ROMENGOLU 7

1Ń badinŋolu, ń be nala men fola alu ɲen, alu xa wo lon xa ban, bawo alu xa Musa la sariya lon. Sariya la julo be hadamadinŋo la, x'a nilama tu. 2Awa sariya ken na, musu futuninŋo be sitinin a xe la, fo a xe xa sa. Bari nin a xe sata, sariya men tun b'a sitinin a xe la, wo la julu nt'a la tugun. 3Nin a sigita xe xote kun x'a xe nilama tu, a xa jadoya le ke. Bari nin a xe sata, sariya la julu nte a la. Wo to, nin a sigita xe xote kun, a man jadoya ke. 4Ń badinŋolu, wo be ɲa men, alu dulu la kuwo be ten. Sariya silo la, alu sata, x'a la Kirisita la saya xan; walasa alu xa ke do xote ta ti, nin wo mu Kirisita ti, wo men kunita xa bo furelu to. Wo to, alu si kewale ɲumalu ke Ala ɲen. 5Xa n tu i taxamala n fannu nidiyanɲo la, sariya xa nege jaxo mennu lawuli, wolu tunnu be baaro kela n balo dula bee to, xa saya lasi n ma. 6Bari saasa ken, n hooroyata xa bo sariya bulu; bawo n tunnu be men bulu jonɲa la, saya xa n nin wo fata. Wo ɲa ma, n si sin xa baaro ke Ala ɲen ɲa kuto ma, Ni Senunŋo barako to. N nte a kela í xo n x'a ke ɲa men xotonin, xa n tu sariya safe fango xoto. 7Alan si mun fo sa? Sariya man ɲin ba? Abada! Bari ń xa junubo lon sariya le ma. Ɲabonfe mu fenŋo men ti, n tun me wo lon nin sariya tun man a fo xo: «Í ɲa xana bo moxo la fen fe.» 8Junubo xa wo sariya ta xa nege sifa bee ke nte la. Nin sariya nte je, junubo mu fen saninŋo le ti. 9Xotonin, sariya nte je tumo men, nte tun nilama mu. Bari sariya naninma, junubo xa sinŋo soto, 10nte sata: Sariya men be nilamaya lasila moxo ma, wo keta sabaabu ti xa saya lasi nte ma. 11Bawo junubo xa sariya ke xa nte lafili, xa ń faxa ate sariya kilin in na. 12Wo to, sariya xa senu. A be men fola, wo xa senu. A be tilinnin, a xa ɲin. 13Men xa ɲin, wo keta nte la saya sabaabo ti ba? Abada! Junubo le keta a sabaabo ti. A x'a la junubeya yita ɲin fe, xa saya lasi nte ma fen ɲuma la. Junubo x'a la jaxuya yita bete ɲa men, sariya dinmalo fe, wo ɲa le felenti. 14N x'a lon xo sariya niyo la fenŋo le ti, bari nte ken mu dafen balasubuma le ti. Ń be sannin junubo ma í xo jonŋo. 15Nte be men kela, ń man wo faamu. Men xa di ń ɲen, ń nte wo kela, bari men man di ń ɲen, ń be wo le kela. 16Nin nte be ń kuwanɲo le kela, wo to, ń sonta sariya ɲen, x'a lon xo a xa ɲin. 17Wo to, ń be jaxumanŋo men kela, wo kebaxo nte nte ti. Junubo men be siginin ń to, wo le b'a kela. 18Nte x'a lon xo, nte xono, wo xoto nte balasubo to, betemanŋo nte je. Ɲumako nego be ń na, bari barake nte ń na x'a ke. 19Ń b'a fe xa ku ɲuma men ke, ń nte wo kela. Ń nte a fe xa ku jaxo men ke, ń be wo le kela. 20Nin nte nte men fe, ń be wo le kela, wo kebaxo nte nte ti. Junubo men be siginin nte to, wo le mu a kebaxo ti. 21Ń xa ɲin ku in korosi ń fan bata xo: Nte b'a fe xa ku ɲuma le ke. Bari ń x'a je xo ku jaxo le ko barako be ń na. 22Ala la sariya xa di ń niyo ɲen. 23Bari barake xote be ń to, men be nte fan hakililata kelela. Wo barako be ń kela junubo la jonŋo ti, men be siginin ń to. 24Nte be ń kuwa de! Jon si nte bo ɲin bala in bulu, men be saya lasila ń ma? 25Tanto be Ala ɲen, wo men be ń bola a bulu, n Marigi Isa Kirisita barako to! Ń si a fo xo, nte be baaro kela Ala la sariya ɲen ń hakilo la, bari balasubo boxo la, ń be junubo la sariya la jonɲa la.

will be added

X\