ROMENGOLU 14

1Ń badinŋolu, moxo mennu be alu to, nin i barako xa doxo lannaya to, alu wolu mutakubete. Alu xana son x'e la miiriyalu sooso. 2Do be je, a la lannaya si a bula fenŋo bee domola. X'a tara do be je, a la lannaya la doxoya xanma, a me subu domo. 3Men si fenŋo bee domo no, wo xana subudomobalo doxoya. Subudomobalo du xana fenŋo bee domobaxo jalagi, bawo Ala x'a lamuta. 4Ite mu jon ti nin í be do xote la baarakedinŋo jalagila? A loninŋo tuta wo, a boyita wo, a marigi le kunku mu. A si tu lonin fan, bawo a sinŋo be Marigi ɲen x'a tu lonin. 5Do bulu, lunŋolu xa fisa i ɲoxo ti. Do xote bulu, i bee kilin. Bee xa ke í miiriya ti. 6Men be lunŋo do bunɲala, a b'a bunɲala Marigi le ɲen. Men be fen bee domola, a b'a domola Marigi le ɲen, bawo a be barako bulala Ala ɲen xa wo domo. Men nte fen bee domola, a be wo kela Marigi le ɲen. A du be barako bulala Ala ɲen. 7Alan si nte í nila n fannu ɲen. Alan si du nte sala n fannu ɲen. 8Nin alan be i nila, n be i nila Marigi le ɲen. Nin n sata, n sata Marigi le ɲen. N be i nila wo, n sata wo, n mu Marigi le ta ti. 9Bawo Kirisita sata le xa kuni, walasa a xa ke furelu nin nilamalu Marigi ti. 10Wo ɲa ma, mun na ite be í badinŋo jalagila? Mun na ite du be í badinŋo doxoyala? Alan bee si lo Ala ɲa xoto kiito xanma. 11Bawo a be safenin Kitaabo to xo: «Nte Marigi Nilama xo: Moxo bee si ɲongi nte ɲen. Nenŋo bee si Ala tantu.» 12Wo ɲa ma, alan bee fan si í ta laxali Ala ɲen. 13Wo xanma, alan xa fata i ɲoxo jalagila, bari alu a latege xo alu me fusi ke, men si alu badinŋo latakki, walla x'a laboyi. 14Ń x'a lon, Marigi Isa x'a lahenne ń ma, xo fen si nte je, nin a be noxonin a fan ma. Bari nin moxo do be fenŋo do jaatela xo a be noxonin, wo fenŋo be noxonin wo tigo le ɲen. 15Nin í la fen domota xa í badinŋo ladimin, wo xoto xo í nte í taxamala xanuya silo xan tugun. Kirisita sata moxo men ɲen, í la fen domota xana ke sabaabu ti xa wo sanko. 16Atelu be fenŋo men mafelela xo a xa ɲin atelu ɲen, wo xana ke jalagifen ti tolu bulu. 17Bawo Ala la Mansaya nte domoli nin minni ti, bari tilinninɲa nin heero nin ɲaxalo le mu, Ni Senunŋo barako to. 18Moxo men be baaro kela Kirisita ɲen ten, wo la kuwo xa di Ala ɲen. A si moxo dulu la toxoɲuma soto. 19Kuwo mennu si na heero ti, nin i si n bee lataxa ɲa lannaya to, alan x'a ŋinin xa wo lelu ke. 20Í xana Ala la baaro tiɲa domolifenŋo nofe. Tonɲa, fenŋo bee xa senu. Bari nin moxo do la domolifenŋo si ke sabaabu ti xa do lafili, wo xa jaxu. 21A xa ɲin í xana subu domo, í xana dolo min, í xa fenŋo bee tu je, men si ke sabaabu ti xa í badinŋo lafili. 22Lannaya men b'é la wo kuwolu to, wo xa tu í nin Ala te. Moxo men jusukunŋo nte a jalagila a la ku ketalu to, heero be wo ɲen. 23Bari moxo men be sikkala a la fen domotalu to, jalago be wo ma, bawo a man wo ke x'a la lannaya xan. Fen wo fen man ke x'a la lannaya xan, wo mu junubo le ti.

will be added

X\