ROMENGOLU 11

1Wo tumo la, Ala x'é ban a la moxolu to le ba? Ayi de! A man í ban i to. Bawo nte fan mu Banisirayila dinŋo do le ti. Ń mu Burehima bonsonŋo do le ti. Ń bota Bensamen xabiilo to. 2Ala x'a la moxo mennu sugandi kabirin folofolo, a man í ban wolu to. Kila Eli x'a la jusuxaso fo Ala ɲen Banisirayila la kuwo to tumo men, Kitaabo be men fola non xan, alu hakilo nte wo la ba? 3A xo: «Marigi, i xa í la kilalu faxa, xa í la sadaxajanidulalu tiɲa. Nte kilinpe le tuta. I b'a fe xa nte du faxa.» 4Bari Ala x'a jaabi mun na? A x'a jaabi xo: «Ń xa xe wulu woorowula mara ń fan ɲen, mennu man i ɲongi bolibatuta Baali xoto.» 5Wo be ɲa men, a be ten bi du, i totuninŋolu be je, Ala xa mennu sugandi a la ɲumaya xanma. 6A xa i sugandi a la ɲumaya le xanma. A man i sugandi i la kebaara xanma; nin wo nte, Ala la ɲumaya tun me ke ɲumaya ti tugun. 7Wo falinta mun na? Banisirayila dinŋolu xa men ŋinin, i man wo soto. Ala la sugandininŋolu doron nelu x'a soto. I tolu jusukunŋo xoleyata, 8í xo Kitaabo x'a fo ɲa men xo: «Ala xa i hakilo dataxun, xa i ɲalu bali xa jelo ke, xa i tulolu sukki i xana meli ke, fo xa si bi ma.» 9Mansaxe Dawuda du x'a fo xo: «I la domololu xa ke i ɲen kalanŋo ti, xa ke i ɲen jala ti, men s'i laboyi, xa ke i la ku jaxolu sara ti. 10Ala mu dibo kela i ɲalu la, walasa i xana dula je. I xo xutuninŋo xa tu tuma bee.» 11Yahudiyalu takkininma, i boyimuumeta le ba? Ń be alu ŋininxala. Ayi de! Bari i la filo x'a tu siya tolu xa kisilo soto, walasa i ɲa xa bo siya tolu fe. 12Nin i la filo keta duniya ma nafaba ti, nin i la majigo le keta sabaabu ti xa nafaba lasi siya tolu ma, nin i bee x'e koppa Ala ma dun? Wo nafa me bunɲa bete bete ba xa tanbi folo xan? 13Ate mennu nte Yahudiya ti, ń be men fola silan, ń b'a fola alelu ɲen. Ala xa nte ke siya tolu la kiladinŋo ti. Nte be ɲaxalila wo baaro xanma, 14walasa xa ń na siya moxolu lakiiliya, nin dolu si kisi i to. 15Ala xa Yahudiyalu bula senbo to, wo le nata benŋo ti a nin duniya to te. Awa, nin Ala x'a xofele i ma, mun si ke wo to? Wo si ke sabaabu ti furelu xa kuni xa bo saya to. 16Nin buurukun folo dita Ala ma sadaxo ti, buuro to bee du xa senu. Nin yiro lillolu dita Ala ma, a bulo dulu xa senu. 17Banisirayila be le í xo yiri tutuninŋo do, nin wo be kilila xo oliwejuwo. Ala xa bulo dolu tege xa bo a la, xa ite noto wolu no to, ite men nte Yahudiya ti. Ite be le í xo wulaxono oliwejuwo bulo. Jiyo men be bola oliwejuwo lillolu to xa yele, í du be do sotola wo to saasa. 18Í xana í fan fisiya wo bulolu ti, mennu tegeta. Nin í be í fan xutula, a lon de xo lilli nte dennin ite la; ite le be dennin lillolu la. 19Ń x'a lon í si don fo no ń ɲen xo: «Wo bulolu tegeta le, walasa nte xa noto i no to.» 20Tonɲa le mu, i tegeta i la lannayabaliya le xanma. Ite notota wolu no to í la lannaya le xanma. Bari í xana í wasu i la; sila le! 21Bawo nin Ala man oliweju tutuninŋo fan bulolu tu je, a me ite du tu je. 22A jaate muta, Ala b'a la ɲumaya nin a la fatiya yitala i ɲoxo la ɲa men: Mennu boyita, a xa fati wolu ma. A xa ɲin ite ma. Bari fo í yilo xa tu a la ɲumaya ma le; nin wo nte, a s'í du tege í xo yiribulo. 23Nin Banisirayila dinŋo dulu man tu lannayabaliya xono, i si noto i no to tugun, bawo a sinŋo be Ala ɲen x'e noto tugun. 24Ite men tegeta xa bo wulaxono oliwejuwo la, xa na í noto oliweju soobe ma, x'a tara í nin wo nte kilin ti; wo mennu mu oliwebulu soobelu ti, wolu noto me diya i fannu juwo ma ba? 25Ń badinŋolu, ń nte a fe ɲin gulle in xa tu alu ma duguwo to, walasa alu xana alu fannu jaate hakilitigolu ti: Banisirayila moxo dolu jusukunŋo si tu xoleyanin fo siya tolu to moxo kisitalu xa dafa tumo men. 26Wo to, Banisirayila dinŋolu bee si kisi, í xo Kitaabo x'a fo ɲa men xo: «Kisibaxo si na xa bo Siyon. A si lannayabaliya bo Yaxuba bonsonŋo to. 27Ń be nala Kafuxanŋo men kela ń nin i te, nin ń x'e la junubolu bo je tumo men, wo le fele.» 28xibaru Dimanŋo boxo la, i keta Ala jaxolu ti, bawo i xa i ban a to. Wo keta alu siya tolu ma nafa ti. Bari Ala la sugandilo boxo la, Ala b'e fe i mamaxelu la kuwo xanma. 29Bawo Ala je fenŋo men di, a nte í yelemala wo ma tugun x'a ta. Nin a xa moxo kili ku do xanma, a nte wo bola a ma. 30Xotonin, alu tunnu nte Ala foxanŋo mutanin, bari saasa alu xa Ala la hinno lon, bawo Yahudiyalu x'a foxanŋo bula. 31Wo ɲa ma, saasa i dulu xa Ala foxanŋo bula, walasa alu xa Ala la hinno men soto, wo xanma, hinno xa ke i dulu la. 32Bawo Ala xa moxolu bee tu je i x'e ban folo, walasa xa hinna i bee la. 33Ala la fenbeetigiya nin a la hakilitigiya, nin a la lonŋo danŋo me je no. Jon si a la ku lategeninŋolu ɲa fo no? Jon si a la silolu faamu no? 34Í xo Kitaabo x'a fo ɲa men xo: «Jon xa Marigi miiriya lon? Jon keta a tonbenbaxo ti? 35Jon folo xa fen di a ma, nin a be wo bululasaagila?» 36Bawo fenŋo bee bota ate le bulu. Fenŋo bee be je ate le barako to. Fenŋo bee be ate le ɲen. Barako xa la Ala ɲen fo abada! Amiini.

will be added

X\