ROMENGOLU 16

1Ń be alan badinmusu Febe la kuwo xoleyala alu ma. Ala la jama men be Sankere, wo la baarala le mu. 2Alu a tomuta Marigi toxo la, x'a bunɲa í xo Ala la moxo xa xan xa bunɲa ɲa men. A maakuwo keta alu la ku wo ku to, alu x'a deema. A xa badin kiika deema. A xa nte fan deema. 3Alu xa Pirisiye nin Akilasi xonton. Wolu mu nte baarakeɲoxolu ti, Isa Kirisita la baaro to. 4I bota i niyo la, walasa xa nte niyo kisi. Nte kilin nte i waleɲumalonna, bari Ala la jama mennu be siya tolu to, wolu bee be i waleɲumalonna. 5Ala la jama men be kamarila i la luwo ma, alu xa wo dulu xonton. Alu xa ń badin bete Epayineti xonton. Ate le folo xa lannaya ke Kirisita la, Asi maro xono. 6Alu Mariyama xonton, wo men xa baara kiika ke alu ɲen. 7Alu ń badinŋolu xonton: Andoronikusi nin Yuniyasi. Ń nin wolu tunnu be kaso la. Kiladin soobe lelu mu. I lata Kirisita la nte ɲa. 8Alu Anpiliyasi xonton. A la kuwo xa di bete nte ɲen Marigi la silo la. 9Alu Uruben xonton. Ń baarakeɲoxo le mu Kirisita ɲen. Alu ń badin xanuninŋo Sitasi du xonton. 10Alu Apele xonton. Ate la lannaya tuta siginin Kirisita la. Alu Arisitobuli la lumamoxolu xonton. 11Alu ń badin Herodiyon xonton. Alu Narisisi la lumamoxolu xonton, mennu be Marigi la silo xan. 12Alu Tirifene nin Tirifose xonton, mennu segeta Marigi la baaro la. Alu ń badinmusu soobe Pereside xonton. Ate segebeteta n Marigi ɲen. 13Alu Rufusi xonton, Marigi la moxo soobe le mu, anin a na. A na mu ń na le ti. 14Alu Asenkirite nin Fulegon nin Heremesi nin Patorobasi nin Heremasi xonton, anin badinŋolu mennu be i bata. 15Alu Filologe nin Juli xonton, anin Nere nin a badinmuso anin Olinpasi nin Ala la moxolu mennu be i bata. 16Alu i ɲoxo xonton baatayalixontonni senunŋo la. Kirisita la jama moxolu bee be alu xontonna. 17Ń badinŋolu, ń be alu lasobila: Alu i korosi moxolu ma, mennu be nala soosolo tila, xa lannayabaxolu lafili. Alu xa xaranŋo men soto, i si wo sooso. Alu i soobo wo moxolu la. 18Bawo wo moxo sifalu nte baaro kela n Marigi Kirisita ɲen. I be baaro kela i fannu xonobato le ɲen. I si kulonbalolu lafili i la xuma dimanŋolu nin i la tulutodiya xumolu la. 19Bee x'a lon xo alu be xulunin Marigi ɲen. Alu la wo kuwo be nte ɲaxalinin. Ń b'a fe alu xa hakilitigiya soto xa ku ɲuma ke, xa ku jaxo tu je. 20Dondin, heeratigi Ala si Sentane toɲonxo alu sinŋo xoto. N Marigi Isa la neemo xa ke alu fe! 21Ń baarakeɲoxo Timote be alu xontonna, a nin ń badinŋolu: Lusiyusi nin Jason nin Sosipatere. 22Nte Teretiyusi men xa ɲin letere in safe Poli ɲen, ń be alu xontonna Marigi toxo la. 23Ń jatigi Gayusi, anin Ala la jama bee jatigi, be alu xontonna. Dugo xaalisimarala Erasite be alu xontonna. N badinxe Karitusi du be alu xontonna. [ 24N Marigi Isa Kirisita la neemo xa ke alu bee fe. Amiini!] 25Alan xa Ala tantu! Nte be xibaru Dimanŋo men waajula Isa Kirisita la kuwo xan, sinŋo be Ala ɲen x'alu la lannaya sinsin wo la. Wo Xibaru Dimanŋo gullo yitata. A tun be dugunin kabirin folofolo. 26Bari saasa, Ala x'a la keno xan kilalu la kitaabolu la. Siyalu bee lalonta a la, í xo badabanŋo Ala x'a latege ɲa men. Wo keta walasa moxo bee xa la a la, xa xulu a ɲen. 27Tanto be Ala kilinpe ɲen, men mu hakilitigo ti, Isa Kirisita toxo la, fo abada. Amiini!

will be added

X\