YITALOLU 21

1Wo to, ń xa sanxulu kuto nin duguxulu kuto je, bawo sanxulu folo nin duguxulu folo tunnu sankota. Xooxojiyo nte je tugun. 2Ń xa gallu senumanŋo je, Yerusaleme kuto, a tun be jigixan xa bo sanŋo to, Ala bata. A x'é toben í xo maaɲo men x'é masiti a xe ɲen. 3Ń xa xumaxanba do me xa bo mansasigilanŋo dula xo: «Saasa Ala sigidula fele moxolu temo to! A si sigi i bata, i si ke a la moxolu ti. Ala fan si ke i bata, a si ke i la Ala ti. 4A si ɲajiyo bee fita x'a bo i ɲalu la. Saya me ke tugun, walla furexaso, walla xuure, walla tooro, bawo fen fololu sankota.» 5Men be siginin mansasigilanŋo xan xo: «A fele ń be fenŋo bee kela kuto ti.» Wo xo, a xo ń ɲen xo: «A safe, bawo ɲin xuma innu mu wulibalo nin tonɲa le ti.» 6A xo ń ɲen du xo: «A keta xa ban! Nte mu Alifa nin Omega le ti, damuto nin labanŋo. Mindoxo be men na, nte si nilamaya jiyo bodula jiyo di a ma a x'é min a la fu. 7Men je sinŋo soto, wo tigo si ɲin fen innu soto ke ti; nte si ke a la Ala ti, a si ke nte dinŋo ti. 8Men ken mu jiitolu nin lannayabalolu, nin ku haramuninkelalu, nin moxofaxalalu, nin jadolu, nin subaxolu, nin bolibatulalu, anin fanolu bee ti, wolu nidula be ta nin tinbiritiyo dalaba mananinŋo le to. Wo le mu saya fulananŋo ti.» 9Wo to, meleke woorowulo mennu nin tooroku felinfa woorowula labanŋolu be i bulu, wolu to kilin xumata ń ɲen x'a fo xo: «Na, ń si maaɲo yita í la, nin wo mu Saaxandinŋo musu ti.» 10Melekiyo taxata ń nima ti kuruba janjamanŋo do xan. A xa gallu senumanŋo yita nte la, Yerusaleme gallo, a tun be jigixan xa bo sanŋo to, Ala bata. 11A tun be manaxan Ala nooro fe. A keɲa tun be í xo kuru daxolenŋo do, a be í xo jasipekuro men be ŋelenxula. 12Tataba janjamanŋo tun b'a lamininnin. Dunda tan nin fula b'a la. Meleke tan nin fula be wo dundalu la. Banisirayila dinŋolu xabiile tan nin fulo toxolu tunnu be safenin wo dalu xan. 13Da saba be kotonŋo to, saba be sahelo, saba be banbugo, saba be tiliboyo. 14Gallo tato tun be siginin kuru tan nin fula xan, Saaxandinŋo la kiladin tan nin fulo toxolu be safenin mennu xan. 15Melekiyo men xumata nte ɲen, sumannilanŋo do tun be wo bulu, sanuguma le mu, walasa xa gallo nin a dalu nin a tato suman. 16Gallo boxo naano bee xa xan, a lo nin a xono bee kilin janɲa to. Melekiyo xa gallo suman a la guma la. A benta kilometere wulu fula nin keme naani le ma. A lo nin a xono nin a janɲa bee xa xan. 17A xa tato du suman. A janɲa benta nonxon ɲa keme nin tan naani nin naani le ma, hadamadinŋolu la sumannikelanŋo, melekiyo xa men ta. 18Tato tun be kenin jasipekuro la, gallo tun be kenin sanu yerewuluwo le la, men be í xo weere ɲuma. 19Gallo tato jusigilanŋolu tunnu be jangunin kuru daxolen sifa bee la. Jusigilan folo tun mu jasipekuro le ti, fulananŋo safirekuro, sabananŋo agatekuro, naaninanŋo emerodekuro, 20luulunanŋo onikisekuro, wooronanŋo saraduwanekuro, woorowulananŋo kirisolitekuro, saginanŋo berilikuro, xonontonanŋo topasekuro, tannanŋo kirisoparasekuro, tan nin kilinnanŋo yasentikuro, tan nin fulananŋo ametisitekuro. 21Dunda tan nin fulo tunnu mu xononkese daxolen tan nin fula le ti. Dunda wo dunda tun mu xononkese daxolen kilin ti. Gallo dakeno tun be kenin sanu yerewuluwo la, men be ŋelenxula í xo weero. 22Nte man Alabatusuba je wo gallo to, bawo Marigi Ala Sinŋobeetigo fan ne mu wo gallo Alabatusuba ti, ate nin Saaxandinŋo. 23Gallo maakuwo nte tilo la, walla xaro la, walasa x'a keneya, bawo Ala nooro b'a keneyanin, Saaxandinŋo le mu a lanpo ti. 24Siyalu si i taxama a keneya la, duguxulo mansaxelu nin i la naafulo si na a ma. 25A dundalu me taxun tilo to, bawo su nte nala kela non tugun. 26Siyalu nooro nin i bunɲa si taxa ti je. 27Fen noxonin si me dun je. Moxo wo moxo be ku haramuninŋo kela anin xa faniya fo, wo me dun je, fo men doronnu toxo be safenin Saaxandinŋo la nilamaya bukko xono.

will be added

X\