YITALOLU 19

1Wo xo, ń xa men me xa bo sanŋo to, wo be le í xo jamaba mankanŋo. A tun b'a foxan xo: «Aleluya! Kisilo nin nooro nin sintigiya mu n na Ala le ta ti. 2Bawo tonɲa nin tilinninɲa b'a la kiitolu xono. A xa kiito tege jadomusuba xan, men tun be duguxulo noxola a la jadoya la. A x'a la jonŋolu faxalo julo sara a ma.» 3I xo tugun xo: «Aleluya! A janisiisiyo be wulila fo abada.» 4Moxoba muxan nin naano anin fen nilama naano x'e ɲongi xa Ala batu, men be siginin mansasigilanŋo xan, i xo: «Amiini! Aleluya!» 5Wo to, xumaxanŋo do bota mansasigilanŋo xan xo: «Alu n na Ala tantu, ate mennu bee mu a la jonŋolu ti, ate mennu be silala a ɲa, moxondin nin moxoba!» 6Wo xo, ń xa men me, wo be le í xo jamaba mankanŋo, a be í xo jiba sonxoxanŋo, a be í xo sanjifetenxanbalu. I tunnu b'a foxan xo: «Aleluya! Bawo Marigi, n na Ala, Sinŋobeetigo x'a la Mansaya sigi. 7Alan xa ɲaɲa, xa ɲaxali anin x'a bunɲa, bawo Saaxandinŋo la maaɲoya sininŋo fele. A musu x'é toben. 8Lenfaanu ɲuma ŋelenxuninŋo dita a ma a x'a dun.» Wo lenfaano mu moxo senumanŋolu la kewale tilinninŋo lelu ti. 9Melekiyo xo ń ɲen xo: «A safe! Mennu kilita Saaxandinŋo la maaɲoya domolo ma, heero be wolu ɲen!» A xo du xo: «Ala la xumo fan ne mu ɲinnu ti.» 10Nte xa ń boyi a sinŋolu xoto xo ń b'a batula, bari a xo ń ɲen xo: «Í xana wo ke! Nte mu baarakedinŋo le ti í xo ite nin í badin tolu, mennu be Isa la seedeya marala. Í xa xan xa Ala le batu!» Isa xa tonɲa men yita, wo le be barako dila kilalu ma xa kilaya ke. 11Wo xo, ń xa sanxulo dayeleninŋo je. Su xoyo do bota. A xan sigibaxo toxo xo Xankilintigo anin Tonɲatigo. A be kiito nin kelo kela tilinninɲa la. 12A ɲa tunnu be manala í xo tamano, mansakufuno kiika tun be a kunna. Toxo do tun be safenin a xan, moxo man men lon nin a kilin nte. 13Doroko do tun be a xanna, men bulata jelo to. A toxo xo: «Ala la Xumo». 14Sanxulo kelebulolu tunnu b'a nofe, x'e tu su xoyolu xan, lenfaanu xoyiman ɲumalu be i xanna. 15Fan da dimanŋo be bola a da xono, wo be kela xa siyalu busa. A si i mara negeguma la, xa resendolodaradinxo toɲonxo, wo resendolo mu Ala, Sinŋobeetigo la diminba le ti. 16Toxo do tun be safenin a la doroko nin a wuto xan xo: «Mansaxelu la Mansaxe anin marigolu Marigi». 17Wo xo, ń xa melekiyo do je lonin tilo xono to. A fetenbeteta xono balalu bee la, sanjanba to xo: «Alu na, alu kamari Ala la domoliba xanma! 18Alu na mansaxelu subo domo, anin sorodasi kuntigolu subo, anin kelekemansolu nin suwolu subo, anin suxanyelebaxolu nin moxo bee subo, hooro nin jon, moxondin nin moxoba.» 19Wo xo, ń xa wara jaxo je, anin duguxulo mansaxelu nin i la kelebulolu, i be kamarinin suwo xansigibaxo nin a la kelebulo kelo xanma. 20Waro mutata, anin kila fano, wo men tun xa kawakuwolu ke a ɲala xa moxolu lafili, waro taagumanseedo keta mennu la, anin men tunnu b'a ɲoxonŋo daraninŋo batula. Waro nin kila fano kendo filita ta nin tinbiritiyo dalaba xono. 21Tolu faxata fanŋo la, men tun be boxan suwo xansigibaxo da xono. Xonolu bee x'e fa i subo la.

will be added

X\