YITALOLU 9

1Meleke luulunanŋo x'a la buutuwo fo. Nte xa loolo do je, men butunta duguxulo xan xa bo sanŋo to. Dinxajironba danjebalo xolonŋo xundinŋo dita a ma. 2A xa dinxajironba danjebalo xolonŋo dayele. Siisiyo do bota non xono, men be í xo wureba siisiyo. Tilo nin foɲo finta wo siisiyo bulu. 3Tonŋolu bota wo siisiyo to xa jenjen duguxulo xan. Sinŋo dita wolu ma, men nin duguxulo xan dondonkoɲelu ta bee xa xan. 4A fota i ɲen x'e xana fusi ke duguxulo binŋo la, i xana fusi ke fen kerenŋolu la, i xana fen ke yiriju si la, fo moxolu doronnu, Ala la taagumanseedo nte mennu foda la. 5I man yanmaru xa moxolu faxa, bari i yanmaruta le x'e ɲaaga xaru luulu xono. I la bunnida diminŋo be le í xo dondonkoɲe bunnida diminŋo. 6Wo lunŋolu, moxolu si saya laŋinin, bari i me a soto. I si a ŋanne xa sa, bari saya si í bori i ma. 7Wo tonŋolu tunnu be bonin suwolu fe, mennu be tobennin kelo xanma. Fen dolu be i kunna a be í xo mansakufune sanumalu. I ɲadalu be í xo hadamadinŋo ɲada. 8I kunsinolu be í xo musu kunsinolu, i ɲinŋolu be í xo waraba ɲinŋolu. 9I xaradalu be í xo negedoroko b'e ma, i danfatanŋolu mankanŋo be í xo su wuturu kiika taxato be keledula. 10Xu sulenninŋolu b'e ma í xo dondonkoɲelu. Sinŋo tun be i xuwo lelu to xa diminŋo lasi moxolu ma xaru luulu xono. 11I la mansaxe mu dinxajironba danjebalo melekiyo le ti, men toxo heburuxanŋo to xo «Abadon», gerekixanŋo to xo «Apoliyon». Wo xoto xo «Halagilila». 12Bone folo tanbita, wo tanbo xo, bone fula xote fele nanin tugun. 13Meleke wooronanŋo x'a la buutuwo fo. Ń xa xumaxanŋo do me, xa bo sadaxajanilan sanuma tulukunŋolu la, men be Ala ɲafe. 14A tun b'a foxan meleke wooronanŋo ɲen, buutuwo tun be men bulu xo: «Meleke naano bula, mennu be sitinin joloxo la, ba belebeleba da la, xo Efarati.» 15Wo meleke naano men tunnu be tobennin ɲin san in, nin ɲin xaru in, nin ɲin lun in, nin ɲin leere in xanma, wolu firinta, walasa moxolu talaninŋo saba ti, i xa tala kilinŋo faxa. 16Keledinŋolu men tunnu be suwo xan, ń xa wolu jaate me xo: Miliyon keme fula. 17Suwolu nin i yelenxanbaxolu nata nte ma ɲa men, ń na jelo xono, wo fele: Negedorokolu tunnu be i xarada ma, mennu be wulenin í xo ta, i be buloyanin í xo safirekuro, i be netemunguyanin í xo tinbiritiyo. Suwolu kunŋolu tunnu be le í xo waraba kunxulo, ta nin siisiyo nin tinbiritiyo tun be bola i da xono. 18Duniya moxolu talaninŋo saba ti, tala kilinŋo faxata wo kasaare sabo fe, nin wolu mu ta nin siisiyo nin tinbiritiyo ti, men tunnu be bola suwolu da xono. 19Suwolu barako be i da nin i xuwo lelu to. I xuwolu be í xo salu. Kunxulo be wo xuwolu ma, i si ku jaxo ke no mennu la. 20Men ken mu duniya moxo tolu ti, kasaaro man mennu faxa, wolu man nimisi i bulo la fen daraninŋolu la. I taxata ɲa xa jinnolu nin boli sanumalu, nin a xaalisixoyimalu, nin a silamalu, nin a kurumalu, nin a yirimalu batu, mennu me jeli ke no, i me meli ke no, i me i taxama no. 21I man nimisi i la moxofaxolu nin i la suuya nin i la jadoya nin i la suuɲalolu la.

will be added

X\