ROMENGOLU 10

1Ń badinŋolu, men be ń niyo ma, nin ń be Ala matarala Yahudiyalu ɲen wo la, wo mu le xo i xa kisi. 2Ń s'i seedeya, xo i be jijanin Ala kuwo to. Bari i man a ɲa lon. 3I man a faamu Ala be a la tilinninɲa dila moxolu ma ɲa men. I xa tilinninɲa ŋinin i fannu barako la. Wo la, Ala be tilinninɲa dila moxolu ma ɲa men, i man son wo ɲa ma. 4Kirisita le keta sariya dafa ti; walasa moxo wo moxo lata a la, wo xa Ala la tilinninɲa soto. 5Moxo si Ala la tilinninɲa soto sariya la ɲa men, kila Musa xa wo safe ten xo: «Moxo men je sariya la folu latimme, wo si nilamaya wolu fe.» 6Ala si tilinninɲa di moxo ma lannaya la ɲa men, wo ɲa safeta ten xo: Í xana a fo í xonoto xo: «Jon si yele xa taxa sanŋo to n ɲen?» Wo xoto le, xa Kirisita lajigi. 7Walla xo: «Jon si jigi duguxulo xoto n ɲen?» Wo xoto le, xa Kirisita lawuli xa bo saya to. 8Ala la xumo be mun ne fola? A xo: «Xumo be í senbo to, a be í da la, a be í jusukunŋo la.» Wo xumo mu lannaya xumo le ti, n be men waajula. 9Nin í x'a fo í da la xo Isa le mu Marigi ti, anin nin í lata a la í jusukunŋo la xo Ala x'a lakuni xa bo furelu to, í si kisi. 10Bawo nin í xa lannaya ke í jusukunŋo la, í si Ala la tilinninɲa soto. Nin í x'a la kuwo fo í da la, í si kisi. 11A be í xo Kitaabo x'a fo ɲa men xo: «Moxo wo moxo je la Marigi la, wo tigo me malu abada.» 12Faranfansi nte Yahudiyalu nin siya tolu te. I bee be Marigi kilin ma. Moxo wo moxo je a toxo kili, a si a la ɲumaya yita wo tigo la. 13Bawo Kitaabo b'a fola xo: «Moxo wo moxo je Marigi toxo kili, wo si kisi.» 14Bari i si a toxo kili ɲa di, x'a tara i man la a la? I si la a la ɲa di, x'a tara i man a toxo me? I si a toxo me ɲa di, nin moxo man i waaju? 15I si waajulo ke ɲa di, nin i man ki? A be í xo a be safenin Kitaabo to ɲa men xo: «Mennu be nala xibaru dimanŋolu fola, wolu la samataxanŋo xa di.» 16Bari moxolu bee man son xibaru Dimanŋo to. Kila Esayi xa wo le fo xo: «Marigi, n xa xumo men fo, jon lata wo la?» 17Wo ɲa ma, lannaya be sotola Xibaru Dimanŋo lamelo le fe. Wo Xibaru Dimanŋo mu Kirisita la xumo le ti. 18Nte be ŋininxalo kela xo: Yahudiyalu man wo xibaro me ba? I x'a me le de! Kitaabo b'a fola xo: «I xanmeta duguxulo dula bee. I la xumolu sita duniya danŋo ma.» 19Ń be ŋininxalo kela tugun xo: Banisirayila dinŋolu man a faamu le ba? Kila Musa folo xa jaabo men di wo to, wo fele: Ala xo: «Siya men man jaate, ń si wo ke x'alu lakiiliya. Ń si siya hakilintanŋo ke, x'alu ladimin.» 20Wo xo du, kila Esayi fatiyata x'a fo Ala la xan to xo: «Men tunnu nte ń ŋininna, wolu xa ń je. Men tunnu nte nte la kuwo maŋininxala, nte xa ń yita wolu la.» 21Bari a xo Banisirayila la kuwo to xo: «Ń xa tilo ban ń bulo lola siya murutininŋo nin siya banninŋo ɲen.»

will be added

X\