ROMENGOLU 3

1Yahudiyaya diya mu mun ti? Nafa joman be ɲaxo la? 2A nafa xa bun ɲa bee ma. A folo, Ala x'a la xumo xarifa Yahudiya lelu ma. 3I to dolu man ke xantigilu ti. Bari wolu la xanbulalo si Ala la xantigiya tiɲa ba? 4Abada! Ala ken mu tonɲatigo le ti, haali x'a tara hadamadinŋo bee mu faniyante ti, í xo a be safenin Kitaabo to ɲa men xo: «Nin í be xumala, í la tonɲatigiya xa lon; nin í be kiitila, í xa sewo.» 5Dolu b'a fola xo: «Nin n na tilinbaliya x'a yita xo Ala be tilinnin, nin a xa n ɲangi wo to, n si mun fo no? Ala si mafele no tilinbalo ti ba, bawo a be n ɲangila?» Ń be xumala hadamadinŋolu la miiriya le to. 6Abada! Ala nte tilinbali ti. Nin Ala tun mu tilinbalo ti, a si sin no xa kiito tege duniya xan ɲa di? 7Nin nte la faniya xa do kafu Ala la tonɲatigiya ma anin xa bunɲa la a xan, mun na nte si jalagi tugun xo ń mu junubekela ti? 8Moxo dolu si a fo xo: «Mun na n me ku jaxo ke, walasa a xa falin ku ɲuma la?» Dolu be nte toxo tiɲaxan xo nte b'a ma xa moxolu laxaran wo la. Bari wo moxolu si jalagi, i nin a xa xan du. 9A be di! Alan ntelu Yahudiyalu xa fisa moxo tolu ti le ba? Abada! Bawo ń x'a yita xa ban xo Yahudiyalu nin siya tolu bee be junubo fango xoto. 10A be ten, í xo a be safenin Kitaabo to ɲa men xo: «Moxo tilinnin nte je, haali kilin. 11Hakilima si nte je. Moxo si nte je men be Ala ŋininna. 12I bee xa silo bula. I bee keta nafantanŋolu ti i ɲoxo fe. Ku ɲumakela si nte je, haali kilin. 13I xumaxanŋo sumo xa ku í xo xaburu xono fenŋo. I s'i nenŋo ke xa moxolu lafili. Xuno be i la xumolu la í xo fofoono. 14I da be fanin dangalo nin xuma xunimanŋo la. 15I xa tari moxofaxo la. 16Tiɲalo nin bone be i bosilolu fe. 17I man heero silo lon. 18I man Alaɲasilanɲa lon muume.» 19N x'a lon xo sariya be fen fen fola, a b'a fola sariya xotomoxo lelu ɲen; walasa moxo bee xa í da muta anin duniya bee xa jalagi Ala ɲa xoto. 20Moxo si me jaate moxo tilinninŋo ti Ala bulu Musa la sariya silo taxamo xanma. Sariya b'a tula le doron, moxo xa junubo lon. 21Bari saasa, Ala x'a yita n na, a be moxo jaatela moxo tilinninŋo ti ɲa men, x'a tara sariya silo la nte. Musa la sariya nin kilalu be wo seedeyala: 22Ala be moxo jaatela moxo tilinninŋo ti lannaya le xanma, Isa Kirisita la. A be wo kela moxo bee ɲen, mennu je la Kirisita la. Moxo man bo moxo to, 23a bee xa junubo ke. I bee be sinbonin Ala nooro to. 24Ala la neemo barako to, i si tilinninɲa soto fu, bawo Isa Kirisita xa i kunbo junubo ma. 25Ala xa Kirisita ke sadaxo ti, walasa a la saya fe, mennu lata a la, a la diminŋo xa ban wolu xanma. Ala x'a la tilinninɲa yita ɲa men, wo fele: Xotonin, Ala muɲata, a man moxolu sara i la junubolu la. Bari bi, a b'a yitala, a be tilinninɲa dila moxolu ma ɲa men; bawo a b'a fe x'a yita xo a fan be tilinnin, anin mennu lata Isa la, a be wolu bee jaatela moxo tilinninŋolu ti. 27Fanbunɲa kun be moxolu bulu tugun ba? Wo nte je! I s'i fan bunɲa x'a la dalile joman xan? Xo i be sariya latimmela ba? Ayi! I s'i fannu bunɲa lannaya le doron xanma. 28N na jaate la, moxo nte Ala la tilinninɲa sotola sariya latimmelo la, bari a b'a sotola a la lannaya le xanma. 29Walla Ala mu Yahudiya lelu kilinnu la Ala ti ba? A nte siya to dulu la Ala ti ba? Siya to dulu la Ala mu le; 30bawo Ala kilin ne be je. A be Yahudiyalu jaatela moxo tilinninŋolu ti lannaya le xanma, xa siya to dulu jaate moxo tilinninŋolu ti lannaya xanma. 31N be sariya kela fuwo ti ba, lannaya xanma? Ayi de! N x'a bunɲa le a ɲa ma.

will be added

X\