YITALOLU 22

1Wo xo, melekiyo xa nilamaya bajiyo yita nte la, a be í xo kuro men be ŋelenxula. Wo jiyo tun be bola Ala nin Saaxandinŋo la mansasigilanŋo dula, 2xa woyo gallo dakeno temo to. Nilamaya yiro tun be wo ba boxo fulo. A be dinŋo kela sinɲa tan nin fula sanŋo xono. Xaru wo xaru a si dinŋo ke. A fitolu be siyalu jaarala. 3Ala la dango me fen si soto non tugun. Ala nin Saaxandinŋo la mansasigilanŋo si ke gallo xono, Ala la jonŋolu s'a batu. 4I si a ɲada je. A toxo si safe i fodalu la. 5Su me ke tugun. Moxo si maaku me ke lanpamana la tugun, walla tilo keneya la, bawo Marigi Ala si a keneya bo i ɲen. I si ke mansolu ti fo abada. 6Wo xo, melekiyo xo ń ɲen xo: «Ɲin xuma innu mu wulibalo nin tonɲa le ti. Marigi Ala, men be a Niyo dunna kilalu to, ate le x'a la melekiyo ki, walasa kuwo men be nala kela dondin, a xa wo yita a la jonŋolu la.» 7Isa xo: «A fele, dondin ń si na! Moxo men je ɲin bukke in kilaya xumolu mara, heero be wo ɲen!» 8Nte Yaya xa ɲin ku innu me, x'e je. Ń x'e me anin x'e je tumo men, ń xa ń boyi melekiyo sinŋolu xoto, wo men x'é yita ń na. Ń xo, xo ń b'a batula. 9Bari a xo ń ɲen xo: «Í xana wo ke! Nte mu baarakedinŋo le ti í xo ite, anin í badin kilalu, anin mennu bee be ɲin bukke in xumolu marala. Í xa xan xa Ala le batu.» 10Wo xo, a xo ń ɲen xo: «Í xana ɲin bukke in kilaya xumolu tu duguwo to, bawo waxato sutiyata. 11Tilinbalo xa taxa ɲa xa tilinbaliya ke, anin noxoninŋo xa taxa ɲa noxoninɲa to. Bari tilinninŋo xa tilinninɲa ke xa taxa ɲa, anin senumanŋo x'é senuya xa taxa ɲa.» 12Isa xo: «A fele, dondin ń si na! Ń nin bee la sara si na x'a di í ma, x'a la bee kilin kilin na kewalolu xan. 13Nte mu Alifa nin Omega le ti, folo anin labanŋo, damuto anin dafaxo.» 14Mennu be i la faanolu kula, walasa i xa sin xa nilamaya yiro dinŋo do soto, anin xa dun gallo to, a dundalu fe, heero be wolu ɲen. 15Bari wulukukelalu nin subaxolu nin jadolu, nin moxofaxalalu, nin bolibatulalu, anin moxo wo moxo be faniya fe, anin mennu b'a fola, wolu bee be banto to! 16«Nte Isa xa ń na melekiyo ki xa ɲin seedeya in nasi alu ma, Ala la jamalu la kuwo to. Nte mu Dawuda tobo nin a bonsonŋo le ti, anin saxuyelenda la loolo, men be manala.» 17Ni Senunŋo nin maaɲo xo: «Na!» Men je a me wo x'a fo xo: «Na!» Mindoxo be men na, wo xa na; men be nilamaya jiyo fe, wo x'a min fu. 18Moxo wo moxo be ɲin bukke in kilaya xumolu lamela, nte b'a fola wolu bee ɲen xo: Nin do xa do kafu i ma, toorokuwo mennu fota ɲin bukke in xono, Ala si wolu kafu a tigo ta ma. 19Nin men xa do bo ɲin bukke in kilaya xumolu la, Ala si wo tigo nidula bo nilamaya yiro nin gallu senumanŋo to, wo mennu la kuwo be safenin ɲin bukke in xono. 20Men be ɲin ku innu seedeyala, wo xo: «Iyo, dondin ń si na!» Amiini! Marigi Isa, na! 21Marigi Isa la neemo xa ke alu bee fe.

will be added

X\