YITALOLU 4

1Wo tanbo xo, ń xa jeli xote ke: Ń xa da do yeleninŋo je sanxulo to. Ń tun xa xumaxan folo men me xumala ń ɲen, nin a be í xo buutu xanŋo, wo xo ń ɲen xo: «Yele jan, men be nala kela wo xofe, ń si wo yita í la.» 2Wo no bee to, Ni Senunŋo jigita nte to. A fele, mansasigilanŋo do tun be sanxulo to. Do tun be siginin wo mansasigilanŋo xan. 3Men tun be siginin wo xan, wo tun keɲa be í xo kuru daxolenŋo dolu: Jasipekuro anin saraduwanekuro. Mansasigilanŋo tun be lamininnin Ala la fanŋo la, men tun be ŋelenxula í xo emerodekuro. 4Mansasigilan muxan nin naani tun be wo mansasigilanŋo lamininnin. Moxoba muxan nin naani tunnu be siginin wo mansasigilanŋolu xan. Faanu xoyimanŋolu b'e ma. Mansakufune sanuma be i kunna. 5Sanjimeɲenxolu nin xumaxanŋolu nin sanjifetenŋolu tunnu be bola mansasigilanŋo xan. Mooɲo mananin woorowula tunnu be mansasigilanŋo ɲafe: Wolu mu Ala Ni woorowulo lelu ti. 6Mansasigilanŋo ɲafe tun be í xo xooxoji weerema, a be í xo kuro men be ŋelenxula. Fen nilama naani tunnu be mansasigilanŋo temo to anin a lamininŋo to. Wolu ɲafela nin i xofela bee faninŋo be ɲakesolu la. 7Fen nilama folo be í xo waraba, fulananŋo be í xo tuurandinŋo, sabananŋo ɲada be í xo hadamadinŋo, naaninanŋo be í xo bonŋo baninŋo. 8Danfatan wooro tun be wo fen nilama naano kilin wo kilin ma, mennu boxo bee nin i xoto be fanin ɲakesolu la. Suwo nin tilo, i nte fatala a fola xo: «Senumanŋo, senumanŋo, senumanŋo, Marigi Ala, Sinŋobeetigo, men tun be je, men be je, anin men be nala.» 9Tuma wo tuma, nin fen nilama naano be donkilo lala xa mansasigilanŋo tosigibaxo tantu, x'a bunɲa anin xa barako la a ɲen, ate men be í nila fo abada, 10wo tuma, moxoba muxan nin naano si i ɲongi mansasigilanŋo tosigibaxo xoto x'a batu, wo men be í nila fo abada. I si i la mansakufunolu fili mansasigilanŋo xoto x'a fo xo: 11«N Marigi nin n na Ala, í nin nooro nin bunɲa nin sintigiya xa xan; bawo ite le xa fenŋo bee da. A diyata í ɲen i xa ke je, wo to i data.»

will be added

X\