ROMENGOLU 12

1Ń badinŋolu, Ala x'a la hinnayeba yita n na ɲa men, wo xanma ń be alu tonbenna xo alu x'alu fannu bee di Ala ma sadaxa nilama ti, men xa senu, men xa di Ala ɲen. Alu xa xan xa Ala batu ɲa men tigi tigi, wo ɲa le fele. 2Alu xana ɲin duniya in keɲa ta, bari alu a tu Ala x'alu yelema, xa hakili kuto di alu ma. Nin wo keta, alu si Ala sago lon: Men xa bete, men xa di a ɲen, anin men be dafanin. 3Ala x'a la so men xarifa nte ma a la neemo xanma, ń b'a fola alu bee ɲen xo: Alu xana alu fannu ke fen ti, x'a tara alu nte men ti. Bari alu kilin wo kilin xa í fan majigi x'é ben Ala la lannaya dinmaninŋo ma alu ma. 4N mu bala kilin ne ti. Bari dula kiika be dennin wo la. Wo dula bee nin a lodula le mu. 5Wo be ɲa men, haali x'a tara n lannayabaxo xa siya, n mu bala kilin ne ti n nin Kirisita la kafo fe. N bee du be dennin i ɲoxo la, í xo bala kilinŋo dulalu be dennin i ɲoxo la ɲa men. 6Solifenŋo mennu dita n bee kilin kilin ma, x'a la Ala la neemo xan, wolu nte kilin ti. Nin do la so keta kilaya ti, wo tigo xa xan xa wo ke lannaya to. 7Nin do xote la so keta don ti xa moxolu haajo ɲiɲa, wo xa wo ke. Men na so mu moxolaxaranŋo ti, wo xa laxaranno ke. 8Men na so mu xa moxo tolu tonben, wo xa moxolu tonben. Men be nilo kela, wo xa bo a bulo la. Men be ɲamoxoya kela, wo xa í jija wo ma. Men be segebaxantunŋolu deemala, wo xa wo ke ɲaɲo to. 9Xanuya xa ke x'a tara fulankafuya nte a to. Alu i ban jaxumanŋo to, x'e noto ku ɲuma la. 10Alu i ɲoxo xanu bete í xo badinmalu. Alu i jija x'e ɲoxo bunɲa. 11Alu ke baarala ti, alu xana ke salabaxantun ti. Alu baaro ke Marigi ɲen alu jusukunŋo bee la. 12Gigo men be alu la, alu ɲaxali wo xanma. Alu muɲa tooro xono, x'alu timinadiya Alamatara la. 13Alu badin lannayabaxolu deema sege xono, xa luntanŋolu jigiya. 14Alu duwa alu toorobaxolu ɲen. Alu duwawo ke, alu xana dangali ke. 15Alu ɲaxali ɲaxalibaxatolu fe, xa xasi xasibaxatolu fe. 16Benŋo xa ke alu nin i ɲoxo te. Alu xana alu fannu bunɲa. Bari alu son baara doxomandinŋolu ma. Alu xana alu fannu jaate moxo hakilitigilu ti. 17Alu xana moxo la jaxuman sara jaxuman na. Alu a ŋinin xa ɲuma ke moxo bee ɲa xoto. 18Nin alu fannu sinku b'a to, alu i jija benŋo xa ke alu nin moxo bee te. 19Ń na xanuninŋolu, alu fannu xana alu la julolu sara, bari alu a tu Ala x'a la diminŋo yita, í xo a be safenin Kitaabo to ɲa men xo: «Nte le mu tasarabaxo ti, nte si alu ta sara; Marigi xo ten.» 20«Nin xonxo be í jaxo la, domolo di a ma. Nin mindoxo b'a la, jiyo di a ma a x'é min. Nin í xa wo ke, a be le í xo í xa takenbo jurumi a kunŋo xan.» 21Jaxumanŋo xana í mano; bari jaxumanŋo mano ɲuma la.

will be added

X\