1 KORINITO 10

1Luŋaseri, na nyadru deneta adi merenyezi kaya kilo giri kulu i ’diko muko yu‚ ko giri alaŋandru suburi katani‚ 2ko giri a’deba baputizi lo tomorani ko kasi Mose kugele i ’diko ŋanina kata yu ku i suburi kata yu itrolo. 3Kara giri anyosu nyosu nagele na yukana. 4Kara giri amozu ŋo lo mamata logele lo yukalo. ’Bo ko amozu pio naga na lupundro i Ŋurupi laga a lo yuka lo kepodru bo nasikonalo‚ ilo Ŋurupi de a Kristo. 5’Bo Ŋun aku nyola ku kulia ti ŋutulu rodri kasiko i dridriŋini kine‚ kuwade opuo kasiko kilo a’do’do ka yu laralara i diŋo kata yu. 6Nyenaga kine kulia de a tepiyeta kayani adi ka’bi yi ku susuki konye i kulia naro kine kini be naga ma ko kazu sukindrina. 7Ku gbogbo’data a ŋutulu lo teminizo muloko laga a ’busa ’busa kilo be naga ma ku’de kilo ŋutulu kasiko i dridriŋini kazu gbo’dinina. Be naga ma wuronina adi, “Ŋutulu kilo druga gbi’diki ka i nyosu kuwa i mozu, druga ŋi ki i bibirotu.” 8Ka’bi yi ku kokonu towute be naga ma ku’de kilo kazu kondrina, ’bo ŋutulu alifu meria mure konye musala druga ’do’dorotu i luŋa gele. 9Ka’bi yi ku momoru Matalo be naga ma ku’de kilo ŋutulu kazu modyini lepena ’bo ko druga tutukaraki kaŋo ku munuo. 10Ku ngungurutota ngunguruto be naga ma ku’de kilo ngungurutonina druga ko tutukakaraki kaŋo ku Katukaranilo. 11Kine kulia de ayeŋundra kasikoni a kpiyeta, ’bo ko awuroki i togo’yu na yi laga ma ’dute na baŋena yeŋundri kayani kilo. 12Kuwade kugbo le’de ŋutu laga arambu adi nye ilo lira soso, ti lepe gbo dini go lepe ka’bi ku ’duki. 13Modru ne’de aku modyu ta ŋo kine modruzi naga bita na modyu ŋutulu giri kine. ’Bo Ŋun gbo ku teili lo to’diri. Lepe aka rukokindro ta i moro naga na tiga teriŋi nasunani. ’Bo i luŋa lo modrulo katani, lepe ikukunakindra ta kiko lo tulaŋazini talo adi ma ta tigi ku teili lo rile ’busa. 14Ku kine kulia de‚ ŋutulu laga ma na nyadri kilo‚ wokita kaŋo i teminizo na muloko laga a ’busa ’busa kilona. 15Na kulia ku ŋutulu laga ku tobodo kiloni. Lilineta kulia naga ma ma tazini kine. 16Drikeri naga ma yi magini pele na’buna kinina ani tikindra yi i ŋarundra na rima ti Kristo kine ya? Mugati naga ma yi gbegbenyezi kine ani tikindra yi i ŋarundra na mugu na Kristona ya? 17’Bo mugatina a nagelena kuwade‚ yi laga zore kilo a mugu gele‚ igbonaga yi giri ŋadyu mugati nagelena ina. 18Rameta kulia ti zuru lo Isiraeliko kine. Ŋutulu laga lo nyosu kapazi laga a ’i’ileta kilo ani tomodya ’beri i piri naga a ’i’iletana kata yu ya? 19Kuwade ma na kulia adinyo ya? Trugo adi ŋo laga a ’i’ile lo muloko laga a ’busa ’busa kilo ilo a ŋo laga mŋgba ya? Ŋona ŋo lo teteminiolo a ŋo laga mŋgba ya? 20’Bayi. ’Bo na adi ŋo laga a ’i’ile lo muloko laga a ’busa ’busa kilo ilo a ’i’ile lo dreria kilo‚ agbo’da a lo Ŋun ni. Na ani nyadru adi ti ta tomore ’beri ku dreria kilo. 21Ta ani romoki mozu i drikeri na Matana seku drikeri na dreriana. Ta ani romoki nyosu i mesa na Matana i kutuni ku i mesa na dreriana itro. 22Ŋona yi nyadru tikindra Matalo yule ya? Yi gbo ku teriŋi arodru lepe ya? 23Atayi adi‚ “Kukuzuna arugo kuliata kine giri.” ’Bo kuliata kine giri ani logu. Atayi ’do adi, “Kukuzuna arugo kuliata kine giri.” ’Bo kuliata kine giri ani toliriza ŋutulu kilo. 24Le’de ŋutu ka’bi ku gaga kulia kanye lepe kine‚ ’bo kulia ti le’de ŋutu kine ayu. 25Nyosunita kapa kilo giri laga lo togboro i piri na ’duŋoni lokorio nu. Ku pipita piyesi ku kulia ti dendra naga kasu teilikoni ina‚ 26igbonaga atayi adi‚ “Kana a na Matalo‚ ku kapazi giri laga lo zore katani kilo,” ina. 27Kugbo ŋutu laga aku rugo Kristolo laga alungu ta i nyosu, kugbo teiliko kasu kilo nyadru utu, nyosunita kapa giri laga a’delaki kasu koŋoni kilo. 28’Bo kugbo le’de ŋutu laga atakindra ta adi, “Ilo de atiki a ’i’ile,” ku nyonyota, ku kulia ti ŋutu lo trukokindro talo kine, ku kulia ti dendra naga ku lepe i teili yu ina. 29Agbo’da ku dendra nasu na teilikonani‚ ’bo ku dendra na lepe na teilina. ’Bo ta ipiza adi, “ ’Bo lake niona liliia ku dendra naga ku le’de ŋutu i teili yuna gbandra ya? 30Kugbo na laga anyosu kapa laga ma na tikindri iyete kilo, na ’da’datayi ku kapa laga ma na tikindri iyete kilo gbandra ya?” 31Kuwade kugbo ta laga kilo nyosu‚ kuwa mozu kuwa kondra kuliata giri, ’dia gbo adinyo kpe, koneta kuliata giri i pudya na Ŋun. 32Ku ’de’delakita kumu lo pupugo Yahudi kilo kuwa Monyazi kilo kuwa tomore na karuko ti Ŋun kilona, 33be naga ma na lepe ga’i tikindra ŋutulu giri nyola ku kuliata giri naga ma na kondrini kinena. Na ani ga’yu ŋo laga lo logu nalo, ’bo laga lo logu ŋutulu rodri ilo, ma ko riteni ’busa.

will be added

X\