ROMENGOLU 13

1Moxo bee xa xulu fangolu ɲen, bawo fanga nte je men man bo Ala la. Fango mennu be siginin, i sigibaxo mu Ala le ti. 2Wo le x'a tu, moxo men je fango sooso, wo xa Ala la ku lategeninŋo sooso. Mennu be i banna a ma, wolu si kiito lasi i fannu ma. 3Nin í be ɲuma kela, í silaku nte fankamalu ɲa, bari nin í be jaxumanŋo le kela, í xa xan xa sila i ɲa. Nin í nte a fe xa sila fango ɲa, ɲuma ke. Nin í xa ɲuma ke, í si a la toxo dimanŋo soto. 4Fango be Ala la baaro le la, walasa a x'é bula xa ɲuma ke. Nin í be jaxumanŋo kela, sila de; bawo fanŋo nt'a bulu gansan xa ɲangilo ke: A be Ala la baaro le la, walasa x'a la diminŋo yita kujaxukela la. 5Wo le x'a tu, alu xa xan xa xulu fango ɲen. A xana ke Ala la diminŋo ɲasilanɲa doron xanma, bari a xa ke jusukunɲumaya du xanma. 6Wo le du b'a tula, alu be sagallo sarala. Mennu be wo sagallo mutala, Ala le x'e bula wo baaro la, xo i x'a ke a ɲa ma. 7Moxo bee nin men xa xan, alu wo di wo ma. Alu sagallo di sagalletigo ma, xa sagallendinŋo di a mutabaxo ma. Alu xa xan xa sila men ɲa, alu sila wo ɲa. Alu xa xan xa men bunɲa, alu wo bunɲa. 8Moxo la julu xote xana ke alu la fo ɲoxoxano kilin. Katugu moxo men be a moxoɲoxo xanula, wo xa sariya dafa. 9Sariya mennu b'a fola xo: «Í xana jadoya ke, í xana moxo faxa, í xana suuɲali ke, í ɲa xana bo moxo la fen fe.» Anin wo tolu bee be ɲin sariya in ne xono xo: «Í xa í moxoɲoxo xanu í xo í fan.» 10Nin í b'é moxoɲoxo xanula, í me ku jaxu ke a la. Wo le xanma, moxo men b'a moxoɲoxo xanula, wo xa sariya muume le dafa. 11Alu wo xumo jaate bete, bawo alu fannu x'a lon xo n be waxato men to bi, wo xa xole: Alu kunitumo sita xa bo sinnoxo to. Alan nin kisilo xa sutu saasa xa tanbi n na lannaya ketumo xan. 12Suwo janfayata, saxuyelo sutiyata. Wo xanma, alan xa dibo kuwolu dabula, xa keneya kuwolu ta xa i ke n na kelekemiranŋolu ti. 13Alan x'e taxama taxamaɲa beto ma, í xo a xa xan xa ke ɲa men. Alan xa n fannu tanga domolibajaxo nin dolobaminŋo nin jadoya nin ku kabaninke nin kelo nin kiiliya ma. 14Alu Marigi Isa Kirisita jigolu dun alu la, í xo alu xannadoroko. Alu xana a lo alu fannu sago nofe tugun, x'alu fannu nidiyanɲekuwolu ke.

will be added

X\