ROMENGOLU 4

1Burehima men mu n fa ti hadamadinɲa silo la, n si a fo x'ate xa mun soto? 2Nin Burehima tun xa Ala la tilinninɲa soto a fan na kebaaro lelu xanma, a tun si a fan bunɲa. Bari a me a fan bunɲa no Ala ɲa xoto. 3Kitaabo xo di? A xo: «Burehima lata Ala la. Wo xanma, Ala x'a jaate moxo tilinninŋo ti.» 4Nin moxo xa baaro ke, í s'í sara soto. Wo sara nte jaatela dinmalifen ti, bari í nin a xa xan ne. 5Nin moxo do lata Ala la doron, x'a lon xo a si a la tilinninɲa di junubekela ma, haali nin a man kebaara ke, Ala si wo tigo la lannaya jaate, xa tilinninɲa di a ma. 6Ala xa moxo men jaate moxo tilinninŋo ti, x'a tara a la kebaarolu xanma nte, mansaxe Dawuda xumata wo la heero xan, a xo: 7«Marigi xa moxo mennu la tilinbaliyakuwolu yaafa, xa i la junubolu lafaxa, heero be wolu ɲen. 8Marigi nte moxo men na junubolu jaatela, heero be wo ɲen!» 9Wo heero mu ɲaxaninŋolu kilin nelu ta ti ba, fo ɲaxabalolu dulu ta le mu? N x'a fo xo: «Burehima la lannaya xanma, a jaateta moxo tilinninŋo ti.» 10Bari wo keta tuma joman? Jannin a xa ɲaxa le mu ba, walla a ɲaxaninŋo xo le mu? A ɲaxaninŋo xo nte; jannin a xa ɲaxa le mu. 11Wo xo le mu, nin a ɲaxata. Wo ɲaxalo keta Burehima la tilinninɲa soto taagumanseedo ti. A xa wo tilinninɲa soto a la lannaya xanma, x'a ɲaxabalo tu. Wo ɲa ma, Burehima keta lannayabaxa ɲaxabalolu bee mamaxe ti, walasa i xa tilinninɲa soto. 12A keta ɲaxaninŋolu dulu mamaxe ti, wo mennu man ɲaxa doron, bari i be i taxamala lannaya silo xan, í xo n mamaxe Burehima taxamata ɲa men, jannin a xa ɲaxa. 13Ala xa lahido men ta Burehima nin a bonsonŋo ɲen, xo a si duniya di i ma ke ti, wo man ke sariya koso. A keta le bawo Ala x'a jaate moxo tilinninŋo ti a la lannaya koso. 14Nin wo ke soto tun be dennin sariya labatulo le la, nafa tun me ke lannaya la; lahido du bota a ma. 15Sariya be nala Ala la diminŋo le tila doron, bawo moxo me sariya latimme no. Bari sariya nte dula men, sariya sooso du nte non. 16Wo ɲa ma, ke be sotola lannaya le xanma, walasa ke xa ke Ala la nilifenŋo ti, lahido xa ke Burehima bonsonŋolu bee ta ti. Mennu be i taxamala sariya la, anin mennu be lannaya kela, í xo Burehima x'a ke ɲa men, lahido mu i bee ta le ti. Burehima mu n bee le mamaxe ti, í xo Kitaabo x'a fo ɲa men xo: 17«Nte xa í ke siya kiika mamaxe ti.» N mamaxe le mu a ti Ala bulu, a lata wo men na, Ala men be furelu nilamayala, xa fen bangebalolu bange. 18Burehima xa lannaya ke xa gigo soto, x'a tara gigisoto ku nte je. Wo ɲa ma, a keta siya kiika mamaxe ti, í xo Ala tun x'a fo a ɲen ɲa men xo: «Í bonsonŋo si siya ten.» 19A m'é miiri a la xoto ma, bawo a siyo tun be taxala san keme ma. A musu Saran du tun dinsoto waxato tanbita. Bari wo bee nin a ta, a la lannaya man doxoya. 20A la lannaya man tiɲa, a man sikka Ala la lahido to, do le kafuta a la lannaya ma, fo x'a bula barako bulala Ala ɲen. 21A tun be hennenin bete a ma, xo a sinŋo be Ala ɲen x'a la lahido latimme. 22Wo le x'a tu, a fota Burehima la kuwo to xo: «A la lannaya xanma, Ala x'a jaate moxo tilinninŋo ti.» 23Ɲin xuma innu xo: «Ala x'a jaate moxo tilinninŋo ti», wolu man safe ate kilin ɲen. 24I safeta ntelu dulu ɲen, ntelu mennu xa xan xa jaate moxo tilinninŋolu ti, ntelu mennu lata n Marigi Isa lakunibaxo la. 25Isa dunta bulo to xa faxa n na junubolu xanma; bari a kunita xa bo furelu to, walasa n xa ke moxo tilinninŋolu ti Ala ɲa xoto.

will be added

X\