YITALOLU 8

1Saaxandinŋo xa buluno woorowulananŋo bo je tumo men, de keta sanxulo to xa leere tala ɲoxon ke. 2Wo xo, ń xa meleke woorowulo je, i be lonin Ala ɲa xoto. Buutu woorowula dita i ma. 3Melekiyo do xote nata í lo sadaxajanilanŋo senbo to, siisilitegenen sanuma tun b'a bulu. Digico kiika dita a ma, walasa a xa wo nin moxo senumanŋolu bee la Alamataralu lasi i ɲoxo fe, sadaxajanilan sanuma xan, men be mansasigilanŋo ɲafe. 4Digice siisiyo nin moxo senumanŋolu la Alamataralu yeleta i ɲoxo fe Ala ɲa xoto, xa bo melekiyo bulu. 5Wo to, melekiyo xa siisilitegenenŋo ta x'a fa sadaxajanilanŋo ta la, x'a bon duguxulo xan. Wo no bee to, sanjifetenŋo nin xumaxanŋolu nin sanjimeɲenxolu nin duguxulu jarajaro keta. 6Buutu woorowulo tunnu be meleke woorowulo mennu bulu, wolu x'e toben buutufo xanma. 7Meleke folo x'a la buutuwo fo. Maramallekeso nin ta nin jelo ɲaxamininŋo bonta duguxulo xan. Duguxulo talaninŋo saba ti, tala kilinŋo janita, yirijuwolu dulu talaninŋo saba ti, tala kilinŋo janita anin bin kerenŋo bee. 8Meleke fulananŋo x'a la buutuwo fo. A keta í xo nin í xa kuru belebeleba nin ta fili xooxojiyo to. Xooxojiyo talaninŋo saba ti, tala kilinŋo yelemata xa ke jelo ti. 9Xooxojiyo dafen nilamalu talaninŋo saba ti, tala kilinŋo sata, batonŋolu talaninŋo saba ti, tala kilinŋo bee tiɲata. 10Meleke sabananŋo x'a la buutuwo fo. Loolo belebeleba do butunta xa bo sanŋo to, a be manala í xo mooɲo. Bajiyolu talaninŋo saba ti, a butunta tala kilinŋo to anin jibodulalu to. 11Wo loolo toxo le xo: «Xuniya». Jiyolu talaninŋo saba ti, tala kilinŋo xuniyata, moxo kiika sata jiyolu la xuniya bulu. 12Meleke naaninanŋo x'a la buutuwo fo. Tilo nin xaro nin loololu talaninŋo saba ti, tala kilinŋo yellata. I talaninŋo saba ti, tala kilinŋo dibita. Tilo keneya talaninŋo saba ti, tala kilinŋo bota a la, suwo du keta ten. 13Wo to, nte xa felelo ke, ń xa bonŋo do me a fola barako to, x'a tu banin sanjanba to xo: «Bone! Bone! Bone be duguxulo xan moxolu ɲen, nin meleke to sabo x'e la buutuwolu fo tumo men!»

will be added

X\