YITALOLU 18

1Wo xofe, ń xa meleke xote jigito je xa bo sanŋo to. Fangaba tun b'a bulu. Duguxulo keneyata a nooro bulu. 2A fetenta barako to xo: «Galluba Babilone boyita, a boyita! A keta jinnolu sigidula ti, a keta jinne noxoninŋolu bee dugudula ti, a keta xono noxoninŋolu nin xono ɲaxunninŋolu bee dugudula ti. 3Duguxulo siyalu bee x'e min a la jadoya jaxo dolo la. Duguxulo mansaxelu xa jadoya ke a fe. Duguxulo fiirikelalu fentigiyata a la fen ɲumalu siya xanma.» 4Wo xo, ń xa xumaxanŋo do xote me xa bo sanŋo to xo: «Nte la moxolu, alu bo Babilone, walasa alu nin a xana kafu a la junubolu to, anin xa do soto a la toorokuwolu to. 5Bawo a la junubolu siyata fo xa si sanxulo ma, anin Ala hakilo jigita a la tilinbaliyakuwolu kun. 6A xa men ke tolu la, alu wo ɲoxon ke a du la. Alu a sara a la ku keninŋolu ɲoxon fula la. A xa moxolu lamin minfenŋo men na, alu a la minnilanŋo lafa minfen na, men xa fati wo ti í xo fula. 7A xa fanbunɲa nin fen ɲuma kiika mennu di a fan ma, alu wo ɲoxon tooro nin bone lasi a ma. Bawo a b'a fola a xonoto xo: “Ń be siginin jan í xo mansamuso, ń nte musu ti men xe sata, saya jusuxaso me nte soto abada.” 8Wo le x'a tu, toorokuwo mennu lategeta a ɲen, wolu bee si boyi a xan tili kilin xono: Foɲojangaro, saya jusuxaso, xonxo, ta si a jani xeru. Bawo Marigi Ala men x'a la kiito tege, wo mu baraketigo le ti.» 9Wo to, duguxulo mansaxelu mennu nin a kafuta a la jadoya nin a la fen ɲuma kiika la, wolu si xasi xa xuure, nin i x'a janisiisiyo je wulila. 10I s'i tu dulajan a la tooro ɲasilanɲa xanma x'a fo xo: «Bone! Bone! E galluba, Babilone, galluba barakema! Leere kilin doron x'a bo xa í la kiito tege!» 11Duniya jaagukelalu be xunbola, anin x'a saya xasi, bawo moxo si nte i la fiirifenŋolu sanxan bitugun: 12Sano, xaalisixoyo, kuru daxolenŋolu, xononkese daxolenŋolu nin lenfaanu ɲumalu nin faanu wuleman daxolenŋolu, nin suwafaanolu, a nin yiri xasa dimanŋolu, anin fenŋo mennu darata samaɲinŋo la, anin yiri daxolenŋolu, nin silo nin nego anin kuru beto men be kilila xo maraburu. 13Nafen mungu sumadimanŋo do, men be kilila xo kaneli, anin wo ɲoxon sifa xotelu bee, latikolonŋolu, mire sumadiyalanŋolu, digicolu, dolo nin tulo nin farinmungo, nin ɲo, nin ɲinsolu, nin saaxolu, suwolu, nin suwuturolu, jonŋolu, nin moxo santalu. 14A si fo xo: «Í niyo tun be fenŋo mennu xan, wolu taxata x'e soobo í la. Fen wo fen mu naafulo nin fen beto ti, wo bee sankota í ma. Í me wolu soto tugun.» 15Jaagukela mennu fentigiyata x'e tu jaago la wo galluba xono, wolu s'i lo dulajan a la tooro ɲasilanɲa xanma. I si xunbo, x'é saya xasi; 16i s'a fo xo: «Bone! Bone! Galluba men, nin lenfaano nin faanu wuleman daxolenŋolu b'a ma, men be maɲaranin sano nin kuru daxolenŋolu anin xononkese daxolenŋolu la, 17leere kilin doron ne x'a bo xa wo naafuluba bee tiɲa!» Batonnaborilalu nin batonxonomoxolu, xooxojixan baarakelalu anin mennu be i baluwo sotola xa bo xooxojiyo to, wolu bee tunnu be lonin dulajan. 18I xa wo galluba janisiisiyo je tumo men, i kuleta xo: «Gallu joman si ɲin galluba in bo?» 19I tunnu b'a ma xa buruxallo sari i fannu kunŋo to, i be xunbola, anin x'é fure xasi xo: «Bone! Bone! Galluba men na naafulo xa xooxojixan batontigolu bee fentigiya, leere kilin doron ne x'a bo xa wo galluba tiɲa.» 20Sanxulo, ɲaɲa a tiɲa la! Alu dulu, moxo senumanŋolu nin kiladinŋolu nin kilalu, alu ɲaɲa, bawo Ala xa kiito tege a xan, x'alu ta sara. 21Wo to, meleke barakema do xa kuro do ta, men be í xo silikuru xulimanba, x'a fili xooxojiyo to, x'a fo xo: «Galluba Babilone du be nala tala x'a fili barako la ten ne. A me je tugun. 22Kontinfoxan nin donkililaxan nin fulefoxan anin buutufoxanŋo me me í bata tugun. Bululabaarakela si me tara í bata tugun. Silixan si me me í bata tugun. 23Lanpo keneya me bo í bata tugun. Maaɲoxe nin maaɲo xanŋo me me í bata tugun, bawo í la jaagukelalu tun nelu ɲoxonnu nte duguxulo xan. Í la suuyakuwolu xa siyalu bee lafili.» 24Kilalu nin moxo senumanŋolu faxali jelo jeta Babilone le, anin moxo mennu bee faxata duguxulo xan.

will be added

X\