, lepe korakindra ŋutulu giri gele gele be naga ma nye nyadrinina. 12’Bo be naga ma muguna gbo’dini gele ku dridriŋita rodrina, ’bo be naga ma dridriŋita ti mugu kine giri gbo’dini a mugu gele, ’dibani kodro ko naga rodri kpe ina, Kristo gbo de ’do. 13’Bo ku Yuka Nakiyena yi giri a’deba baputizi lo gbo’diniki a mugu gele, Yahudi kilo ku Monyazi kilo, upi kilo ku kumose ka kilo, yi giri atiki Yuka nagelena. 14Nyenaga muguna ani gbo’da ku dridriŋi gele, ’bo ku dridriŋita rodri. 15Mokolo kuwa kulia adi, “Na ani gbo’da a lo mugu igbonaga na ani gbo’da a kenina,” kine kulia de ani kpeza adi lepe ani gbo’da a dridriŋi na mugu. 16’Bo suwetalo kuwa kulia adi, “Na ani gbo’da a lo mugu igbonaga na ani gbo’da a koyita ina,” kine kulia de ani kpeza adi lepe ani gbo’da a dridriŋi na mugu. 17Kugbo muguna giri a konye, teriŋi na yingana irie ya ya? Kugbo muguna giri a suwo, teriŋi na ŋmwani kapazina irie ya ya? 18’Bo a ’diri Ŋun a’delakindra dridriŋita kine i mugu katani gele gele be naga ma nye nyadrina. 19’Bo dridriŋita kine giri kugbo a dridriŋi nagele, mugu naga mŋgbana ina irie ya ya? 20’Bo a ’diri dridriŋita kine rodri, ’bo muguna gele. 21Koyitalo ani romoki takindra kenilo adi, “Na ani miyundro do.” ’Bo kuwena ani romoki takindra mukuzi kilo adi, “Na ani miyundro ta.” 22’Bo dridriŋita ti mugu naga na puru be ’ba teriŋi kine, a dridriŋita ti kulia na lologu koru. 23’Bo dridriŋita ti mugu naga na puru be ’ba kuka kine, yi kuga ko koru. ’Bo dridriŋita naga ani kpele kine yi zubu ko. 24’Bo dridriŋita kaya naga na kpekpele kine ani nyadru zubu ŋanina. ’Bo Ŋun atomodya dridriŋita ti mugu kine kugele i kuga na dridriŋita naga ’ba kuka kine de arodru koru‚ 25ma kora na dridriŋita gbo’da ’bayi‚ ’bo dridriŋita ŋani kine ma ’delakindra teili i logu na ’beri kase dridriŋini ’busa. 26Kugbo dridriŋi gelena naga arumbi luŋuli‚ dridriŋita kine giri gbo ku luŋuli kugele. Kugbo dridriŋi gelena naga arumbi pura‚ dridriŋita kine giri nyola kugele. 27Laga ta a mugu na Kristona‚ ta giri gele gele a dridriŋita ti mugu ŋanina itro. 28Ŋun a’delakindra ŋutulu laga kilo de i tomore na karukona katani, a kayona lososonyo kilo, togi murena bodoki ti kulia ti Ŋun kilo, togi musalana katogolo kilo. I bo ŋanina kakona ti konesi naga ku teriŋi kine‚ ku ŋutulu laga ku ’doketa lo toruweni ŋutulu kilo, ku kaloko kilo, ku ka’dola ti kuweto kilo, ku kakulia ti kuliesi naga ka’de ka’de kine. 29Ŋutulu giri a lososonyo ya? Ko giri a bodoki ti kulia ti Ŋun kine ya? Ko giri a katogolo ya? Ko giri a kakona ti konesi naga ku teriŋi kine ya? 30Ko giri gbo ku ’doketa lo toruweni ŋutulu kilo ya? Ko giri tazu kuliesi naga ka’de ka’de kine ya? Ko giri a kapuputu ti kuliesi ya? 31’Bo ’delakita teiliko i ’doketa laga arodru kilo kini. ’Bo na kpekindra ta kiko laga a lo’bu arodru korulo.

will be added

X\