1 Wo to, alan si a fo no ba xo n xa tu junubo kela, walasa Ala la neemo xa tosiyaya? 2 Abada! Ntelu mennu sata xa n nin junubo tala, alan si tu junubo kela ɲa di tugun? 3 Walla alu man a lon ba xo alan mennu bee batiseta xa ke Isa Kirisita kafuɲoxo ti, xo alan nin a xaaɲanta a la saya to? 4 Batiselo xa n nin a lasa i ɲoxo fe, anin xa n nin a lasi i ɲoxo fe. Wo keta, walasa n dulu xa i taxama nilamaya kuto xono, í xo Kirisita kunita xa bo furelu to Fa Ala la sintigiya fe ɲa men. 5 Nin n nin ate keta kilin ti xa sa í xo ate sata ɲa men, n nin a si ke kilin ti xa kuni í xo ate kunita ɲa men. 6 Alan xa xan xa ɲin lon xo alan moxo xoto nin a jigo nin Kirisita gengenta i ɲoxo fe xa sa. Wo keta, walasa wo bala junubema xa tiɲa, nin n me tu a la jonɲa la tugun. 7 Moxo men sata, wo hooroyata xa bo junubo la jonɲa la. 8 Nin alan nin Kirisita sata i ɲoxo fe, n be lanin a la du xo n nin a si nilamaya i ɲoxo fe. 9 N x'a lon xo Kirisita kunininŋo xo xa bo furelu to, a nte sala tugun. Saya la julu nte a la bitugun. 10 Nin í x'a je sala, a sata le x'é tala junubo ma, sinɲa kilinpe doron. Bari saasa, a be í nila, a be í nila Ala le ɲen. 11 Wo ɲa ma, alu dulu x'alu fannu jaate xo alu sata, alu nin junubo talata, x'alu fannu jaate nilama ti Ala bulu, Isa Kirisita kafuɲoxoya xanma. 12 Alu xana alu bala satalu tu junubo bulu tugun, x'e ke a la jonŋo ti. Alu xana alu balo bula a diyanɲolu bulu tugun. 13 Alu xana alu balo dulalu dun junubo bulu tugun, xa i ke tilinbaliya la baarakemiranŋolu ti. Al'alu fannu di Ala ma, í xo moxo nilamalu, mennu kunita xa bo saya to, x'alu balo dulalu di Ala ma, x'e ke tilinninɲa la baarakemiranŋolu ti. 14 Alu me ke junubo la jon ti tugun, bawo kila Musa la sariya la julu nte alu la tugun, alu be Ala la neemo le xono. 15 A dun be di? N si junubo ke ba xo bawo sariya la julu nte n na tugun, xo n be Ala la neemo le xono? Abada! 16 Alu man a lon ba xo nin alu be baaro kela moxo do ɲen, xa xulu a ɲen, alu be kela wo tigo la jonŋo le ti? Nin alu be junubo le la jonɲa la, wo labanŋo mu saya le ti. Nin alu dunnu be Ala sago le kela, wo labanŋo mu tilinninɲa le ti. 17 Bari barako xa la Ala ɲen; alu tunnu mu junubo la jonŋolu ti, bari alu laxaranta men ma, alu xuluta wo ɲen alu jusukunŋo bee la. 18 Alu hooroyata xa bo junubo la jonɲa la, xa ke tilinninɲa la jonɲa la. 19 Ń be xumala alu ɲen hadamadinɲa xonŋo to, x'a la alu la barakentanɲa xan. Xotonin, alu x'alu fannu muume bula kunoxoninko nin jaxumanŋo la jonɲa la, wo mennu be moxo lamurutila Ala ma. Wo ɲa ma, saasa al'alu muume bula tilinninɲa la jonɲa la, wo men labanŋo mu senuya ti. 20 X'alu tu junubo la jonŋolu ti, alu tunnu hooroyaninŋo le mu tilinninɲa boxo la. 21 Wo xa mun dun alu la? Bi alu be maluyala wo kuwolu la; bawo i labanŋo mu saya le ti. 22 Bari saasa, alu hooroyaninma xa bo junubo bulu, xa ke Ala la jonŋolu ti, wo xa senuya di alu ma, x'alu labanŋo ke nilamaya banbalo ti. 23 Junubo sara mu saya le ti; bari Ala la nilifenŋo mu nilamaya banbalo le ti, n Marigi Isa Kirisita kafuɲoxoya xanma.
