TITE 3

1Í xa lannayabaxolu hakilo lajigi a la, xo i xa xulu kuntigolu nin fango ɲen. I xa wolu lame, anin i x'e toben ku ɲuma bee ko xanma. 2I xana xumajaxu fo moxo si ma, i xana ke kelelalu ti, bari i xa ke moxo sabarininŋolu ti, x'e juso faxa moxo bee xoto. 3Bawo n du tunnu mu hakilintanŋo lelu ti folofolo, anin Ala foxanmutabalolu, nin moxo filininŋolu. N tunnu be nege sifa bee nin nidiyanɲe sifa bee la jonɲa la. N tunnu b'e taxamala jaxuya nin kiiliya xono. Moxo tunnu be n jaxuyala, n du tunnu b'e ɲoxo jaxuyala. 4N Kisibaxa Ala x'a la ɲumaya nin a la xanuya yita hadamadinŋolu la tumo men, 5a xa n kisi wo tumo. A man n kisi bawo n xa kewale tilinnin ke; a x'a ke a la hinnayeba le xanma. Ni Senunŋo xa n na towulu xa n tokutaya batiselijiyo la. Wo le xa n kisi. 6N Kisibaxa Isa Kirisita barako to, a xa wo Ni Senunŋo kiika lajigi n xan, 7walasa Ala la tilinninɲa soto tanbo xo, a la neemo xanma, n xa nilamaya banbalo soto ke ti, n gigo be wo men xan. 8Wo xumo mu tonɲa le ti. Nte b'a fe í xa wo fo x'a xoleya, walasa mennu lata Ala la, wolu x'e jija kuɲumako la. Wo kuwolu xa ɲin; nafa b'e la moxolu ɲen. 9Í fan tanga ŋininxali kuntanŋolu nin buruju kuwolu nin kele kuwolu nin sariya xan soosololu ma; bawo nafa nte wolu la, i me fusi ɲiɲa. 10Moxo men be nala talalo tila Ala la jama xono, nin í xa wo lasobi, sinɲa kilin nte, fula nte, í tosoobo wo tigi la. 11A lon xo wo moxo sifa filita, a xa silo bula. A si tu junubo kela, fo x'a fan jalagi. 12Nin ń xa Aratemasi walla Tisike ki í ma tumo men, í x'é balan xa na ń tara Nikopolise, bawo ń x'a latege xa sankunŋo ke non. 13Í x'é balan xa sariya karanmoxo Senasi nin Apolosi deema í la dugutotaxo la, walasa fen xana dasa i la. 14N na moxo dulu xa xan xa kewaleɲumako digi; walasa i xa dolu haajolu ɲiɲa. I xana ke moxo nafantanŋolu ti. 15Mennu be nte bata jan, wolu bee be í xontonna. Mennu be n xanula lannaya silo la, í xa wolu bee xonton. Ala la neemo xa ke alu bee fe.

will be added

X\