YITALOLU 2

1«A safe Efesi Ala la jama melekiyo ɲen xo: «Loolo woorowulo be men kininbulo to, nin a be í taxamala sanu lanpa woorowulo temo to, wo be men fola wo fele: 2Nte xa í la kewalolu lon, í la sege anin í la timinadiya. Ń x'a lon xo í me moxo jaxolu la kuwolu muɲa no. Mennu b'a fola x'e mu kiladinŋolu ti x'a tara i nte a ti, í xa wolu xotobo, í xa wolu tara fanolu ti. 3Í xa timinadi, í toorota nte toxo nofe, bari í man sege. 4Bari ń be fen kilin fola í ma, xanuya folo men tun be í la, í man wo tu í la. 5Í hakilo lajigi í boyidula kun, nimisi xa í la kewale fololu ke, nin wo nte, ń si na í ma. Nin í man nimisi, ń si í la lanpo bo a no to. 6Bari í la ɲin xa bete: Nikolayi diino moxolu la kebaarolu man di í ɲen, í xo i man di nte du ɲen ɲa men. 7«Tulu be men ma, wo x'a lame, Ni Senunŋo be men fola Ala la jamalu ɲen. «Men je sinŋo soto, ń si nilamaya yiro dinŋolu di wo ma domolo ti, men be Ala la arajanna xono.» 8«A safe Simirine Ala la jama melekiyo ɲen xo: «Men mu folo nin labanŋo ti, nin a tun sata xa nilamaya tugun, wo be men fola wo fele: 9Nte x'é la tooro nin í la segebaxantunɲa lon. Bari tonɲa la, í mu fentigo le ti! Mennu be i fannu kenin Yahudiya ti, x'a tara i nte a ti, wolu be toxotiɲaxumo mennu fola, ń xa wolu lon. Wolu mu Sentane la batusuwo le ti. 10Ɲaaga men be nala í sotola, í xana sila wo ɲa. A fele, Sentane si alu dolu bula kaso la walasa x'alu xotobo, alu si tooro tili tan xono. Ke xantigo ti fo saya. Nin wo keta, ń si nilamaya di í ma kunnawulijala ti. 11«Tulu be men ma, wo x'a lame, Ni Senunŋo be men fola Ala la jamalu ɲen! «Men je sinŋo soto, wo si kisi saya fulananŋo ma.» 12«A safe Peregame Ala la jama melekiyo ɲen xo: «Fan dafula dimanŋo be men bulu, wo be men fola wo fele: 13Nte xa í sigidula lon: Sentane la mansasigilanŋo be dula men ne mu. Í be notoninbete nte la, anin í man í la lannaya bo nte xan, haali ń seede xantigo, Antipasi faxata alu bata waxato men, Sentane sigidula. 14Bari haali wo, fen dantalu be ń bulu x'e fo í ma: Moxo dolu be í bata mennu b'a lonin Balamu la xaranŋo xo. Balamu xa Balaki bula kalanŋo lola Banisirayila dinŋolu ɲa x'e bula bolisosubo domola anin xa jadoya ke. 15Ite du bata, moxo dolu be je, mennu be a lonin Nikolayi diino moxolu la xaranŋo xo. 16Wo le x'a tu, nimisi. Nin wo nte, dondin ń si na í ma, ń si wo moxolu kele fanŋo la, men be ń da la. 17«Tulu be men ma, wo x'a lame, Ni Senunŋo be men fola Ala la jamalu ɲen! «Men je sinŋo soto, ń si manne duguninŋo di wo ma. Ń si kuru xoyo du kilin di a ma, toxo kuto be safenin men xan, moxo man men lon fo a dita men kilin ma.» 18«A safe Tiyatire Ala la jama melekiyo ɲen xo: «Ala Dinxe, ate men ɲalu be manala í xo ta, a sinŋolu be ŋelenxula í xo silo, wo be men fola wo fele: 19Ń x'é la kewalolu lon, anin í la xanuya, nin í la xantigiya, nin í la baaro, nin í la timinadiya. Ń x'a lon x'é la kewale ɲuma labanŋolu xa sa folofolo talu ti. 20Bari fen be ń bulu x'a fo í ma: Í be Jesabeli tunin je, wo muso men b'a fan kilila xo kila, a be ń na jonŋolu lafilila. A b'e laxaranna x'e xa jadoya ke anin x'e xa bolisosubolu domo. 21Ń xa waxati di a ma walasa a xa nimisi, bari a nte a fe xa nimisi a la jadoya la. 22Wo le x'a tu, nte be nala a lalala jangaru laranŋo xan. Mennu xa jadoya ke a fe, ń si tooroba lana wolu dulu ma, nin i man nimisi wo kewalolu la. 23Nte be nala a dinŋolu faxala. Wo to, Ala la jamalu bee si a lon xo nte le mu hadamadinŋolu miiriyalu nin i xonoto kuwolu bee segesegebaxo ti. Nte si alu bee kilin kilin sara x'a ben alu la kewalolu ma. 24«Bari atelu tolu mennu be Tiyatire, nin alu man son wo xaranŋo ma, anin alu man a lon wo moxolu xa men kili xo “Sentane la gullebalu”, ń b'a fola alu ɲen xo, nte nte doni xote lala alu kun. 25Bari men be alu bulu, alu wo tomuta bete fo ń xa na. 26«Men je sinŋo soto, anin xa ń na kewalolu mara fo labanŋo lunŋo, ń si fango di wo ma, nte fan xa men soto ń Fa la: Ń si fango di wo ma siyalu xan. A si i mara negeguma la, x'e tote í xo banxudaxolu. Ń si saxuyelendala loolo du di wo ma. 29«Tulu be men ma, wo x'a lame, Ni Senunŋo be men fola Ala la jamalu ɲen!»

will be added

X\