YITALOLU 5

1Ń xa bukke mininninŋo je mansasigilanŋo xan sigibaxo kininbulo to, a xo nin a ɲa be safenin. A be dataxunnin. Buluno woorowula be a xan. 2Ń xa meleke barakema do je, men tun be fetenxan x'a fo xo: «Jon nin a xa xan xa bulunolu bo je, xa bukke in dayele?» 3Bari moxo si tun nte sanxulo to, anin duguxulo xan, anin duguxulo xoto, a sinŋo tun be men ɲen xa bukke in dayele, walla x'a mafele. 4Nte tun be xasila bete, bawo moxo si man tara je men tun nin bukke in dayelelo xa xan walla x'a mafele. 5Wo to, moxoba do xo ń ɲen xo: «Xana xasi. A mafele: Yuda xabiilo waraba, mansaxe Dawuda tobo xa sinŋo soto. A si buluno woorowulo bo je, xa bukko dayele.» 6Ń xa Saaxandinŋo do je lonin mansasigilanŋo nin fen nilama naano nin moxobalu temo to. A tun be í xo a faxata. Biɲa woorowula tun b'a ma anin ɲakese woorowula, nin wolu mu Ala Ni woorowulo ti, mennu kita xa taxa duguxulo bee xan. 7Saaxandinŋo x'é sodun xa bukko muta mansasigilanŋo tosigibaxo kininbulo to. 8A xa bukko muta tumo men, fen nilama naano nin moxoba muxan nin naano x'e ɲongi Saaxandinŋo xoto. Kontinŋo be i bee bulu, anin sanu felinŋolu, mennu be fanin digico la, wo digico mu moxo senumanŋolu la Alamatara lelu ti. 9I tunnu be donkili kuto laxan xo: «Í nin a xa xan xa bukko muta, x'a bulunolu bo je; bawo í faxata, í x'é jelo ke xa moxolu kunbo Ala ɲen, xa bo xabiilolu nin xanŋolu nin jamanolu nin siyalu bee to. 10Í x'e ke mansaya, nin sadaxalasibaxolu ti, n na Ala ɲen. I si sigi mansaya la duguxulo kunna.» 11Wo xofe, ń xa meleke kiika xanme i be mansasigilanŋo nin fen nilama naano nin moxobalu lamininnin. Wolu jaate tun mu wulu tan wulu tanŋo lelu ti anin wulu wulolu. 12I tunnu b'a fola barako to xo: «Saaxandinŋo men faxata, wo nin sintigiya nin fentigiya nin hakilitigiya anin barako nin bunɲa nin nooro nin tantulo xa xan!» 13Dafenŋo fen wo fen be sanxulo to, anin duguxulo xan, anin duguxulo xoto, anin xooxojiyo to, dafenŋolu bee, nte xa wolu me a fola xo: «Men be siginin mansasigilanŋo xan anin Saaxandinŋo, tantulo nin bunɲa nin nooro anin sintigiya be wolu ɲen fo abada!» 14Fen nilama naano tunnu b'a fola xo: Amiini! Moxobalu x'e ɲongi xa batulo ke.

will be added

X\