YITALOLU 7

1Wo xofe, ń xa meleke naani je, i be lonin duguxulo tonxon naano to. I tunnu be duguxulo foɲo naano mutanin, walasa foɲo si xana tege duguxulo nin xooxojiyo xan anin yiriju si xan. 2Nte xa meleke xote je, a be bola koton mafanŋo, Ala nilama la bulunokelanŋo b'a bulu. A fetenta meleke naano la, sinŋo tun dita mennu ma xa ku jaxo ke duguxulo nin xooxojiyo la, a xo: 3«Alu xana kujaxu ke duguxulo nin xooxojiyo nin yirijuwolu la, jannin n be taagumanseedo kela n na Ala la jonŋolu foda la.» 4Taagumanseedo keta moxo mennu foda la Banisirayila dinŋolu xabiilolu bee to, ń xa wolu jaate me xo: Wulu keme nin tan naani wulu nin wulu naani. 5Yuda xabiilo la, taagumanseedo keta wulu tan nin fula la; Ruben xabiilo la, wulu tan nin fula; Gadi xabiilo la, wulu tan nin fula; 6Asere xabiilo la, wulu tan nin fula; Nefutali xabiilo la, wulu tan nin fula; Manase xabiilo la, wulu tan nin fula; 7Simeyon xabiilo la, wulu tan nin fula; Lewi xabiilo la, wulu tan nin fula; Isakari xabiilo la, wulu tan nin fula; 8Sabulon xabiilo la, wulu tan nin fula; Yusufu xabiilo la, wulu tan nin fula; Bensamen xabiilo la, wulu tan nin fula, taagumanseedo keta mennu la. 9Wo xofe, nte xa felelo ke xa jamaba je, moxo si tun me men jaate no. Wo moxolu mu siyalu bee nin xabiilolu bee nin jamanolu bee nin xanŋolu bee do moxo lelu ti. I tunnu be lonin mansasigilanŋo nin Saaxandinŋo ɲafe, dorokeba xoyolu b'e xanna, tamarabulolu b'e bulu. 10I tunnu be fetenna barako to xo: «Kisilo mu n na Ala le ta ti, men be siginin mansasigilanŋo xan, anin Saaxandinŋo!» 11Melekiyolu bee tunnu be lonin xa mansasigilanŋo nin moxobalu anin fen nilama naano laminin. I x'e boyi i ɲadalu xan dugo ma, mansasigilanŋo ɲafe, xa Ala batu. 12I tunnu b'a fola xo: «Amiini! Tantulo nin nooro nin hakilitigiya nin barakebulo nin bunɲa nin sintigiya anin barako mu n na Ala le ta ti, fo abada! Amiini!» 13Wo to, moxobalu do xa xumo ta x'a fo ń ɲen xo: «Dorokeba xoyo be mennu xanna, wolu mu jonnu ti, anin i be bola minto?» 14Ń x'a jaabi xo: «Ń Marigi, ite le xa wo lon.» A xo ń ɲen xo: «Mennu bota tooroba xono, wo lelu mu. I x'e la dorokebalu ku x'e laxoyiya Saaxandinŋo jelo la. 15Wo le x'a tu, i be lonin Ala la mansasigilanŋo ɲafe x'a batu su nin tili, a la batusuba xono. Mansasigilanŋo tosigibaxo si i lasawu a la tilliso xono. 16Xonxo me i muta tugun, mindoxo me i muta tugun, tilo nin a funtano me i jani tugun, 17bawo Saaxandinŋo men be mansasigilanŋo temo to, wo si ke i negaanibaxo ti, a si taxa i ti nilamaya jiyo bodulalu. Ala si ɲajiyo bee fita x'a bo i ɲalu la.»

will be added

X\