YITALOLU 6

1Wo xo, ń xa Saaxandinŋo je, a xa bukko buluno woorowulolu to folo bo je. Ń xa fen nilama naanolu to kilin xanme í xo sanjifetenŋo, a xo: «Na!» 2Nte xa felelo ke, ń xa su xoyo do je. Xalo tun be a xan sigibaxo bulu. Mansakufuno do dita a ma. A sintigima le taxata walasa xa sinŋo soto tugun. 3Saaxandinŋo xa buluno fulananŋo bo je tumo men, ń xa fen nilama fulananŋo xanme a fola xo: «Na!» 4Wo to, suwo do xote bota, wulemanŋo le mu. Men tun b'a xan, sinŋo dita wo ma xa heero bee bo duguxulo xan, walasa moxolu x'e ɲoxo faxa. Fan janjamanŋo dita a ma. 5Saaxandinŋo xa bukko buluno sabananŋo bo je tumo men, ń xa fen nilama sabananŋo xanme a fola xo: «Na!» Nte xa felelo ke, ń xa su finmanŋo do je. Men tun be siginin a xan, sumannikelanŋo le tun be wo bulu. 6Ń xa xanŋo do me í xo xumaxanŋo, fen nilama naano temo to, a tun b'a foxan xo: «Alixaamo kilo kilin mu tili kilin baaro sara le ti. Ɲo kilo saba mu tili kilin baaro sara le ti. Bari í xana maxa tulo nin dolo la.» 7Saaxandinŋo xa bukko buluno naaninanŋo bo je tumo men, ń xa fen nilama naaninanŋo xanme a fola xo: «Na!» 8Ń xa felelo ke, ń xa su ɲugujilama do je. Men tun be a xan, wo toxo le xo Saya, lahara tun be a nofe. Duguxulo talaninŋo naani ti sinŋo dita i ma tala kilinŋo xan, walasa i xa moxolu faxa fanŋo nin xonxo nin foɲojangaro anin duguxulo xan wara jaxolu la. 9Saaxandinŋo xa bukko buluno luulunanŋo bo je tumo men, nte xa moxolu niyolu je sadaxajanilanŋo xoto, mennu faxata Ala la xumo nofe, anin i xa seedeyalo men ke nofe. 10I tunnu be kulela barako to xo: «Marigi senumanŋo, anin tonɲatigo, fo tuma joman í be tula í man kiito tege duguxulo moxolu xan, xa n jelo bonno julo sara?» 11Dorokeba xoyimanŋo dita i bee ma, anin a fota i ɲen xo i xa i ɲoɲo dondin haalisa, fo i baaradin toɲoxolu nin i badinŋolu moxo xa dafa tumo men, mennu xa xan xa faxa, í xo itelu fannu faxata ɲa men. 12Saaxandinŋo xa bukko buluno wooronanŋo bo je tumo men, ń x'a je xo duguxulu jarajaraba keta. Tilo finta í xo furuja faano, xaro muume wuleta í xo jelo. 13Loololu butunta dugo ma xa bo sanŋo to, í xo foɲoba be turojuwo lamaxala ɲa men x'a din kerenŋolu labon. 14Sanxulo sankota í xo bukke mininta be mininna ɲa men. Kurolu nin jisuttolu bee bota i nolu to. 15Duguxulo mansaxelu nin fangatigolu nin sorodasi kuntigolu, nin naafulutigolu, nin baraketigolu anin moxo tolu bee, jonŋolu nin hoorolu, i bee x'e dugu kuruwuwolu xono anin kurolu to. 16I x'a fo kurolu nin gojelu ɲen xo: «Alu boyi n to, xa n dugu mansasigilanŋo tosigibaxo ɲada ma anin Saaxandinŋo la diminŋo ma; 17bawo i la diminŋo lunba sita. Jon si bo no a xono?»

will be added

X\