ROMENGOLU 8

1Saasa, mennu nin Isa Kirisita kafuta, jalagi si nte wolu ma. 2Bawo Ni Senunŋo men be nilamaya dila Isa Kirisita la kafuɲoxoya fe, wo Niyo la sintigiya xa ń hooroya xa ń bo junubo la sintigiya bulu, wo men be nala saya tila. 3Sariya tun me men ke no, x'a la a xan balasubo x'a ke barakentanŋo ti, Ala xa wo ke: Junubo xanma, a x'a fan Dinxe ki xa n balasubu junubema ɲoxonŋo ta. Wo ɲa ma, a xa junubo jalagi balasubo to. 4Ala xa wo ke, walasa sariya xa men fo, ntelu xa sin xa wo dafa, ntelu mennu nte i taxamala n fannu nidiyanɲo la, fo Ni Senunŋo diyanɲo la. 5Moxo mennu be i taxamala i nidiyanɲo la, wolu be hanmela i nidiyanɲekuwo lelu la; bari mennu be i taxamala Ni Senunŋo diyanɲo la, wolu hanmo mu Ni Senunŋo diyanɲekuwo lelu ti. 6Xa hanme í nidiyanɲo la, wo be falinna saya le la. Bari xa hanme Ni Senunŋo diyanɲo la, wo be falinna nilamaya nin heero le la. 7Moxo nidiyanɲekuwolu mu Ala tano le ti; bawo moxo nidiyanɲo nte sonna Ala la sariya ma. A me Ala la sariya dafa no fan. 8Moxo mennu be i taxamala i nidiyanɲo la, wolu ku me diya no Ala ɲen. 9Atelu kennu nte i taxamala alu nidiyanɲo la; alu be i taxamala Ni Senunŋo le diyanɲo la, bawo Ala Niyo be siginin alu sondonmekunŋolu la. Nin Kirisita Niyo nte moxo men to, wo nte a ta ti. 10Nin Kirisita be alu niyo to, haali nin alu balo labanŋo mu saya le ti junubo xanma, Ni Senunŋo si nilamaya di alu ma, bawo alu xa tilinninɲa soto Ala ɲa xoto. 11Ala men xa Isa lakuni xa bo furelu to, nin wo Niyo be alu to, a si nilamaya di alu bala satalu ma, í xo a xa Isa Kirisita lakuni xa bo furelu to ɲa men. A si wo ke a Niyo barako la, wo men be alu to. 12Wo ɲa ma, ń badinŋolu, julo be n na. Bari n nidiyanɲo la julu nte de. N man xan x'ate diyanɲekuwolu ke tugun. 13Nin alu be i taxamala alu nidiyanɲo la, alu si sa. Bari nin alu xa nidiyanɲolu faxa Ni Senunŋo la, alu si nilamaya. 14Moxo wo moxo be í taxamala Ala Niyo barako la, wolu bee mu Ala dinŋo lelu ti. 15Ala xa Niyo men di alu ma, wo nte alu kela jon ti, a nt'a kela alu xa sila. Wo Niyo be alu kela Ala dinŋo lelu ti. Wo Niyo barako la, n be Ala kilila xo «Baaba!» 16Ni Senunŋo fan b'a yitala n niyo la xo n mu Ala dinŋolu ti. 17Nin n mu Ala dinŋolu ti, a xa ke men lahido ta a la jama ɲen, n si n nidula soto wo du to. N nin Kirisita si wo nidula soto i ɲoxo fe; bawo nin n nin a toorota i ɲoxo fe, n nin a si ke a la nooro du xono. 18Nte b'a jaatela xo n be tooro men jela bi, wo nte fusi ti, men si xaaɲan Ala la nooro ma, a be nala men yitala n na sinin. 