ROMENGOLU 1

1Nte Poli, men mu Isa Kirisita la jonŋo ti, ń be ɲin safe in kila alu ma. Ala xa ń kili xa ń ke a la kiladinŋo ti. A xa ń sugandi x'a la xibaru Dimanŋo fo. 2Ala tun xa wo Xibaru Dimanŋo lahido ta a la kilalu da la, Kitaabu senumanŋolu to kabirin waxati jan. 3Xibaru Diman in be Ala Dinxe le xan, nin wo mu n Marigi Isa Kirisita ti: Hadamadinɲa silo la, a bota mansaxe Dawuda to. 4Ni Senunŋo fe, Ala x'a yita xo a Dinxe barakema le mu, a kunita tumo men xa bo furelu to. 5Isa barako to, ń xa Ala la neemo soto xa ke a la kiladinŋo ti, walasa siyalu bee xa lannaya ke, xa Ala foxanŋo muta. 6Atelu Romenga lannayabaxolu, Isa Kirisita xa atelu mennu kili, alu dulu keta wo siyalu do ti. 7Ala la xanuninŋo fen wo fen be Rome, a x'alu kili walasa alu xa ke a ta ti. N Fa Ala, anin Marigi Isa Kirisita xa neemo nin heero ke alu ɲen. 8Ń be folola xa barako bula Ala ɲen Isa Kirisita barako to alu bee ɲen, bawo alu la lannaya xibaro meta duniya bee xono. 9Nte be Ala men batula ń jusukunŋo la, x'a Dinxe xibaru Dimanŋo fo, wo mu nte seede ti, xo nin ń b'a matarala tuma bee, ń hakilo be tula alu kun. 10Nte be Ala tarala tuma bee, xo nin a sago le mu, a x'a tu nte xa taxa bo alu ma. 11A loxoba be ń na x'alu je, walasa ń xa Ni Senunŋo la solifenŋo do lasi alu ma, nin do si kafu alu barako ma lannaya to. 12Wo xoto xo n bee xa xan lannaya men to, n s'i ɲoxo jusudun wo lannaya to. 13Ń badinŋolu, ń b'a fe alu x'a lon xo sinɲa kiika ti, ń x'a ŋanne xa taxa alu je, bari haalibi, ń man taxa no. A diyata ń ɲen ń na baaro no xa je alu dulu bata, í xo a no jeta siya tolu bata ɲa men. 14Moxo bee la julo be nte la, bawo ń xa xan xa Xibaru Dimanŋo lasi bee ma: Dugubaxono moxolu anin wulaxono moxolu, moxo xaranninŋolu nin xaranbalolu. 15Wo xanma, a xa di nte ɲen bete xa Xibaru Dimanŋo fo atelu Romengo dulu ɲen. 16xibaru Dimanŋo fo maluya nte nte la, bawo sintigiya le mu Ala bulu, men be lannayabaxolu bee kisila; Yahudiyalu folo, wo xo siya tolu. 17Xibaru Dimanŋo b'a yitala Ala be moxolu jaatela moxo tilinninŋo ti ɲa men. A be sotola lannaya doron ne fe kabirin folofolo fo labanŋo la, í xo Kitaabo x'a fo ɲa men xo: «Moxo men xa tilinninɲa soto lannaya fe, wo si nilamaya.» 18Ala b'é tunin sanŋo to x'a la diminŋo yita moxolu la, i la Alaɲasilanɲabaliya nin i la tilinbaliyakuwolu bee xanma, wo mennu be ku tilinbalolu kela xa tonɲa tu duguwo to. 19Bawo moxo xa xan xa men lon Ala kuwo to, wo be xoyiyanin i ma. Ala fan ne xa wo yita i la. 20Kabirin duniya da tumo, Ala la mansabunɲa kuwo mennu mu jebalo, wolu si lon a la kebaarolu ma. Wolu mu a la sintigiya banbalo nin a la Alaya le ti. Wo xanma, jalago me bo no hadamadinŋolu ma. 21Bawo i xa Ala lon, bari i man a bunɲa í xo a xa xan xa bunɲa ɲa men. I man barako du bula a ɲen. I xa miiriya kuntanŋo lelu ta. I la hakilintanɲa xa dibo bula i sondonmo la. 22I be i fannu jaatenin hakilima ti, x'a tara hakilintanŋo lelu mu. 23Jannin i xa Noorotigi Ala batu, wo men nte sala, i xa wo tu je, xa yiri moxoma lelu batu, mennu mu moxo sata mununŋo ti, anin xonolu nin sinnaanimafenŋolu nin fenŋo mennu b'e fuufula mununŋo. 24Wo le xanma, Ala x'e tu je, i xa ku noxoninŋolu ke, x'a la i jusukunŋolu diyanɲo xan, fo i xa tango bo i ɲoxo balo xan. 25I xa Ala la tonɲa falin faniya la, xa dafenŋolu batu xa baaro ke i ɲen, xa Dabaxo tu je, tanto be ate men ɲen fo abada. Amiini! 26Wo xanma, Ala x'e tu i maluku negolu bulu. I la musolu xa musu nin xeya silo bula x'e ɲoxo ŋinin. 27Xe dulu xa musolu tu je xa fendun i ɲoxo nofe. Xe nin xe kafuta xa kukebalo ke. I fannu x'e la fendunŋo sara soto. 28I man son xa Ala lon. Wo xanma Ala x'e tu i la miiriya jaxolu xono walasa i xa ku kebalolu ke. 29I xono be fanin tilinbaliya sifa bee la, anin jaxuya nin wasabaliya, nin feere jaxo. I jusukunŋo be fanin kiiliya nin moxofaxo nin kelejaliya nin nanbaranteya nin korojugaya nin naafigiya la. 30I be i ɲoxo toxojaxo fola. Ala jaxo lelu mu. Xumakumanfo nin fanbunɲa nin wasubaxanteya xa di i ɲen. I be ku jaxo sifa bee feero darala. I man xulu i wulubaxolu ɲen. 31Hakili nte i la, xantigilu nte, i xa xole, hinnaye nte i la. 32I xa Ala la kiito lon tigi tigi wo kuwolu xan. I x'a lon xo i kebaxolu nin saya le xa xan. Bari haali wo, i be wo kuwolu kela. Wo doron nte, men dulu b'e kela i be wolu jusudunna.

will be added

X\