TITE 1

1Nte Poli le xa ɲin safe in ke, nte men mu Ala la jonŋo anin Isa Kirisita la kiladinŋo ti. Ala xa ń ki x'a la sugandininŋolu ladun lannaya xono, xa tonɲa yita i la, men nin Alaɲasilanɲa be taxala i ɲoxo fe. 2Wo kunŋo mu le walasa i xa nilamaya banbalo soto gigo ti. Ala, ate men nte a foxanŋo soosola xa wo nilamaya lahido ta n ɲen, jannin duniya xa da. 3A la waxato sininma, a xa wo yita a la xumo la. N Kisibaxa Ala xa wo xumo xarifa nte ma, xo ń x'a waaju. 4Tite, ite men mu ń dinxe soobe ti lannaya silo la, lannaya men nin alan mu kilin ti a to, nte Poli le be ɲin safe in kila í ma. Fa Ala anin n Kisibaxa Isa Kirisita xa neemo nin heero ke í ɲen. 5Nte x'é tu Kereti, walasa kuwo mennu ɲabobalo tuta je, í xa wolu ɲabo. Í xa Ala la jama moxobalu sigi gallolu bee to, í xo ń x'a fo í ɲen ɲa men. 6Moxoba xa xan xa ke jalagibalo ti, anin musukilintigo. A dinŋolu xa ke lannayabaxolu ti, i xana ke moxo tiɲaninnu ti walla wulubaxa bunɲabalolu. 7Ala la jama lakorosibaxo xa xan xa ke jalagibalo ti, bawo Ala la moxolu kunnasigibaxo le mu. A xana ke wasubaxante ti, walla jusu tarinŋo, walla dolominnaba. A xana ke moxo fatinba ti, a xana xaaliso ŋinin nanbaro la. 8A xa ke luntannajigila ti, anin ku ɲuma xanubaxo. A xa ke hakilima nin moxo tilinninŋo ti, anin moxo senunŋo nin fanmutala ti. 9A xa xan xa ke moxo ti, men be notonin Ala la xumo la, í xo a xaranta a la ɲa men. Wo ɲa ma, a si sin xa moxolu tonben xaran soobe la, xa soosolilalu da xati. 10Moxo murutininŋo kiika be kenin mennu be moxolu lafilila i la xuma kuntanŋolu la. Wolu kiika bota Yahudiya lelu to. 11I xa xan xa lade, bawo i be luwo dolu muume lafilila, xa moxolu xaran ku kabaninŋo la, xaaliso nofe. 12I to do, i fannu la kila do xo: «Keretingolu mu faniyafola lelu ti tuma bee; wara jaxu nuxumalu.» 13Wo xumo mu tonɲa le ti. Wo le x'a tu, í xa xan xa xumaxolen wolu ɲen, walasa i xa lannaya soobe soto, 14anin, nin i me i noto Yahudiyalu la taliyolu nin hadamadinŋolu la folu la, wo mennu x'e xodi tonɲa la. 15Fenŋo bee xa senu moxo senumanŋolu ɲen; bari fusi man senu moxo noxonin lannabalolu ɲen. Wolu hakilolu nin i jusukunŋolu noxoninŋo le mu. 16I b'a fola xo i xa Ala lon, bari i b'a yitala i la kebaarolu la xo i man a lon. Moxo haramunin, murutininŋo lelu mu. I me kebaara bete si ke no.

will be added

X\