TITE 2

1Ite Tite ken, moxolu xaran xaran soobe la. 2A fo xexotobalu ɲen xo i xana danmatanbi ku to, i xa bunɲa tu i fannu xan, xa ke hakilimalu ti. I sinsinninŋo xa tu lannaya nin xanuya to, i xa muɲa. 3A fo musuxotoba dulu ɲen xo i bosilo xa senuya. I xana toxo jaxu la moxolu la, i xana i fannu ladi dolo ma. I xa ke tonbennikela betolu ti. 4Musuxotobalu xa musu dindinŋolu xaran i xelu nin i dinŋolu xanula, anin 5xo i xa ke hakilimalu ti, x'e fannu muta, x'e la lumabaarolu ke a ɲa ma, anin xa beteya, xa xulu i xelu ɲen, walasa moxo si xana soto xa xumajaxo fo Ala la xumo ma. 6Wo ɲa ma, a fo xamarindinŋolu dulu ɲen i xa hakili beto ta kuwo bee to. 7Ite fan xa ke kuɲumakela ti, xa ke ɲayito ti moxolu ɲen. Moxolu laxaran xoyiya nin soobe to. 8Ite fan na xumolu xa ke tonɲa nin soosolibalo ti, walasa í jaxolu xa malu, i xana xuma jaxu soto x'a fo n ma. 9Jonŋolu xa xulu i marigilu ɲen kuwo bee to, x'e diyanɲekuwolu ke. I xana i sooso. 10I xana i marigilu bulufen si ta. I xa ɲumaya nin xantigiya dafaninŋo yita tuma bee, walasa i xa bunɲa la n Kisibaxa Ala la xaranŋo xan kuwo bee to. 11Bawo Ala x'a la neemo yita, walasa moxolu bee si kisi ɲa men. 12Wo neemo be n xaranna xo n xa i xodi Alaɲasilanɲabaliya nin duniya nege jaxolu la; xo bi, n xa i taxama hakilimaya nin tilinninɲa nin Alaɲasilanɲa xono, 13jannin heero xa na, n gigo be men xan, anin jannin n na Alaba nin n Kisibaxa Isa Kirisita la nooro xa yita. 14Isa x'a fan di ntelu nofe walasa xa n kunbo tilinbaliya bee ma, xa n senuya, xa n ke a ta ti, xa n ke moxolu ti, mennu jijaninŋo be ɲumako la. 15Í xa xan xa moxolu laxaran, x'e jusudun, anin x'e jalagolu yita i la, í barako bee la ɲin ɲa in ne ma. Moxo si xana í doxoya.

will be added

X\