1 KORINITO 1

1Paulo laga lo luŋu i gbo’da a lososonyo lo Yesu Kristolo be naga ma Ŋun nyadrini ina, seku Sositene laga a luŋase likalo, 2aroma ku tomore na karuko ti Ŋun laga Korinito yu kilo, ŋutulu laga atokela ku Yesu Kristo katani‚ lo luŋu i gbo’da a ŋutu ti Ŋun kilo ku ŋutulu giri i pirito giri lo lungu kari ti Mata lika Yesu Kristo kilo. Lepe a Mata lasiko ku lika itro. 3’Busa na’buna ku teili lo trotro lo ŋiyu ku Ŋun Monye likalo yu ku Mata laga Yesu Kristo yu itrolo ti gbo’dini ku ta. 4Na tikindra Ŋun liolo iyete mu luŋa ku ta‚ ku kulia ti ’busa na’bu na Ŋun naga ma lepe tikindri ta ku Kristo Yesu katanina. 5Bo ku lepe katani‚ ta ayeŋundra a korineko ku kuliata giri‚ kuliata na tatayi kine giri‚ ku dendrana giri itro. 6Be naga ma kulia ti Kristo kine toliriani tritri kasu dridriŋinina, 7kuwade ta ani yaŋa ku ’doketa ti Yuka Nakiyena kilo tro, i naga ma ta mondrini luŋa lo kpezini Mata lika Yesu Kristo mugu nu. 8Lepe itoliriza ta tritri yeŋadru tozo i ’dute yu‚ ma ta ku rieni ’ba kulia naga na sosoyi sosoyi kasu ’berini i luŋa lo Mata lika Yesu Kristo lu. 9Ŋun gbo ku teili lo to’diri‚ ’bo lepe alungu ta i tomodya na ’beri ku Ŋiro lo lepe laga a Mata lika Yesu Kristo. 10Na ma’yu mugu ku ta luŋaseri, ku kari ti Mata lika Yesu Kristo kine‚ adi taneta kulia nagele‚ ka’bi ta ku kokora, ma ta tomorani kugele ku teili logele, ku yoyolozu nagele itro. 11’Bo luŋaseri kuwe kilo, ŋutu ti Kiloe kilo atrukokindro na adi rerenya kata kasu dridriŊini. 12Trugo adi ŋutulu giri gele gele kasu dridriŋini kulia ka’de. Le’delo adi‚ “Laga na a lo Paulo‚” le’delo adi‚ “Laga na a lo Apolo‚” le’delo adi‚ “Laga na a lo Kefa‚” ’bo le’delo adi, “Laga na a lo Kristo.” 13Kristo akodya mugu ya? Paulo a’beko ku ta i kedini mugu ya? Ta a’deba baputizilo i kari ti Paulo kine ya? 14Na gbo ku iyete igbonaga na aku tikindra le’de ŋutu kasu dridriŋini baputizilo ŋo kilo ku Kirisipo seku Gayo ’du, 15ka’bi le’de ŋutu ku kulia adi ta a’deba baputizilo i kari kuwe kine. 16’Bo na atikindra ŋutulu laga i ’ba lo Setefano yu kilo baputizilo. ’Bo na aku de ŋona na atikindra ŋutu le’de baputizilo. 17Kristo agbo’da sunyundro na i tikindra na baputizini‚ ’bo i trugo na kuu na’buna, agbo’da ku tobodo na kulia na tatayini, ka’bi kedini laga a larelo lo Kristolo ku yeŋundra a ’busa. 18Nyenaga kulia ti kedini laga a larelo kine puru beti kulia ti mali ku ŋutulu laga lo kakaraki kiloni‚ ’bo ku yi laga lo ririte kilo lepe a teriŋi na Ŋun ina. 19’Bo awuro adi‚ “Na itukarakindra tobodo na bodoki kilona‚ ’bo na tikindra totore na ŋutu ti totore kilo ti yeŋundri a ’busa.” 20Kuwade bodolo ilo ya ya? Katogoloni lo kukuzunalo ilo ya? Karerenyani lo ina baŋe delo ilo ya? Ŋun aku tikindra tobodo na ina ka dena ti gbo’dini be ŋo lo mamaliniki ya? 21’Bo ku tobodo na Ŋun ina‚ ŋutu ti ka kilo aku de Ŋun ku kiko lo tobodolo, kuwade a na’bu ku Ŋun i konyeni i ritundro na ŋutulu lo rugo kilo ku kiko lo kulia naga ma yi trugi naga na puru be mali ilo. 22’Bo Yahudi kilo nyadru kpiyesi. Giriki kilo ga’yu tobodo‚ 23’bo laga yi trugo kulia ti Kristo laga a’beko i kedini mugulo kine. Kulia ŋani kine puru be ŋo lo pupugo ŋutululo ku Yahudi kiloni‚ be ŋo lo mamaliniki ku Monyazi kiloni‚ 24’bo ku ŋutulu laga lo luŋu kilo‚ Yahudi kilo ku Monyazi kilo, kine kulia de a Kristo laga a teriŋi na Ŋun ina ku tobodo na Ŋun ina. 25Kulia na puru beti mali na Ŋun kine arodru tobodo na ŋutuluna, ’bo kulia na puru beti tomunye na Ŋun kine arodru teriŋi na ŋutuluna. 26Luŋaseri‚ yoleta luŋu nasuna. Ŋutulu kasu dridriŋini laga ku tobodo na ina ka dena, kuwa laga ku teriŋi kilo‚ kuwa laga lo yuŋele a ŋazi ti ŋutu drumala kilo‚ ko giri ’baziŋa. 27’Bo Ŋun anyumundro mali na ina ka dena i tikindra na bodoki kilo yukuwe. Ŋun anyumundro ŋo laga ’ba teriŋi ti ina ka de kilo i tikindra na ŋo laga ku teriŋi kilo yukuwe. 28Ŋun anyumundro kulia naga a ’busa ’busa ti ina ka de kine‚ naga na ’da’datayi ’da’datayi kine, naga inga ’bayi kine, ma nye bulo ku ’delakindra kulia naga kata kine a ’busa ’busa. 29Kuwade le’de ŋutu ka’bi ku pupuru pupuru mugu ku Ŋun i koŋoni. 30Ŋun lo tikindra ta i gbo’da ku Kristo Yesu katani. Ŋun lo ’delakindra Kristo a tobodo nika, ’bo ku lepe katani yi akena mŋgba ku Ŋun i konyeni, yi atokela, yi adake‚ 31Kuwade be naga ma wuronina adi‚ “Ŋutu laga lo pupudya mugulo‚ ti lepe pupure mugu ku kulia ti Matalo kine.”

will be added

X\