ROMENGOLU 2

1Ite moxo wo moxo, nin í be tolu jalagila, jalago be í ma. X'é tu tolu jalagila, í be í fan jalagila, bawo í be tolu jalagila kuwo mennu to, í fan be wolu kela. 2N x'a lon xo Ala be kiito tegela wo ku sifalu kebaxolu xan x'a la tonɲa le xan. 3Ite men be wo kuwolu kebaxolu jalagila, x'a tara í fan b'e kela, í la miiro to xo í si kisi Ala la kiito ma ba? 4Í be Ala la ɲumayaba nin a la muɲo nin a la sabaro mafelela fuwo ti ba? Í man a lon ba, xo Ala la ɲumaya le si í bula í xodila í la junubolu la? 5Bari í tulo xa xole. Í nte a fe xa tuubi. Wo xanma, í be Ala la diminba sigila í fan ɲa, x'a la kiiti tilinninŋo lunŋo nin a la diminba lunŋo laxono. 6Ala si moxo bee sara i la kebaarolu la. 7Mennu man sege ɲumako la, i man sege nooro nin bunɲa nin sabaliya ŋininno la, a si wolu sara nilamaya banbalo la. 8Bari mennu be Ala soosola, x'e ban tonɲa ma, xa son tilinbaliya ma, a la diminŋo nin a la juso si boyi wolu to. 9Tooroba nin silanɲaba si boyi kujaxukelalu bee to: Yahudiyalu folo, wo xo siya tolu. 10Bari nooro nin bunɲa nin heero si di kuɲumakelalu bee ma: Yahudiyalu folo, wo xo siya tolu. 11Bawo Ala bulu, moxo man fisa moxo ti. 12Mennu xa junubo ke, x'a tara i man Musa la sariya lon, wolu si halagi x'a tara wo sariya silo la nte. Mennu xa junubo ke, x'a tara i xa sariya lon, kiito si tege wolu xan sariya la. 13Sariya lamebaxa gansanŋolu nte tilinnin Ala ɲa xoto. Mennu b'a lamela x'a latimme, wo lelu be tilinninɲa sotola. 14Siya tolu mennu man Musa la sariya soto, wolu be sariya latimmela i fannu ma. Wo b'a yitala xo sariya be i xono, x'a tara i man Musa la sariya soto. 15Wo la, i b'a yitala xo sariya la sila foninŋolu be safenin i sondonmo la. I jusukunŋo du be wo seedeyala, anin i miiriyalu. Tuma dolu i miiriyalu si i jalagi, tuma dolu i si boloxo di i ma. 16Ɲin ku in nelu be bola keno xan lun do. Lunŋo men, nin Ala b'a fola Isa Kirisita ɲen, xo a xa kiito tege moxolu la ku duguninŋolu xan, i be lankenemala wo lun ne, í xo nte be xibaru Dimanŋo men fola x'a yita ɲa men. 17Ite men be í fan kilila xo Yahudiya, xa í gigo la sariya xan, xa í fan xutu Ala kuwo to, 18í xa Ala sago lon. Í xaranta sariya la, x'a lon men xa ɲin. 19Ite men be í fan jaatenin fiyontolu la guma sababaxo nin keneya ti dibitomoxolu ɲen, 20í xo xo í mu ku lonbalolu xaranbaxo ti, anin dindinŋolu karanmoxo, bawo í xa lonŋo nin tonɲa dafaninŋo soto sariya xono. 21Ite men be tolu laxaranna, mun na í nte í fan naxaranna? Í be waajulo kela xo suuɲalo xana ke, mun na í fan be suuɲalo kela? 22Ite men b'a fola xo jadoya xana ke, mun na í fan be jadoya kela? Ite men xo, xo boliku man di í ɲen, mun na í be i batusuwolu xono fenŋolu tala? 23Ite men be í fan bunɲala sariya kuwo to, mun dun na í be wo sariya tiɲala xa Ala doxoya? 24A be Kitaabo xono xo: «Ala toxo be tiɲanin siya tolu to alu Yahudiyalu nofe.» 25Ɲaxo men, nin Musa la sariya x'a waajibiya Yahudiyalu ma, nin í be Musa la sariya latimmela, wo xa bete. Bari nin í be sariya tiɲala, í la ɲaxo keta fuwo ti. 26Nin ɲaxabalo be sariya silo taxamala, Ala me a la ɲaxabaliya jaate ɲaxalo ti ba? 27Men man ɲaxa fatesubo la, a dun be sariya silo taxamala, wo si ite jalagi, bawo ite be sariya tiɲala, x'a tara sariya safe be í bulu anin í be ɲaxanin. 28Men mu Yahudiya ti a banto to, wo nte Yahudiya soobe ti. Ɲaxo men keta balasubo la, wo nte ɲaxa soobe ti. 29Bari men mu Yahudiya ti a jusukunŋo la, wo le mu Yahudiya soobe ti. Ni Senunŋo xa ɲaxo men ke jusukunŋo la, wo le mu ɲaxa soobe ti. Wo tigo la tantulo man bo moxolu to, a bota Ala le to.

will be added

X\