YITALOLU 20

1Wo xo, ń xa melekiyo do jigito je xa bo sanŋo to. Dinxajironba danjebalo xundinŋo b'a bulu anin negejoloxoba do. 2A xa samaano muta, sa xoto, nin wo mu jinnolu la kuntigo nin Sentane ti, x'a siti negejoloxo la san wulu xono. 3Melekiyo x'a fili dinxajironba danjebalo xono x'a da soxo a ma, xa taagumanseedo ke a la, walasa a xana siyalu lafili tugun fo san wulu kilinŋo xa dafa. Wo xo, a xa xan xa bula waxatindin xono. 4Wo xo, ń xa mansasigilanŋo dolu je, sinŋo dita i tosigibaxolu ma xa kiito tege. Men du tunnu kunŋo tegeta Isa seedeya nin Ala la xumo nofe, ń xa wolu niyolu je. Wolu tunnu man wara jaxo batu walla a ɲoxonɲo daraninŋo, a taagumanseedo man ke i fodalu la walla i bulolu to. Wolu kunita xa bo furelu to, xa sigi mansaya la Kirisita fe, san wulu kilin xono. 5Fure tolu man kuni xa bo furelu to, jannin san wulu kilinŋo xa dafa. Wo le mu furekuni folo ti. 6Moxo mennu xa nidula soto furekuni folo to, heero be wolu ɲen, wolu keta senumanŋolu ti. I mu Ala talu ti, saya fulananŋo la julu nte i la. I si ke Ala nin Kirisita la sadaxalasibaxolu ti. I nin Kirisita si sigi mansaya la san wulu kilin xono. 7Nin san wulu kilinŋo dafata tumo men, Sentane si bula xa bo a la kaso la. 8A si taxa siyalu lafili, mennu be duguxulo tonxon naano to, Gogu nin Magogu. A si wolu lakamari kelo xanma. Wolu xa sa í xo xooxojida la keɲo. 9I nata xa duguxulo dula bee fa, xa moxo senumanŋolu la dula laminin, nin wo mu Ala la gallu xanuninŋo ti. Bari ta jigita xa bo sanŋo to x'e jani. 10Sentane men tun b'e lafilixan, wo filita ta nin tinbiritiyo dalaba xono, wara jaxo nin kila fano bata. I si ɲaaga suwo nin tilo fo abada. 11Wo xo, ń xa mansasigilanba xoyimanŋo do je, anin a xan sigibaxo. Duguxulo nin sanxulo x'e bori xa bo a ɲa xoto, i man je tugun. 12Ń xa furelu je, moxoba nin moxondin, i be lonin mansasigilanŋo ɲafe. Bukko dolu dayeleta. Bukke xote dayeleta, nin wo mu nilamaya bukko ti. Furelu la kiito tegeta x'a la i la kewalolu xan, x'a ben wo bukkolu xono safeninŋo ma. 13Xooxojiyo x'a la furelu di. Saya nin lahara x'e la furelu di. Kiito tegeta furelu bee kilin kilin xan, x'a ben i la kewalolu ma. 14Saya nin lahara filita ta dalaba xono. Wo ta dalaba le mu saya fulananŋo ti. 15Moxo wo moxo toxo safeninŋo man tara nilamaya bukko xono, wo filita ta dalaba xono.

will be added

X\