ROMENGOLU 15

1Ntelu mennu barako xa bun lannaya to, alan xa xan xa barakentanŋolu la dono ta. N xana n fannu diyanɲo ke. 2Alan bee xa í moxoɲoxo diyanɲekuwolu ke a nafa xanma, walasa a xa taxa ɲa lannaya to. 3Haali Kirisita man a fan diyanɲo ŋinin, bari í xo a be safenin Kitaabo to ɲa men xo: «Ala, í nanibaxolu la nanilolu lata nte xan.» 4Fen wo fen safeta Kitaabo to xa tanbi, a safeta le xa n naxaran, walasa muɲo nin Kitaabo be hakililasigo men dila, wo x'a tu n xa gigo soto. 5Ala, muɲo nin hakililasigo Mansaxe, xa benŋo ke alu te, í xo a xa di Isa Kirisita ɲen ɲa men. 6Nin wo keta, alu bee kafuninŋo xanbenninŋo si n Marigi Isa Kirisita Fa Ala tantu. 7Alu i ɲoxo muta bete í xo Kirisita x'alu muta ɲa men, walasa bunɲa xa la Ala xan. 8Ń b'a fola alu ɲen xo, Kirisita keta Yahudiyalu la baaradinŋo ti, walasa Ala xa lahido mennu ta i mamaxelu ɲen, wolu xa dafa. Wo ɲa ma, a xa Ala la xantigiya yita. 9Kirisita la na xa siya to dulu bula barako lala Ala ɲen a la hinno xanma, í xo a be safenin Kitaabo to ɲa men xo: «Wo xanma, ń be í tantula duniya siyalu to, xa donkilolu la xa í toxo bunɲa.» 10A be safenin du xo: «Siyalu, alu nin Ala la moxolu xa ɲaxali i ɲoxo fe.» 11Anin du xo: «Siyalu, alu bee xa Marigi tantu. Moxolu bee x'a tantu.» 12Kila Esayi du x'a fo xo: «Moxo do si bo Yese to. A si wuli xa siyalu mara. Siyalu s'i gigo la a xan.» 13Gigisigibaxo Ala xa ɲaxaliba nin heeraba di alu ma lannaya xono, walasa alu gigo xa bunɲa bete bete, Ni Senunŋo barako to. 14Ń badinŋolu, men mu alu la kuwo ti, ń fan be lanin a la xo ŋanneya betolu be alu la. Alu xa lonŋo bee soto. Alu s'a no du xa i ɲoxo tonben. 15Wo bee nin a ta, nte xa ń ja xoleya xa fenŋo dolu safe alu ɲen, walasa x'alu hakilo lajigi. Ń xa wo ke, bawo Ala x'a la neemo di ń ma, 16nin ń si ke Isa Kirisita la baaradinŋo ti siya tolu to. Ń be Ala la sadaxalasibaxaya baaro la, nin wo mu Ala la xibaru Dimanŋo folo ti. Ń be wo baaro la, walasa siya tolu xa ke í xo Ala diyanɲesadaxo, anin i xa ke a ta ti, Ni Senunŋo barako to. 17Wo to, nte be baaro men na Ala ɲen, ń si ń kunŋo xotota wo xanma, Isa Kirisita barako to. 18Ń me fatiya xa fusi fo xo ń x'a ke, fo Kirisita barako xa ń bula men kela, nin wo mu xa siya tolu lason Ala ma. Kirisita xa wo ke ń na xumolu la, anin ń na kewalolu la, 19anin taagumanseedolu nin kawakuwolu nin Ala Ni Senunŋo barako to. Wo ɲa ma, x'a damuta Yerusaleme ma, fo xa taxa a bula Iliri jamano la, ń xa Kirisita Xibaru Dimanŋo fo wo bee to, x'a dafa. 20Kirisita toxo man fo dula mennu folo, nte tun nte a fe xa Xibaru Dimanŋo fo dula xote nin non nelu nte. Ń xa wo ke walasa ń xana suwo lo do xote la damuto xan. 21Wo ɲa ma, men be safenin, ń xa wo dafa xo: «A la kuwo xibaro man fo mennu ɲen, wolu s'a je. Men tunnu man a la kuwo me, wolu s'a faamu.» 22Wo le xa ń bali sinɲa kiika ti xa taxa alu bata. 23Saasa, ń xa ń soto ń na baaro la ɲin jamana innu xono. A si san kiika bo saasa, a xa di ń ɲen xa taxa bo alu ma. 24Nin ń be taxala Esipaɲe jamano xan tumo men, ń b'a fe xa taxa alu je, walasa nin n xiide bota i ɲoxo la tumo men, alu xa ń deema xa taxa je. 25Bari saasa ń be taxala Yerusaleme, lannayabaxolu haajo ɲiɲa xanma. 26Bawo Maseduwane jamano nin Akayi jamano lannayabaxolu fannu x'a latege xa i bulu kafu i ɲoxo ma, x'a di Yerusaleme lannayabaxa segebaxantunŋolu ma. 27I fannu xa wo latege. I xa xan xa wo ke du, bawo Ala xa neemo men ke Yahudiya lannayabaxolu ɲen, itelu siya tolu xa do soto wo neemo to. Wo to, a xa xan i dulu xa Yahudiyalu deema i bulufenŋolu la. 28Nin ń xa wo kuwo ɲabo tumo men, xa wo nilifenŋo di, ń si taxa Esipaɲe. Ń taxato si bo alu bata la. 29Ń x'a lon xo nin ń be taxala alu bata, ń nin Kirisita la duwawo dafaninŋo le be taxala. 30Ń badinŋolu, ń be alu matarala n Marigi Isa Kirisita nin Ni Senunŋo la xanuya xanma, alu ń faasa, xa Ala matara ń ɲen. 31Alu Ala matara walasa ń xa kisi Yude maro lannayabalolu ma, anin ń be taxala nilifenŋo men dandanna Yerusaleme, wo xa diya je lannayabaxolu ɲen. 32Wo ɲa ma, nin Ala sonta, nte ɲaxalininŋo si si alu ma, xa ń tofoɲo alu bata waxati la. 33Heeratigi Ala xa ke alu bee fe. Amiini.

will be added

X\