1 Yesuusi Kiristoosichi maddacho, Yaaqoobichi manoo Yihudi taane. Nihoo Yeeri shunnitina'onaa ceeggitina'onoyich, Yesuus Kiristoosina quyee beeti kittinneena'o bullich 2 Yeerichi ariqqoonaa diggoona, bi shunoo ittoshich woddabe. 3 Ta shunachina'ote! No qoodee beeti wodeechon ittoshich kooroyich oogati gabee toommooch beechaa, Yeeri bi yaafiti asheena'oyich ikka kaalloon bi immiti, shaddeyaani mishiraachee qaaroyich ittoshi qiiccemmoyich, ittoshin ciicciibee kaataa kooroo taach qaawii beeto tunaqqi bekkahe. 4 Ikkikka asheena'o ittoshi daggooch shokiibee giyitina'one; hukkachina'o tunaqqi no Nuggushoo Yeerichi wojoon boonoshi meechi qaatoona shaddiyeete; bi ikketo baach no Taatoonaa no Doonona tunati Yesuus Kiristoosin nookkaheete; boonoshi toommooch shaggemmi nalloo wodda yemeenoyee aaf Yaafa Macaafooch kooreetone. 5 Tunaballi ebiyee aaf ebi bullin ittoshi ariiteenolla, Doono Yeeri Gibicee Shawoochee Isra'eeleena'on kichii wodiichii, boonoshi mulloon bi toommooch too'iyaaneena'on bi aalliyoon ittoshich shalligichoon shunnaa beeto taane. 6 Ebiyoomon wotta boonoshich immati ukkurittinoon qajiqqi boonoshi beeyi xaa'oochee kechiti maraakeena'on dechi mandarooch bulli yemeenoon sansalatoona cuchiqqi, ooga nallee aabooba boonoshi toommooch bi nallimmi wottoon boonoshin quyaa beetone. 7 Wotta ebi ara maraakeena'ochoomon shuno maati, hallooch aalli yeellii beeti mooyon tuniiti, Sodoomi, Gamoorinaa boonoshi guudoonooch beeti katameexi asheena'o, bulli yemeenee qaaqqoona micciibee bullich cuu'iyoo tunatina'one. 8 Ebiyoomon wotta ebi asheena'o gumon gummiibee boonoshi hajee ashittinoon ee'ii beetina'one; Yeerichi doonjittinoon qallaayii beetina'one; damba shimaayooch beeti oogee yiirachina'on naaggii beetina'one. 9 Maraakeena'ochi iraashoo tunati Mika'eeliyolla Daabiloosina tookkii Muusichi caheechon bi taggahooba, "Doono Yeeri neen kaarabe" iyalli, naagaabee nalloyich aafoon kupphataanoone. 10 Tunaballi eboshi boonoshi ariyaani amashee mooyonolla naagaa beetina'one; shalligoon hakkaani kubbi cooxochoomon tunaqqi boonoshi halloona boonoshi arii beeti mooyo bi beeteenolla, ciiroochaa ebi ara mooyo shiwaree qaaqqooch boonoshin bechemmone. 11 Boonoshich woowo! Qaayeeli tuniitoomon tuniitina'one; gijoon danoyicha iqqi Balaami shuunati muricooch boonoshi qelloon beshiiqqi immitina'one; Qooriyi hukkoon bi shuunoomon hukkoon shuunatina'one; bi aalloomon aallemmina'one. 12 Eboshi yeellataanoon woddiiqqi uchii maa boonoshi bee gaata, ittoshi ikkittinee madoochaa kiinoomina'one; boonoshi qellichon baachiye boonoshi gabii beeto; yongo shaccii aallii beeti, amiyo deebaani quboomina'one; bi gooroona aafataani, cammona waaxee ciroona shuuqqiti mixoomina'one; 13 yeellii beeti boonoshi shuunoo umboomo tunahona, umboon aapphii beeti giidachi baharee aachi aayoomina'one; boonoshi gommon gawukkiqqi yalyallimii beeti xojaneena'oomina'one; boonoshichoo bulli yemeenoon dunna mandarooch boonoshi beeyemmi xaa'oon Yeeri qanniitone. 14 Addaamiichee tiijiqqi shabaattinnee shiijaroo tunati Heenooki wotta eboshichon ishichii keemmiqqi, "Ebiyoche! Doono Yeeri asho bullichi toommooch nalliya, hukkachina'o tunaqqi boonoshi shuunati hukkee shuunoo bullich, hukkachi axaaxachina'oo bi toommooch boonoshi yibbaatati gonda mooyo bullich boonoshi bullichi toommooch nalliya, wodda huma yaafeetina'ona tookkii bi waa beetee beego" iqqi gettiye. 16 Eboshi guuqqii guruuxii beetina'one; boonoshi hajee qaatoon dabbii beetina'one; geeciibee boonoshi qellichon yibbaataa beetina'one; ashi waanee gaacoon daniya iqqi ashoon naadii beetina'one. 17 Tunaballi ta shunachina'ote! Ittoshi no Doono Yesuus Kiristoosi wochati mishiraachachina'o ebiyee aaf boonoshi gettiti qaaroon gabibote! 18 Boonoshiyoo ittoshich "Yemeenee ciirooba asheena'o boonoshi hajee gonda qaatoon dabbibee mishiraachee qaaree toommooch cooqqirachina'o tunemmina'one" itina'one. 19 Eboshi kittinnee guuphina'on barbarii beetina'o, meechi qaatoyich hajee beetina'o, Yeerichi Yaafa Ayaano boonoshi toommooch aalli asheena'one. 20 Tunaballi ta shunachina'ote! Ittoshiyoo bulliyee beshoon yaafeeti gommona Yeerichi toommooch mullee too'iyoona dico ittoshich bi daakkeeyemmoyich, ittoshinaa itooshina gaacheyoona kupphabote! Yaafa Ayaanoona yaabeeree corootibote! 21 No Doono Yesuus Kiristoosi bi ariqqoona bulli yemeenee kashoon ittoshich bi immemmi aaboon quyabee, Yeeri ittoshin shunnii beeto bi tunoon shalligibee beebote! 22 Gaabbii beeti ikkikkeena'oyich ariqqabote! 23 Shiwaree qaaqqooch hammii beeti ikkikkeena'on shotta kichiree wodiibote! Ikkikkeena'onoo meechi qaatoona ee'ati boonoshi tahoon tiyaarabee, ebiyoomon ittoshi ee'ataachemmoyich shatibee ariqqabote! 24 Giinnii dihoochee ittoshin quyabee, kiinaallo tuniiree bi oogee yiiree aafooch oogati emiroona ittoshin neechoon hakkii beeti, 25 bi ikketo baach Nuggushoo tunati, noon Wodiyachi Yeerich, bulli yemeenoyee aaf, andoo, bulli yemeenoonoo no Doono Yesuus Kiristoos waanaa oogee yiiroo, oogo, giidoonaa hakkoona tunabe; tookkona.
