ROMENGOLU 9

1Ń be men fola, tonɲa le mu, faniya nte; x'a la a xan ń mu Kirisita ta le ti. Ń jusukunŋo du mu ń seede ti Ni Senunŋo barako to, xo ń be men fola, wo nte faniya ti. 2Jusuxasiba be nte la, ń be xonotoxasinin tuma bee. 3Don ne xa di ń ɲen Ala xa nte fan danga, ń nin Kirisita xa fata ń badinŋolu ɲen, nin wolu mu ń na siya moxolu ti. 4I mu Banisirayila dinŋolu ti. Ala xa i sugandi xa i ke a dinŋolu ti, x'a la nooro la i xan. A xa kafuxanŋolu dun a nin i te, x'a la sariyalu nin a batuɲa di i ma, xa lahidolu ta i ɲen. 5I bota n mamaxelu to. Kirisita du bota ite lelu to balasubo boxo la. Ate le be fen bee kunna. Ala le mu. Tanto be a ɲen tuma bee, fo abada. Amiini. 6Bari wo xoto nte don ti xo Ala la lahido man ke. Bawo mennu bota Banisirayila to, wolu bee nte Banisirayila din soobe soobelu ti. 7Mennu bota Burehima to, wolu bee du tun nte Burehima din soobe soobelu ti. Ala x'a fo Burehima ɲen xo: «Ń xa bonsonŋo men lahido ta í ɲen, wo be bola Nsiyaxa le to.» 8Wo xoto xo: Dinŋo mennu wuluta hadamadinɲa silo la, wolu nte Ala dinŋolu ti; bari mennu wuluta Ala la lahido silo la, wo lelu doronnu be jaatela bonsonŋolu ti. 9Ala xa lahido ta ten xo: «Bi xo san kilin, nte si na, wo tumo, Saran si dinxe soto.» 10A man dan Saran ta ma, Rebeka du ta keta ten ne. A xa xono ta funelu la n mamaxe Nsiyaxa ɲen. 11Ala be moxolu sugandila x'a la a la kulatego xan. A la sugandilo be lala a la kililo le xan; a nte lanin kewale xan. Walasa x'a la xantigiya yita wo to, Ala xumata Rebeka ɲen, x'a tara a dinŋo tunnu man wulu folo, i man ɲuma ke, i man jaxuman ke. A xo Rebeka ɲen xo: «Xoto si ke doxo la jonŋo ti.» 13A be í xo Kitaabo x'a fo ɲa men xo: «Ń xa Yaxuba le sugandi, xa Esawu tu je.» 14Alan si mun fo wo to sa? Tilinbaliya be Ala la ba? Abada! 15Bawo Ala x'a fo Musa ɲen xo: «Nte b'a fe xa makari men na, ń si makari wo la, ń b'a fe xa hinna men na, ń si hinna wo la.» 16Wo nte moxo fan sago ti, walla moxo la baaro, bari Ala la hinno kilinpe le b'a kela. 17Kitaabo xono, Ala xumata Farawuna ɲen xo: «Ń x'é ke mansaxe ti, walasa x'é ke xa ń na sintigiya yita, anin, nin ń toxo si me duguxulo bee xan.» 18Wo ɲa ma, a diyata Ala ɲen xa hinna men na, a si hinna wo la. A je diya a ɲen xa men sondonmo xoleya, a si wo sondonmo xoleya. 19Dolu si a fo xo: «Mun dun na Ala be moxolu jalagila tugun? Jon si sin no x'a sago bali?» 20Awa, ite men mu hadamadin gansanŋo ti, í mu jon ti nin í be Ala soosola? Daxo men data banxo la, wo si a fo a dabaxo ɲen no ba xo: «Mun na í xa ń da ten?» 21Daxadala sago le nte a la banxo xan ba? A si daxa nafamaba da a la banxo to, a si daxa xote da a to, men nte nafaba ɲan na. 22Ala tun b'a fe x'a la diminŋo nin a la sintigiya yita. A la diminŋo tun xa xan xa boyi mennu to x'e halagi, a muɲabeteta wolu xoto folo. 23Bari a x'a la makaro yita mennu la, x'e toben kabirin waxati jan xo i si a la nooro soto, a diyata a ɲen x'a la noorotigiyaba yita wolu la. 24Nte lelu mu wo ti, a xa ntelu mennu kili xa bo Yahudiyalu to, bari wo doron nte, a xa kililo ke xa bo siya to dulu to. 25A xa wo le fo kila Ose la kitaabo to xo: «Siya men tun nte ń na siya ti, ń si wo kili xo ń na siya. Xabiilo men tun man kili xo xanuninŋo, ń si wo kili xo xanuninŋo. 26A tun fota i ɲen jan men xo: “Alu nte ń na moxo ti”, i si kili non fan xo Ala nilama dinŋolu.» 27Kila Esayi du xa ɲin fo Banisirayila la kuwo to xo: «Haali nin Banisirayila bonsonŋo siyata í xo xooxojida la keɲo, i totuninŋo doron nelu be kisila. 28Bawo Marigi si a foxanŋo ke, x'a latimme junna junna duguxulo xan.» 29Kila Esayi tun x'a fo du xo: «Nin Kelebulolu tigo Marigi tun man n dolu ke siyo ti, n tunnu si jani xeru í xo Sodome gallo keta ɲa men. N tunnu si ke Gomore gallo ɲoxonŋo ti.» 30Saasa, alan si mun fo? Siya tolu men tunnu nte Ala la tilinninɲa ŋininna, wolu xa Ala la tilinninɲa soto lannaya xanma. 31Banisirayila dinŋolu men tunnu be Ala la tilinninɲa ŋininna sariya silo la, wolu dasata sariya silo taxamala. 32Mun na i man tilinninɲa soto? Bawo i man a ŋinin lannaya la, bari i x'a ŋinin kewalolu fe. A be í xo i takkita kuro la xa boyi, 33í xo a be safenin Kitaabo to ɲa men xo: «Ń fele kuro do lala Siyon, men si moxo latakki, kuro men si moxo laboyi. Bari moxo wo moxo je la a la, wo tigo me malu abada.»

will be added

X\