YITALOLU 3

1«A safe Sarade Ala la jama melekiyo ɲen xo: «Ala Ni woorowulo, anin loolo woorowulo be men bulu, wo be men fola wo fele: Nte x'é la kewalolu lon. Toxo b'é la xo í be í nila, bari í saninŋo le mu. 2Kuni! Barako dun í totuninŋo to, men be ŋinin xa sa, bawo ń man í la kewalolu tara dafanin ń na Ala ɲa xoto. 3Wo to, í laxaranta men na, anin í xa men me, í hakilo lajigi wo kun. Wo mara, xa nimisi! Nin í man kuni, ń si na í xo sunŋo, x'a tara í man a lon ń be nala waxato men, x'é ju. 4Bari haali wo, moxo dolu be í bata Sarade, mennu man i la faanolu noxo. Wolu nin nte si i taxama i ɲoxo fe, xa faanu xoyo tu i la, bawo i nin wo xa xan. 5«Wo ɲa ma, men je sinŋo soto, faanu xoyimanŋo si dun wo xanna. Nte me a toxo bo nilamaya bukko xono. Nte si a fo ń Fa anin a la melekiyolu ɲala xo wo tigo mu nte ta le ti. 6«Tulu be men ma, wo x'a lame, Ni Senunŋo be men fola Ala la jamalu ɲen!» 7«A safe Filadelifi Ala la jama melekiyo ɲen xo: «Men mu Senumanŋo nin Tonɲatigo ti, mansaxe Dawuda la xundinŋo be men bulu, men si da yele moxo si me men taxun no, anin men si da taxun moxo si me men yele no, wo be men fola wo fele: 8Nte x'é la kewalolu lon. Ń xa da do yele x'a bula í ɲa xoto, moxo me men taxun no, bawo barakendin doron ne be í la, anin bawo í xa ń na xumo mara, anin du í man í xaro nte toxo la. 9A fele, ń be nala Sentane batusuwo moxo dolu dila í ma, wo fanolu mennu b'e fannu kenin Yahudiyalu ti, x'a tara i nte a ti: Ń si i diyakuwa i xa na ɲongi í xoto. I si a lon xo nte be í xanula. 10X'a la a xan í xa nte la xumo mara timinadiya to, nte du si í mara tooro waxato, men be nala sila duniya moxolu bee ma, xa duguxulo xan moxolu xotobo. 11Dondin ń si na. Men be í bulu wo tomuta bete, walasa moxo si xana í la kunnawulijala muta í la. 12«Men je sinŋo soto, nte si wo tigo ke losinŋo ti ń na Ala la batusuba xono. A me bo je wo xo tugun. Nte si ń na Ala toxo safe wo tigo xan, xa ń na Ala la galluba toxo safe a xan, nin wo mu Yerusaleme kuto ti, men be bola sanŋo to, ń na Ala bata. Nte si ń toxo kuto du safe a xan. 13«Tulu be men ma, wo x'a lame, Ni Senunŋo be men fola Ala la jamalu ɲen.» 14«A safe Lawodise Ala la jama melekiyo ɲen xo: «Men toxo xo Amiini, Seede xantigo, anin Tonɲatigo, men mu Ala la dalo bee sabaabubaxo ti, wo be men fola wo fele: 15Nte x'é la kewalolu lon: Í man suma, í man xandi. Nin í tun xa suma le, walla í xa xandi le, wo le tun xa fisa! 16X'a la a xan í man xandi, í man suma, í be namarinin ne, ń be nala í foonola. 17Í b'a fola xo: “Ń mu fentigo le ti, ń fentigiyata, fusi lafi nte ń na”. Í man a lon xo í mu bulutoxulunŋo nin ɲaanibaxato nin segebaxantunŋo nin fiyonto anin balamaxulunŋo le ti. 18Wo le x'a tu, nte be í tonbenna xo í xa sano san nte ma, ta xa men janxo b'a to, walasa í xa fentigiya. Faanu xoyolu san nte ma x'e ke í ma, walasa í la balamaxulunɲa xana lon x'é maluya. Ɲadimin tulo san nte ma x'a ke í ɲalu to, walasa í ɲalu xa yele. 19Nte be mennu xanula, nte si xuma wolu ɲen, x'e laxosi. Wo to, í balan í xa nimisi. 20A fele, ń be lonin da la x'a konkon; nin moxo do xa ń xumaxanŋo me xa da yele, ń si dun wo tigo bata, ń nin a si domolo ke, ate nin nte si domolo ke. 21«Men je sinŋo soto, ń si wo tigi nin nte lasigi i ɲoxo fe, ń na mansasigilanŋo xan, í xo nte fan xa sinŋo soto ɲa men, ń nin ń Fa Ala xa sigi i ɲoxo fe, a la mansasigilanŋo xan. 22«Tulu be men ma, wo x'a lame, Ni Senunŋo be men fola Ala la jamalu ɲen!»

will be added

X\