19Ala b'a dinŋolu yitala lunŋo men, dafenŋolu bee be keɲenin wo lunŋo ma. 20Bawo dafenŋolu bee bulata nafantanɲa fango xoto. Dafenŋolu fannu no nte, Ala le fan x'a ke. Bari haali wo, gigo be je. 21Wo gigo fele xo: Lun do, Ala si a la dafenŋolu bee bo saya la jonɲa la, anin i si i nidula soto Ala dinŋolu la hooroya nin i la nooro to. 22Alan x'a lon xo haalibi, dafenŋolu bee be ŋuntanna tooro bulu, í xo musu tinto. 23Wolu kilinnu nte, bari Ni Senunŋo dita ntelu mennu ma Ala la nilifen folo ti, n dulu be ŋuntanna n xonoto, xa lunŋo laxono, Ala be nala n kela a dinŋolu ti lunŋo men, xa n balasubo bo jonɲa la pewu. 24Ala xa n kisi. Bari n ɲa man la wo kisilo xan folo, n yilo le b'a ma. Nin í ɲa x'é yilibenma fenŋo je, í yili nte wo ma tugun. Moxo ɲa be men to xa ban, í s'í yilo la wo ma tugun ba? 25Nin n yilo be fen ma, n ɲa man men je folo, n si wo laxono muɲo to. 26Ni Senunŋo du be n deemala x'a la a xan n barako xa doxo. N xa xan xa Ala matara kuwo men na, n man wo lon. Bari Ni Senunŋo fan be Ala matarala n ɲen ŋuntanŋolu la, da me men naxali no. 27Ala men ɲa be jusukunna kuwolu la, wo x'a lon Ni Senunŋo be taralo kela men na, bawo Ni Senunŋo be taralo kela Ala la moxo lelu ɲen, x'a la Ala sago xan. 28N x'a lon xo kuwo bee si falin Ala xanubaxolu ɲen ɲuma la, a keta wo mennu kililo lategebaxo ti. 29Ala xa mennu sugandi kabirin duniya man da, a x'a latege du kabirin folofolo xo i si ke a Dinxe ɲoxonŋo ti, walasa a Dinxe xa ke badin kiika la sooma ti. 30Ala xa mennu sugandi kabirin folofolo, a xa wolu kili; a xa mennu kili, a xa wolu ke moxo tilinninŋolu ti. A xa mennu ke moxo tilinninŋolu ti, a x'a la nooro la wolu xan. 31Alan si mun fo x'a la wo xan? Nin Ala be n ɲen, jon si ke no xo a me ke n ɲen? 32Ate men man a fan Dinxe faxabalo tu je, bari a bota a la a xa faxa n bee ɲen, a si tu ɲa di a man fen bee di ntelu nin a Dinxe ma? 33Jon si Ala la moxo sugandininŋolu jalagi no? Moxo si, bawo Ala fan ne xa i jaate moxo tilinninŋolu ti. 34Jon s'i jalagi no? Moxo si, bawo Isa Kirisita le sata. Wo doron nte, a kunita du, a be Ala kininŋo fe xa Ala matara n ɲen. 35Jon si a no xa Kirisita la xanuya tege n na? Ɲaano me a no, xonotohanmo me a no, moxolu la tooroli me a no, xonxo me a no, sege me a no, masiibo me a no, faxalo me a no. 36A be í xo Kitaabo x'a fo ɲa men xo: «Ala, ite la kuwo xanma, i be n ŋininna xa n faxa tuma bee. I be n mafelenin saaxa faxatalu ti.» 37Bari wo bee xan, n be kunnawuli dafaninŋo sotola n xanubaxo barako to. 38A be hennenin n ma xo fusi me Ala la xanuya tege no n na: A keta saya ti wo, a keta nilamaya ti wo, a keta melekiyolu ti wo, a keta kuntigiya xote ti wo, walla sintigiya mennu be sanŋo to, walla bi, walla sinin, 39walla sanŋo to fangolu, walla duguxulo xan fangolu, walla dafen xote, fusi me a no xa Ala la xanuya tege n na, a xa men yita n na n Marigi Isa Kirisita barako to.

will be added

X\